އިޒްރޭލުން ގާޒާ އަށް ބޮން އަޅައިފި

ހުޅަނގު އައްސޭރީގެ ނާބުލް އަށް އިއްޔެ ވަދެގަނެ ފަލަސްތީނުގެ 11 މީހުން ޝަހީދުކޮށްލައި އިތުރު 102 މީހަކު ޒަޚަމްކޮށްލުމަށް ފަހު، އިޒްރޭލު ސިފައިން މިއަދު ހެނދުނު ގާޒާ އަށް ބޮމުގެ ވަރުގަދަ ހަމަލާތަކެއް ދީފި އެވެ.

އިޒްރޭލު ސިފައިން ބުނި ގޮތުގައި އިޒްރޭލުގެ މަތިންދާބޯޓުތަކުން މިއަދު ހެނދުނު ބޮން އެޅީ، ގާޒާގައި ހުރި ހަމާސް ޖަމާއަތުގެ ހަތިޔާރު އުފައްދާ ކާރުޚާނާއަކަށާއި ހަތިޔާރު ރައްކާކުރާ ގުދަނަކަށެވެ. އެ ދެ ތަނަށް ބޮން އެޅީ، މިއަދު ފަތިސްވަމުން އައި ވަގުތުގައި ގާޒާގެ ތެރެއިން އިޒްރޭލަށް ރޮކެޓްތަކެއް ފޮނުވައިލުމާ ގުޅިގެން އެކަމަށް ބަދަލު ހިފުމުގެ ގޮތުންނެވެ.

މިއަދު ފަތިހު އަލިވިލެމުން އައި ވަގުތު ގާޒާގެ ތެރެއިން އިޒްރޭލަށް ރޮކެޓްތަކެއް ފޮނުވައިލުމާ ގުޅިގެން އިޒްރޭލުގެ ސްދެރޯތު އާއި އަސްގަލާންގައި ވަނީ އިންޒާރުގެ ބަރުގޮނު ގޮއްވައިފަ އެވެ. އިޒްރޭލުން ބުނި ގޮތުގައި ގާޒާގެ ތެރެއިން ފޮނުވައިލި ހަ ރޮކެޓްގެ ތެރެއިން ފަސް ރޮކެޓް ވަނީ، އިޒްރޭލުގެ ވައިގެ ދިފާއީ ނިޒާމުން ހަމަލާދީ ގޮއްވާލައިފަ އެވެ. އަނެއް ރޮކެޓް ވެއްޓުނީ ފަޅު ސަރަހައްދަކަށެވެ.

ގާޒާގެ ތެރެއިން އިޒްރޭލަށް ރޮކެޓް ހަމަލާތަކެއް ދިނީ، އިޒްރޭލު ސިފައިން އިއްޔެ ހުޅަނގު އައްސޭރީގެ ނާބުލްސް އަށް ވަދެގަނެ ހިންގި އުދުވާނީ ހަމަލާތަކުގައި ފަލަސްތީނުގެ 11 މީހަކު ޝަހީދުކޮށްލުމާ ގުޅިގެން އެކަމަށް ބަދަލު ހިފުމުގެ ގޮތުންނެވެ. ހަމާސް ޖަމާއަތުން ބުނީ އިސްތިއުމާރީ ބާރުން ހުޅަނގު އައްސޭރީގައި ހިންގާ ޖަރީމާތައް ވަރަށް ގާތުން ބަލަމުން އަންނަ ކަމަށާއި، އެ ޖަމާއަތުގެ ކެތްތެރިކަން މިހާރު ކޮޅުންލާން ކައިރިވެއްޖެ ކަމަށެވެ.

އިޒްރޭލުން ދިން ބޮމުގެ ހަމަލާތަކުގައި އެއްވެސް މީހަކަށް ގެއްލުންވި ކަމަށް މިހާތަނަށް މައުލޫމާތެއް ނުލިބެ އެވެ. އަދި މި ހަމަލާތަކާ ގުޅޭ ގޮތުން، ގާޒާގައި ވެރިކަން ކުރާ ހަމާސް ޖަމާއަތުން ވެސް މިހާތަނަށް ވަކި އެއްޗެއް ނުބުނެ އެވެ.

އިޒްރޭލުގެ ހަރުކަށި އަދި އަނިޔާވެރި ބޮޑުވަޒީރު ބިންޔާމީން ނަތަންޔާހޫ އެކުލަވައިލެއްވި ހަ ވަނަ ސަރުކާރަށް އެއް މަސް ވެގެން ދިޔައިރު، ފަލަސްތީނު ރައްޔިތުންނާ ދެކޮޅަށް އިޒްރޭލުން ހިންގާ އުދުވާނުތައް ދަނީ އިތުރުވަމުން ފުޅާވަމުންނެވެ. އިޒްރޭލުގެ ރައްޔިތުން ވެސް އޭނާގެ ސަރުކާރާ ދެކޮޅަށް މުޒަހަރާތައް ކުރަމުން ދާއިރު، އެކަން ފޫބެއްދުމަށް ފަލަސްތީނުގައި ހިންގި އުދުވާނީ ހަރަކާތްތަކުގައި މިހާތަނަށް ފަލަސްތީނުގެ 30 މީހަކު ވަނީ ޝަހީދުވެފަ އެވެ.

މިދިޔަ މަހެއްހާ ދުވަހުގެ ތެރޭގައި ފަލަސްތީނު ރައްޔިތުންނާއި އިޒްރޭލުގެ ޔަހޫދީ ވަޒަންވެރިންނާ ދެމެދު ހިނގި ކުރިމަތިލުންތަކުގައި، އިޒްރޭލުގެ އަށް މީހަކު ވަނީ މަރުވެފަ އެވެ.