ޝާހިދު އެމެރިކާގެ ސެކްރެޓަރީ އޮފް ސްޓޭޓް ބްލިންކެން އާ ބައްދަލުކުރައްވައިފި

ފޮރިން މިނިސްޓަރު އަބްދުﷲ ޝާހިދު އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން އާ މިއަދު ބައްދަލުކުރައްވައިފި އެވެ.

އެމެރިކާގެ ވޮޝިންގްޓަންގައި ރާއްޖޭގެ އެމްބަސީއެއް ހުޅުވައި ދެއްވަން ޝާހިދު އެ ގައުމަށް ކުރައްވާ ދަތުރުގެ ތެރެއިން ބްލިންކެން އާ ބައްދަލުކުރައްވައި ދެ ގައުމުގެ ގުޅުން އިތުރަށް ބަދަހިކުރުމަށް ގިނަ ދާއިރާތަކަކުން މަޝްވަރާ ކުރެވުނު ކަމަށް ޝާހިދު ވިދާޅުވި އެވެ.

ބްލިންކެން އާ އެކު މަޝްވަރާކުރެވުނު ދާއިރާގެ ތަކުގެ ތެރޭގައި، އެމެރިކާގެ ޔުނިވާސިޓީތަކުން ދިވެހި ދަރިވަރުންނަށް މަތީ ތައުލީމުގެ އިތުރު ފުރުސަތުތައް ފަހިކޮށްދިނުމާއި، ދެގައުމުގެ މެދުގައި ވިސާ ލިބުމުގެ ފަސޭހަ ގޮތްތައް ހޯދައި ދިނުމުގެ އިތުރުން ދެގައުމުގެ ދެމެދު ވިޔަފާރީގެ ގުޅުން އިތުރަށް ހަރުދަނާ ކުރުން ހިމެނޭ ކަމަށް ޝާހިދު ކުރެއްވި ޓްވީޓެއްގައި ވިދާޅުވި އެވެ.

އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު މެތިއު މިލާ ނެރުއްވި ކުރު ބަޔާނެއްގައި ވިދާޅުވީ، އެ ބައްދަލުވުމުގައި ބްލިކެން ވަނީ ރާއްޖެއަކީ މި ސަރަހައްދުގައި ޑިމޮކްރަސީ ކުރިއަރުވައި ދެމެހެއްޓުމަށް އިސް ދައުރެއް އަދާ ކުރާ ގައުމެއްކަން ފާހަގަކުރައްވާފައި ކަމަށެވެ.

"ދެ ގައުމުގެ ގުޅުން ވަރުގަދަވަމުންދާ ކަން ފާހަގަކުރައްވައި، ސެކްރެޓަރީ ވަނީ ރާއްޖޭގެ އެމްބަސީ އެއް އަލުން ވޮޝިންގްޓަންގައި ހުޅުވުމާއި ރާއްޖޭގައި އެމެރިކާގެ އެމްބަސީ ހުޅުވަން ނިންމުމަކީ ދެ ގައުމުގެ މެދުގައި ބަދަހިވަމުންދާ ގުޅުމުގެ ހެއްކެއް ކަމަށް ވިދާޅުވެފައި،" އެ ބަޔާނުގައި މިލާ ވިދާޅުވި އެވެ.

އެމެރިކާގެ ވޮޝިންގްޓަން ގައި ރާއްޖޭގެ އެމްބަސީއެއް ހުޅުވަން ތައްޔާރުވެފައިވާއިރު، އެމެރިކާގެ އެމްބަސީއެއް ރާއްޖޭގައި ހުޅުވަން އަންނަނީ މަސައްކަތް ކުރަމުންނެވެ.