ދެ ވަނަ ދައުރު ނިންމާނީ ދެން އަންނަ ސަރުކާރަށް ލޯނުގެ ބުރަ ނުޖައްސާ: ރައީސް

ވެރިކަމުގެ އިތުރު ދައުރެއް ލިބިއްޖެ ނަމަ އެ ދައުރު ނިންމާނީ ލޯނުގެ ބުރަ އޭގެ ފަހުން އަންނަ ސަރުކާރަކަށް ނުޖައްސާ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.

އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގެ ކެމްޕެއިނަށް ށ. އަތޮޅަށް ފައްޓަވާފައިވާ ދަތުރުފުޅުގައި، މި އަތޮޅު މިލަންދޫގައި ބޭއްވި ބޮޑު ޖަލްސާގައި ރައީސް ވިދާޅުވީ ވެރިކަމުގެ ދެ ވަނަ ދައުރަކަށް ކުރިމަތިލެއްވީ ވަކި އަމާޒެއް ހިފައިގެން ކަމަށެވެ. އޭގެ އެންމެ ބޮޑު އަމާޒަކީ ރާއްޖޭގެ އިގުތިސޯދު ދެ ގުނަ ކުރުން ކަމަށް ރައީސް ވިދާޅުވި އެވެ.

އިގުތިސޯދު ދެ ގުނަކުރުމަށް އާރުޓީއެލް އާއެކު މުޅި ރާއްޖެ ގުޅާލުމުގެ މަސައްކަތް ފަށާފަައިވާއިރު، ވެލާނާ އިންޓަނޭޝަނަލް އެއާޕޯޓާއި ހަނިމާދޫ އަދި ގަން ރީޖަނަލް އެއާޕޯޓު ތަރައްގީކޮށް ވެސް 2025 ގައި ނިމޭނެ ކަމަށް ރައީސް ވިދާޅުވި އެވެ. އޭރުން، ވެލާނާ އެއާޕޯޓުން އަހަރަކު ހަތް މިލިއަން ޓޫރިސްޓުން އަދި ހަނިމާދޫ އާއި ގަން އެއާޕޯޓުން އަހަރަކު ތިން މިލިއަނެއްހާ މީހުންނަށް ހިދުމަތް ދެވޭނެ ކަމަށް އެ މަނިކުފާނު ވިދާޅުވި އެވެ.

އެކަމާއެކު، ޓޫރިޒަމް ފުޅާވެ، ދަނޑުވެރިކަމާއި ކޮންސްޓްރަކްޝަން އިންޑަސްޓްރީ ކުރިއަރައި، ކުރެހުންތެރިންނާއި ފޮޓޯގްރާފަރުންނަށް ފަހި ފުރުސަތުތަކެއް ލިބިގެންދާނެ ކަމަށް ވިދާޅުވި އެވެ.

ރައީސް ވިދާޅުވީ އެ މަނިކުފާނު 2018 ގައި ވެރިކަމާ ހަވާލުވެވަޑައިގެންނެވިއިރު ރާއްޖޭގެ އިގުތިސޯދު ހުރީ 81 ބިލިއަން ރުފިޔާގައި ކަމަށެވެ. އެ އަހަރު ރާއްޖެ އައީ 1.4 މިލިއަން ޓޫރިސްޓުންނެވެ. ދައުލަތުގެ އާމްދަނީ އަކީ 22 ބިލިއަން ރުފިޔާ އެވެ. ނަމަވެސް، ކޮވިޑާ ހެދި އެ އާމްދަނީތައް ދަށްވިޔަސް، މި އަހަރު ނިމޭއިރު އިގުތިސޯދު 108 ބިލިއަން ރުފިޔާއަށް އަރައި، ދައުލަތުގެ އާމްދަނީ 34 ބިލިއަން ރުފިޔާ އަށް އިތުުރުވެގެންދާނެކަން ފާހަގަކުރެއްވި އެވެ.

