އެފްއޭ ކަޕް ތައްޓާ އެކު ސިޓީ "ޓްރެބަލް" ކާމިޔާބުކުރުމާ ގާތަށް

ލަންޑަން (ޖޫން 3) - މެންޗެސްޓާ ސިޓީ އިން 2-1 އިން މެންޗެސްޓާ ޔުނައިޓެޑް ބަލިކޮށްގެން އެފްއޭ ކަޕް ކާމިޔާބުކޮށް، މި ސީޒަންގައި އެޓީމުން "ޓްރެބަލް"؛ ތިން ތަށި ހޯދަން ކުރާ އުންމީދު ދަމަހައްޓައިފި އެވެ.

ވެމްބްލީ ސްޓޭޑިއަމްގައި މިރޭ ކުޅުނު ފައިނަލް މެޗު ފަށައިގެން 13 ވަނަ ސިކުންތުގައި ސިޓީ އިން ވަނީ ލީޑު ނަގައިފަ އެވެ. އޭރިއާ ބޭރުން ފޮނުވާލި ހަމަލާއަކުން ސިޓީ އަށް ލީޑު ނެގި ގޯލު ޖަހައިދިނީ ކެޕްޓަން އިލްކާއި ގުންޑޮއާން އެވެ.

މިއީ އެފްއޭ ކަޕްގެ ތާރީހުގައި ވެސް ފައިނަލް މެޗެއްގައި ފެނުނު އެންމެ އަވަސް ގޯލެވެ. މީގެ ކުރިން އެންމެ އަވަސް ގޯލެއް ޖެހީ 2009 ވަނަ އަހަރުގެ ފައިނަލްގައި އެވަޓަން އަށް ކުޅުނު ލުއިސް ސަހާ އެވެ. އޭނާ ވަނީ ޗެލްސީއާ ދެކޮޅަށް ކުޅުނު ފައިނަލް މެޗުގެ 25 ވަނަ ސިކުންތުގައި ގޯލު ޖަހައިފަ އެވެ.

ޔުނައިޓެޑުން ފުރަތަމަ ހާފް ނިންމާލީ ނަތީޖާ އެއްވަރު ކޮށްގެންނެވެ. ޖެކް ގްރީލިޝް އަތުގައި ބޯޅަ ޖެހިގެން ލިބުނު ޕެނަލްޓީ، މެޗުގެ 33 ވަނަ މިނިޓުގައި ކާމިޔާބު ކޮށްދިނީ ބްރޫނޯ ފެނާންޑޭޒް އެވެ.

ސިޓީ އިން މެޗުގައި ދެވަނަ ފަހަރަށް ލީގު ނެގި ގޯލު ވެސް ޖަހައިިނީ ގުންޑޮއާން އެވެ. އޭނާ މި ގޯލު ޖެހީ 51 ވަނަ މިނިޓުގައި ކެވިން ޑިބްރޭނާ ހިލޭޖެހުމަކުން ފޮނުވާލި ބޯޅައެއް ގޯލަށް ފޮނުވާލައިގެންނެވެ.

ޔުނައިޓެޑުން އިތުރު ގޯލެއް ޖަހައި ނަތީޖާ އެއްވަރު ކުރަން ވެސް ގިނަ މަސައްކަތްތަކެއް ކުރި އެވެ. އެގޮތުން ސިޓީ އިން ދެވަނަ ގޯލު ޖެހި ފަހުން ކުޅެން އެރި އަލެހަންޑްރޯ ގާނާޗޯ ގިނަ ހަމަލާތަކެއް ފޮނުވާލި ނަމަވެސް ކާމިޔާބެއް ނުވި އެވެ.

މިއީ ސިޓީ އިން ކާމިޔާބު ކުރި ހަތްވަނަ އެފްއޭކަޕް ތަށްޓެވެ. ކޯޗު ޕެޕް ގާޑިއޯލާ އާއެކު އެޓީމުން އެންމެ ފަހުން މި މުބާރާތް ކާމިޔާބު ކުރީ 2019 ވަނަ އަހަރެވެ. އޭގެ ކުރިން ސިޓީ ވަނީ 1904، 1934، 1956، 1969 އަދި 2011 ވަނަ އަހަރުގެ އެފްއޭކަޕް ކާމިޔާބު ކޮށްފަ އެވެ.

ދެ އެފްއޭކަޕް ތަށީގެ އިތުރުން ގާޑިއޯލާ އާއެކު ސިޓީ އިން ވަނީ ދެ ކޮމިއުނިޓީ ޝީލްޑާއި ހަތަރު ލީގް ކަޕްގެ އިތުރުން ފަސް ފަހަރު ޕްރިމިއާ ލީގު ތަށި ވެސް އުފުލާލައިފަ އެވެ.

މި ސީޒަންގެ ޕްރިމިއާ ލީގުގައި ވެސް އެންމެ ފަހު ވަގުތު އާސެނަލް ފަހަތަށް ޖައްސާލައި ލީގު ތަށި ދިފާއު ކުރި ސިޓީ އަށް މި ސީޒަނުގައި އަދި އެއް ފައިނަލް އެބަ އޮތެވެ. އެއީ އަންނަ ހޮނިހިރު ދުވަހުގެ ރޭ އިޓަލީގެ އިންޓަ މިލާނާ ދެކޮޅަށް ކުޅޭ ޔޫއެފާ ޗެމްޕިއަންސް ލީގުގެ ފައިނަލެވެ.

މީގެ ކުރިން އެއް ސީޒަނެއްގައި މި ތިން މުބާރާތް ކާމިޔާބު ކުރި އިނގިރޭސިވިލާތުގެ ހަމައެކަނި ޓީމަކީ ޔުނައިޓެޑެވެ. އެޓީމުން ވަނީ 1998/1999 ސީޒަންގައި ލެޖެންޑަރީ ކޯޗު ސާ އެލެކްސް ފާގަސަންގެ އިރުޝާދުގެ ދަށުން އިނގިރޭސި ލީގާއި އެފްއޭ ކަޕް އަދި ޗެމްޕިއަންސް ލީގު ކާމިޔާބު ކޮށްފަ އެވެ.