އިޒްރޭލުގެ އާ ގާނޫނުން ފަލަސްތީނު ބަނދެލާނެ

ތެލްއަވީވް (ޖުލައި 25) - އިޒްރޭލުގެ އާންމު ރައްޔިތުންނާއި ސިޔާސީ ލީޑަރުން ވެސް ދެކޮޅު ހަދަމުން ދިޔަ، ސަރުކާރުގެ ގޮށްމުށުގެ ބާރު ގަދަކޮށްދޭ ގާނޫނު، އެ ގައުމުގެ ގާނޫނު ހަދާ މަޖިލީހުން އިއްޔެ ފާސްކޮށް، ފަލަސްތީނުގެ މިނިވަންކަމަށް އިތުރު ހުރަސްތައް ކުރިމަތިކޮށްފި އެވެ.

ސުޕްރީމް ކޯޓުގެ ބާރު ދަށްކޮށް، ގާނޫނު ހަދާ މަޖިލީހަށް އިތުރު ބާރުތައް ލިބިދޭ ގޮތަށް، ބޮޑުވަޒީރު ބިންޔާމީން ނަތަންޔާހޫގެ ސަރުކާރުން ހުށަހެޅި ގާނޫނު، މަޖިލީހުން އިއްޔެ ފާސްކުރުމަށް ވޯޓަށް އެހުމާއެކު، އެ ގާނޫނާ ދެކޮޅު ހުރިހާ މެންބަރުން، "ތިޔައީ ހުތުރު ގާނޫނެއް" ކަމަށް ވިދާޅުވެ މަޖިލިސް ބޮއިކޮޓް ކުރެއްވި އެވެ. އެހެންކަމުން އެ ގާނޫނު މަޖިލީހުން ފާސްވީ، އެ ވަގުތު މަޖިލީހުގައި ތިއްބެވި، ސަރުކާރަށް ތާއީދުކުރާ 64 މެންބަރުންގެ އިއްތިފާގުންނެވެ.

މަޖިލީހުން އިއްޔެ ފާސްކުރި ގާނޫނަށް އަމަލުކުރަން ފެށުމުން، އިޒްރޭލުގެ ހައި ކޯޓަށް ލިބިގެންވާ ބައެއް ބާރުތައް އެ ގައުމުގެ ގާނޫނު ހަދާ މަޖިލީހަށް އަދި ބައެއް ބާރުތައް ޖަސްޓިސް މިނިސްޓްރީ އަށް ލިބިގެންދާނެ އެވެ. ގާނޫނު ހަދާ މަޖިލީހަށް ލިބިގެންދާނެ ބައެއް ބާރުތަކަކީ، ގާނޫނުއަސާސީއާ ޚިލާފު ކަމަށް ބުނެ، މީގެ ކުރިން ހައި ކޯޓުން ބާތިލުކޮށްފައިވާ ބައެއް ގާނޫނުތައް އަލުން ފާސްކުރުމުގެ ބާރެވެ.

މި ގާނޫނުން، ގާނޫނު ހަދާ މަޖިލީހަށް ލިބިދޭނެ އަނެއް ބާރަކީ، ސުޕްރީމް ކޯޓުން ނިންމާ ނިންމުންތައް ވެސް، ގާނޫނު ހަދާ މަޖިލީހުގައި ހިމެނޭ ޖުމްލަ 120 މެމްބަރުންގެ ތެރެއިން، ސާދާ އަޣުލަބިއްޔަތު ކަމަށްވާ 61 މެމްބަރުންގެ ވޯޓުން ބަދަލުކޮށްލުމުގެ ބާރެވެ.

މި ގާނޫނަށް ތާއީދުކުރާ މީހުން ބުނާ ގޮތުގައި ކުރިން އޮތް ގޮތުން، ރައްޔިތުންގެ މަންދޫބުން ނިންމާ ނިންމުންތައް ބަދަލުކޮށްލުމުގެ ބާރު ސުޕްރީމް ކޯޓަށް ލިބިގެންވެ އެވެ. ނަމަވެސް ގާނޫނު ހަދާ މަޖިލީހުގެ މެމްބަރުންނަކީ ރައްޔިތުން އިންތިޚާބުކުރާ ބަޔަކަށް ވެފައި، ފަނޑިޔާރުންނަކީ އިންތިޚާބުކުރާ ބަޔަކަށް ނުވާތީ، އެ ބާރު ކޯޓަށް އޮވެގެން ނުވާނެ ކަމަށް އެމީހުން ދެކެ އެވެ.

އެހެން ނަމަވެސް މި ގާނޫނާ ދެކޮޅު ހަދާ މީހުން ބުނާ ގޮތުގައި ސަރުކާރާއި ރައްޔިތުންގެ މަޖިލިސް ޖަވާބުދާރީ ކުރުވައި ޒިންމާދާރުކުރުވުމަށް، ޝަރުއީ ދާއިރާއަށް ލިބިގެންވާ ބާރު ނިގުޅައިގަތުމަކީ، އިޒްރޭލުގެ ޒަމާންވީ ޑިމޮކްރެސީގެ އުސޫލުތައް ނެތިކޮށްލުމުގެ އަމަލެކެވެ. މި ގާނޫނުގެ ސަބަބުން ޑިމޮކްރެސީގެ އެންމެ ހަރުދަނާ އެއް ސިފަ ނެތިގެން ގޮސް، ސަރުކާރުގައި ޚުދުމުޚުތާރު ކަމުގެ ލަގަބު އެޅުވިގެންދާ ކަމަށް ވެސް އެމީހުން ބުނެ އެވެ.

މި ގާނޫނުގެ ބިލް ގާނޫނު ހަދާ މަޖިލީހަށް ހުށަހެޅުމާ ގުޅިގެން، އެ ގައުމުގެ އެކި ސަރަހައްދުތަކުގައި އާންމު ރައްޔިތުން މަގުތަކަށް ނުކުމެ ސަރުކާރާ ދެކޮޅަށް މުޒާހަރާ ކުރަމުން ދާތާ މިހާރު އެތައް މަހެއްވެއްޖެ އެވެ. އިއްޔެ ވެސް އެތައް ހާސް ބަޔަކު ވެރިރަށް ތެލް އަބީބުން ފެށިގެން އިރުމަތީ ގުދުސަށް ފައިމަގުގައި ހިނގާފައި ގޮސް، ސަރުކާރާ ދެކޮޅަށް މުޒާހަރާ ކުރި އެވެ.

ގާނޫނީ އޮނިގަނޑަށް މިގެނައި ބޮޑު ބަދަލުގެ ސަބަބުން އެންމެ ބޮޑު ގެއްލުމެއް ކުރިމަތިވާނީ، މިހާރު ވެސް އިޒްރޭލުގެ އަޅުވެތިކަމުގެ ދަށުގައި އޮތް ފަލަސްތީނަށެވެ. ހުޅަނގު އައްސޭރީގެ ބިންތައް ބައިނަލްއަގުވާމީ މުއާހަދާތަކާއި ޚިލާފަށް އިޒްރޭލުގެ ބިންތަކުގެ ގޮތުގައި، ޔަހޫދީންނަށް އާރާސްތުކޮށްދެމުން އަންނަ އިރު، އެފަދަ އެއްވެސް މައްސަލައެއް މީގެ ފަހުން އިޒްރޭލުގެ ކޯޓުތަކަށް ނުބެލޭނެ އެވެ.