މެޕްސްގެ އައިޓީ ކޯހުގައި ބައިވެރިވުމުގެ މުއްދަތު މާދަމާ ހަމަވަނީ

މެޕްސް ކޮލެޖުން ހިންގާ އެޑްވާންސްޑް ސެޓްފިކެޓް އިން އިންފޮމޭޝަން ޓެކްނޮލޮޖީ ކޯހުގައި ބައިވެރިވުމުގެ ފުރުސަތު މާދަމާ ހަމަވާނެ އެވެ.

މެޕްސް ކޮލެޖުން ބުނީ މި ކޯހަކީ އައިޓީ ދާއިރާއިން ފައުންޑޭޝަން ކިޔެވުމަށް ބޭނުންވާ ދަރިވަރުންނަށް ހާއްސަކޮށް އެ ކޮލެޖުން ކުރިއަށް ގެންދާ އެއް އަހަރު ދުވަހުގެ ކޯހެއް ކަމަށެވެ. މި ކޯހަކީ ހަމައެކަނި ފޭސްޓު ފޭސްކޮށް ކިޔަވާ ދޭ ކޯހެކެވެ.

ކޯހުގައި ބައިވެރިވެވޭނީ އިސްލާމް އަދި ދިވެހި މާއްދާއާ އެކު އޯ ލެވެލް ތިން މާއްދާއިން ސީ ފާހަށް ވުރެ މަތިން ލިބިފަިއިވާ ދަރިވަރުންނަށާއި އެމްކިއުއޭއިން ގަބޫލުކުރާ ފެންވަރުގެ ލެވަލް ތިނެއްގެ ސެޓްފިކެޓެއް އޮންނަ ދަރިވަރުންނަށެވެ. އަދި 18 އަހަރުވެ، އެއް އަހަރު ދުވަހުގެ ވަޒީފާގެ ތަޖުރިބާ ހުރެ، އިނގެރޭސިން މުއާމަލާތްކުރަން ދަންނަ ފަރާތްތަކަށް ވެސް މި ކޯހުގައި ފުރުސަތު ދޭނެ އެވެ.

މި ކޯހުގެ ޖުމްލަ ފީ އަކީ 21،150ރ. އެވެ. ކޯހުގެ ފީ 10 މަސްދުވަހުގެ މުއްދަތަށް ބަހާލާ އިންސްޓޯލްމަންޓު އުސޫލުން ފީ ދެއްކޭނެ އެވެ. އިންސްޓޯލްމަންޓަށް މަހަކު ދައްކަން ޖެހޭނީ 2،115ރ. އެވެ.

މި ކޯހުގައި ކޮމްޕިއުޓަ ޕްރޮގްރާމްގެ ކޮންސެޕްޓްތައް ތައްޔާރުކުރާނެ ގޮތުގެ ތައާރަފާއި މަލްޓިމީޑިއާ އަދި ޑިޖިޓަލް ގްރެޕިކް ޑިޒައިންގެ ތައާރަފާއި އޮފީސް އޮޓޮމޭޝަން ސޮފްޓްވެއާ އަދި ޑާޓާ ބޭސް ތައްޔާރުކުރާނެ ގޮތާއި ޑާޓާ ކޮމިއުނިކޭޝަން އަދި ކޮމްޕިއުޓަ ނެޓް ވޯކުގެ ބައިތައް ހިމެނޭނެ އެވެ.

މެޕްސް ކޮލެޖުން ބުނިގޮތުގައި ކޯހަކީ ދާއިރާއިން ޑިގްރީ ލެވެލްއިން ކުރިޔަށްދާން ނުވަތަ ކިޔަވަން ބޭނުންވާ ދަރިވަރުންނަށް އެ ފުރުސަތަށް ފަހިވެގެން ދާނެ މަގެއް ކަމަށެވެ.

މި ކޯހަށް އެޕްލައިކުރުމުގެ ފުރުސަތު މާދަމާ ހަމަވާނެ އެވެ.