ޑރ. މުއިއްޒު ހޮވަން ޕީޕީއެމް/ޕީއެންސީގެ ލީޑަޝިޕް އެއްގަލަކަށް އަރައިފި

ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަނުކުރެއްވުމުން އިދިކޮޅު ކޯލިޝަނުން ނެރުނު ކެންޑިޑޭޓް މާލޭ މޭޔަރު ޑރ. މުހައްމަދު މުއިއްޒަށް އިންތިހާބު ކާމިޔާބުކޮށްދޭން ޕީޕީއެމް/ޕީއެންސީގެ ލީޑަޝިޕް އެއްގަލަކަށް އަރައިފި އެވެ.

ޖަލު ހުކުމާ ހެދި ޔާމީންގެ ޝަރުތު ގެއްލި ވާދަނުކުރެއްވުމުން އެދިވަޑައިގަތީ ރިޔާސީ އިންތިހާބު ބޮއިކޮޓްކުރުމަށެވެ. އެކަމަކު ޕީޕީއެމް/ޕީއެންސީގެ ސެނެޓުން އިންތިހާބުގައި ވާދަކުރަން ނިންމުމުން ޕާޓީ ތެރޭގައި ހިޔާލުތަފާތުވުން އުފެދުނެވެ. މުއިއްޒު އެންޑޯސްނުކުރައްވައި ދެ ޕާޓީގެ އިސް ބޭފުޅުންތަކެއް ތިއްބެވީ ހިމޭނުންނެވެ.

އެކަމަކު، އެ ހިޔާލުތަފާތުވުން އެއްފަރާތްކޮށް މުޅި ލީޑަޝިޕްގެ ބައިވެރިވުމާ އެކު މިރޭ ވަނީ ޕްރެސް ކޮންފަރެންސެއް ބާއްވައިފަ އެވެ.

ޕީޕީއެމްގެ އޮފީހުގައި ކުރިއަށްދާ އެ ބައްދަލުވުމުގައި ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވީ ދެ ޕާޓީ އޮތީ މުއިއްޒު ފަހަތުގައި ބަދަހިކޮށް ކަމަށެވެ. ކުރިއަށް އޮތް ރިޔާސީ އިންތިހާބު އެ ކޯލިޝަނުން ކާމިޔާބު ކުރާނެ ކަމަށާއި އެ މަސައްކަތް މިރޭ ފެށީ ކަމަށް ވެސް ވިދާޅުވި އެވެ.

"ހިޔާލުތަފާތުވުން ނެތީމައޭ އަޅުގަނޑުމެން އެންމެން މިތާ މިތިބީ. އަޅުގަނޑު ހީވަނީ އެވަރުން ފުދޭނެހެން،" ލީޑަޝިޕަށް އިޝާރާތް ކުރައްވައި އަދުރޭ ވިދާޅުވި އެވެ.

ސެނެޓުގައި ހިޔާލުތަފާތުވުމަކީ ޕާޓީގެ ތެރޭގައި ޑިމޮކްރަސީ އޮތް ވަރު ކަމަށާއި އެކަމުން ޕާޓީ ބައިބައިވެ ނޭދެވޭ އަސަރެއް ނުކުރާނެ ކަމަށެވެ. ޔާމީން ހުށަހެޅުއްވި ގޮތާ ޚިލާފަށް އިންތިހާބުގައި ވާދަކުރަން ސެނެޓުގެ ގިނަ މެމްބަރުން ތާއީދުކުރެއްވީ އެމަނިކުފާނުގެ ހައްގުގައި ކަަމަށް ވެސް އަދުރޭ ވިދާޅުވި އެވެ.

އޭނާ ވިދާޅުވި ގޮތުގައި ޔަމީން އޮތީ ޕްލޭން އޭ އާއި ބީ އަދި ސީ ވެސް ހޯއްދަވައިފަ އެވެ. ޕީޕީއެމްގެ ކެންޑިޑޭޓެއް ނުނެރެވުމުން ރާވާފައި އޮތް ގޮތަށް ސީއާ އެކު ކުރިއަށް ވަޑައިގަތީ ކަމަށާއި އެއީ ޕާޓީ މަގުމަތި ނުކުރަން ކަމަށް ވިދާޅުވި އެވެ.

"ރައީސް ޔާމީނާ އަޅުގަނޑުމެން [ސެނެޓުން] ދެކޮޅެއް ނުވަން. އަޅުގަނޑުމެންގެ ތެރޭގައި ބައިބައިވުމެއް، ހިޔާލުތަފާތުވުމެއް ނެތް."

ރައީސް އިބްރާހިމް މުހައްމަދު ސޯލިހްއާ ވާދަކުރައްވައި މުއިއްޒު މި އިންތިހާބު ކާމިޔާބު ކުރައްވާނީ، އަދުރޭ ވިދާޅުވި ގޮތުގައި، ބޮޑުތަނުންނެވެ. އެކަމާ މެދު އެ ކޯލިޝަނަށް ޝައްކެއް ނެތް ކަމަށް ވިދާޅުވި އެވެ.

ޕީއެންސީގެ ރިޔާސީ ކެންޑިޑޭޓް ޑރ. މުއިއްޒު ވިދާޅުވީ އޭނާގެ އެންމެ މުހިއްމު އަމާޒަކީ މި އިންތިހާބު ކާމިޔާބުކޮށް ޔާމީން މިނިވަންކުރުން ކަމަށެވެ. އިންތިހާބުގައި ކުރިއަށް ވަޑައިގަންނަވާނީ ޔާމީންގެ ވިސްނުންފުޅާ އެކުގައި ކަމަށް ވިދާޅުވި އެވެ.

