ކުދި ގައުމުތަކުގެ ހައްގުގައި ރާއްޖޭން ކުރާ ވަކާލާތަށް ގުޓެރޭސްގެ ތައުރީފު

ފޮރިން މިނިސްޓަރު މޫސާ ޒަމީރު އެމެރިކާގެ ނިއު ޔޯކަށް ކުރައްވަމުން ގެންދަވާ ދަތުރުގައި އދ.ގެ ސެކްރެޓަރީ ޖެނެރަލް އެންޓޯނިއޯ ގުޓެރޭސްއާ ބައްދަލުކުރައްވައިފި އެވެ.

ފޮރިން މިނިސްޓްރީން ނެރުނު ބަޔާނެއްގައި ބުނީ މި ބައްދަލުވުމުގައި ނިމުނު ކުދި ޖަޒީރާ ގައުމުތަކުގެ ހަތަރު ވަނަ ބައްދަލުވުމުގައި (ސިޑްސް4) ގައި އެއްބަސްވެވުނު ކަންތައްތައް ވީ އެންމެ އަވަހަކަށް ތަންފީޒުކުރުމާ ގުޅޭގޮތުން ދެ ބޭފުޅުން މަޝްވަރާ ކުރެއްވި ކަމަށެވެ.

އަދި ކުދި ގައުމުތަކުގެ ތަރައްގީގެ ލަނޑުދަނޑިތައް ހާސިލުކުރުމުގައި އދ. ގެ ފުރިހަމަ އެހީތެރިކަން ލިބޭނެކަމުގެ ޔަގީންކަން ގުޓެރޭސް ދެއްވި ކަމަށް މިނިސްޓްރީން ބުންޏެވެ.

މިނިސްޓްރީން ބުނި ގޮތުގައި، ގުޓެރޭސް ވަނީ މޫސުމީ ބަދަލުތަކުގެ އަސަރާ ދެކޮޅަށް ކްލައިމެޓް ފައިނޭންސިން ކުދި ޖަޒީރާ ގައުމުތަކަށް ހޯދައި ދިނުމަށް ބައިނަލްއަގުވާމީ މައިދާނުގައި ރާއްޖޭން އިސްވެ ކުރަމުންދާ ވަކާލާތު ފާހަގަކުރައްވައި، އެ މަސައްކަތަށް ތައުރީފު ކުރައްވައިފަ އެވެ.

ނިއު ޔޯކަށް ކުރައްވާ މި ދަތުރުގައި ޒަމީރު މިއަދު ވަނީ އދ.ގެ ބައެއް އިސްވެރިންނާއި ސަފީރުންގެ އިތުރުން އެ ސިޓީ އާއި ނިއު ޖާޒީގައި ދިރިއުޅޭ ދިވެހިންނާ ވެސް ބައްދަލުކުރައްވައިފަ އެވެ.

އަދި ރާއްޖޭގެ ޓޫރިޒަމް ފުޅާކުރުމާ ގުޅޭގޮތުން އެ ސިޓީގެ އިސް ޓުއާ އޮޕަރޭޓަރުންނާއި ޓްރެވަލް އެޑްވައިޒަރުންނާ މިނިސްޓަރު ވަނީ ބައްދަލުކުރައްވައި، އެ ކަމުގެ މަޝްވަރާތަކާއި މައުލޫމާތުތައް ކުރައްވައިފަ އެވެ.

މިދިޔަ ހޯމަ ދުވަހު އެމެރިކާ އަށް ފެއްޓެވި ދަތުރުގައި ޒަމީރު ފުރަތަމަ ވަޑައިގަތީ ވޮޝިންގްޓަނަށެވެ. ވޮޝިންގްޓަންގައި ޒަމީރު ވަނީ އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކަން އާއި ޔޫއެސްއެއިޑްގެ އެޑްމިނިސްޓްރޭޓަރު ސަމަންތާ ޕަވާ ގެ އިތުރުން އެމެރިކާ ސަރުކާރުގެ ބައެއް އިސް ވެރިންނާ ބައްދަލުކުރައްވައިފަ އެވެ.