އެއާޕޯޓުތައް ތަރައްގީކޮށް، ޓޫރިސްޓުން އިތުރުވާން ފެށުމުން އާމްދަނީ 130 ބިލިއަން ރުފިޔާއަށް އަރައި، ދައުލަތުގެ އާމްދަނީ ވެސް 44 ބިލިއަނަށް އަރާނެ ކަމަށް ރައީސް ވިދާޅުވި އެވެ. އިގުތިސޯދު ދެގުނަ ވާނެ ކަމަށް ވިދާޅުވަނީ، އެ މަނިކުފާނު ވިދާޅުވި ގޮތުގައި، ޓެކްސް އާއި ވިޔަފާރިއަށް އަންނަ ކުރިއެރުންތަކާ ހެދި އެވެ.

"ރާއްޖޭގެ މުޅި އިގުތިސޯދު ދެ ގުނަވެއޭ، 177 ބިލިއަން ރުފިޔާގެ އިގުތިސޯދަކަށް ރާއްޖެ ބަދަލުވާނެ. ނަތީޖާއަކަށް ވެގެންދާނީ ދައުލަތުގެ ރެވެނިއު 44 ބިލިއަން ކަޑައްތުކޮށް، 50 ބިލިއަނަށް އަމާޒު ހިފުން. މީގެ ނަތީޖާއަކަށް ވާނީ ރައްޔިތުންގެ އަތްމަތި ތަނަވަސްވުން. ފުދުންތެރި ރައްޔިތުންތަކެއް އުޅޭ ރަށެއް. އަޅުގަނޑުމެން ރަށްރަށަށް ކުރަން ބޭނުންވެފައި ހުރި މަސައްކަތްތައް ކުރުމަށް ދައުލަތުން ފައިސާ ލިބުން." ރައީސް ވިދާޅުވި އެވެ.

އެ މަނިކުފާނު ވިދާޅުވީ 2026 ގެ ފަހުން ދައުލަތުގައި ލޯނު ދައްކާ ވަރަށް ފައިސާ ހުންނާނެ ކަމަށެވެ.

"އަޅުގަނޑުގެ ދެ ވަނަ ދައުރު އިރާދަކުރެއްވިއްޔާ ނިމިގެންދާނީ މި ދެންނެވި ލޯނު ދެއްކުމަށް، ދެން އަންނަ ސަރުކާރަކަށް ނުޖައްސައި އެކަން އިރާދަކުރެއްވިއްޔާ ހަމައަކަށް އަޅުވާފައި،" ރައީސް ވިދާޅުވި އެވެ.

މި ފަސް އަހަރު ނިމުމަކާ ގާތްވަމުންދާއިރު، ސިޔާސީ ބޭނުމެއްގައި އެއްވެސް މީހަކު އަދި ނޫސްވެރިޔަކު ހައްޔަރު ނުކުރާއިރު، ކުއްލި ހާލަތު ވެސް އިއުލާންނުކުރާ ކަމަށް ރައީސް ވިދާޅުވި އެވެ. އެކަމަކު، ތަރައްގީގެ މަޝްރޫއުތައް ކުރިއަށްދާކަން ތަފްސީލުކޮށްދެއްވީ ހިސާބުތަކުންނެވެ.

ރައީސް ވިދާޅުވީ 2009-2011 އަށް އެމްޑީޕީގެ ފުރަތަމަ ވެރިކަމުގައި މި އަތޮޅުގައި ހިންގީ 19 މަޝްރޫއެއް ކަމަށެވެ. ޔާމީންގެ ވެރިކަމުގައި 56 މަޝްރޫއެއް އަދި މި ވެރިކަމުގައި އެކަނި ވެސް މި އަތޮޅުގައި 159 މަޝްރޫއެއް ހިންގާފައިވާ ކަމަށް ރައީސް ވިދާޅުވި އެވެ.

އެކަމަކު، މި ހުރިހާ ކަމެއް ބެލުމަށްފަހު ގޮތް ނިންމާނީ، ރައީސް ވިދާޅުވި ގޮތުގައި، އާއްމުންނެވެ. އެކަމަކު، މަންޒަރުތަކުން އެނގި ސާބިތުވަނީ ށ. އަތޮޅާއެކު ބޮޑުތިލަދުންމައްޗަށް އުފާވެރި އަދި އަމާންރާއްޖެއަށް ބޭނުންވެފައިވާކަމަށް ވިދާޅުވި އެވެ.