މުއިއްޒު ވިދާޅުވި ގޮތުގައި ކެންޑިޑެސީ ކަށަވަރުވުމުން ރައީސް އިބްރާހިމް މުހައްމަދު ސޯލިހަށް ގުޅުއްވައި ޔާމީން ގެއަށް ބަދަލުކޮށްދޭން އޭނާ ވަނީ އާދޭސް ދަންނަވައިފަ އެވެ. ސަރުކާރުން ބޭނުންވީ ވާދަނުކުރެވޭ ގޮތް ހަދަން ކަަމަށާއި އެކަން ފުރިހަމަވުމުން އާއިލާގެ ހިތްދަތި ކަމަށް ބަލާފައި ވެސް ޔާމީން ގެއަށް ބަދަލުކޮށްދެއްވަން އެދިވަޑައިގަތް ކަމަށް ވިދާޅުވި އެވެ.

މުއިއްޒު ވިދާޅުވީ ރިޔާސީ ޓިކެޓް ލިބިވަޑައިގަތަސް ހައްގުވެރި ފަރާތަކީ ޔާމީން ކަން ހަނދުމަނައްތައެއްނުލައްވާނެ ކަމަަށެވެ.

މުއިއްޒު ވެސް ވިދާޅުވި ގޮތުގައި ޕީޕީއެމް/ޕީއެންސީ ސެނެޓުގެ ހިޔާލުތަފާތުވުމަކީ އެތެރޭގެ ޑިމޮކްރަސީގެ ހަރުދަނާ ކަމެވެ.

ޕީޕީއެމުން ރޭ ބޭއްވި މުޒާހަރާގައި، މުއިއްޒުގެ ޓިކެޓާ އެކު އިންތިހާބުގައި ވާދަކުރަން ނިންމައި، ޔާމީނަށް އިހާނާތްތެރިކޮށް ހިތާފައިވާ ކަމަށް ލީޑަޝިޕްގެ ބައެއް ބޭފުޅުން ދެއްކެވި ވާހަކަތަކާ ގުޅިގެން ނޫސްވެރިން ސުވާލުކުރުމުން، ވަކިވަކިން ހުރިހާ ބޭފުޅުން ވަނީ ދިފާއުވެވަޑައިގެންފަ އެވެ.

އޭގެ ތެރޭގައި ޕީޕީއެމްގެ ނައިބު ރައީސް، ނައިފަރު ދާއިރާގެ މެމްބަރު އަހްމަދު ޝިޔާމް އާއި ޕީއެންސީގެ ނައިބު ރައީސް އާދަމް ޝަރީފް އާއި ޕީއެންސީގެ ނައިބު ރައީސް އިބްރާހިމް ސުޖާއު އާއި ޕީއެންސީގެ ނައިބު ރައީސް މުހައްމަދު ސައީދާއި މަހިބަދޫ ދާއިރާގެ މެމްބަރު ތޯރިގް (ޓޮމް) ހިމެނިވަޑައިގަންނަވަ އެވެ.

ނައިފަރު ދާއިރާގެ މެމްބަރު ޝިޔާމް ވިދާޅުވީ މުއިއްޒުގެ ކެމްޕޭން އިވެންޓެއް ރެއާ ހަމައަށް ނުބާއްވާ ކަމަށެވެ. ރޭގެ މުޒާހަރާގައި ދެއްކީ ޔާމީން މިނިވަންކުރުމުގެ ވާހަކަތައް ކަމަށް ވިދާޅުވި އެވެ.

ސެނެޓުގައި ޔާމީނާ މެދު ވާހަކަ ދެއްކި ގޮތުގެ ފޮޓޯތަކާއި ވީޑިއޯ ވެސް އެމަނިކުފާނަށް ދައްކަވާނެ ކަަމަށް ވިދާޅުވި މަހިބަދޫ ދާއިރާގެ މެމްބަރު އަހްމަދު ތޯރިގް (ޓޮމް) ވެސް ވިދާޅުވީ ރޭގެ ހަފުލާއަކީ ކެމްޕޭން އިވެންޓެއް ނޫން ކަމަށެވެ.

"އެއީކީ އެއްވެސް ހާލެއްގައި ވަކި ބޭފުޅަކު އެންޑޯސްކޮށް ނުވަތަ އެންޑޯސްނުކުރުމަށް ދެއްކެވި ވާހަކަތަކެއް ނޫން،" ޓޮމް ވިދާޅުވި އެވެ.

ސުޖާއު ވިދާޅުވީ މުއިއްޒާއި ރަނިން މޭޓް ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް އެންޑޯސްނުކުރާ ނަމަ މުޅި ލީޑަޝިޕާ އެކު ޕްރެސް ކޮންފަރެންސެއް މިރޭ ޕާޓީ އޮފީހުގައި ނޯންނާނެ ކަމަށެވެ.

އަދުރޭ ވިދާޅުވި ގޮތުގައި ކުރިއަށް އޮތް ތަނުގައި ވެސް ޕީޕީއެމް ރޫޅައެއް ނުލެވޭނެ އެވެ. އެންމެ ވަރުގަދަ އަދި އެންމެ އެކުވެރި ކޯލިޝަނަކަށް ވާނީ ވެސް ޕީޕީއެމް/ޕީއެންސީ ކަމަށް އޭނާ ވިދާޅުވި އެވެ.