މާފަރު އެއާޕޯޓުގައި އެކްސްކަވޭޓަރެއް ފުރޮޅާލައި މީހަކު މަރުވެއްޖެ

ނ. މާފަރު އިންޓަނޭޝަނަލް އެއާޕޯޓުގެ ރަންވޭގެ މަސައްކަތުގައި ބޭނުންކުރި އެކްސްކަވޭޓަރެއް ފުރޮޅާލައި މިއަދު ބިދޭސީއަކު މަރުވެއްޖެ އެވެ.

ފުލުހުންގެ މީޑިއާ އޮފިޝަލަކު ވިދާޅުވީ އެ އެއާޕޯޓުގެ ރަންވޭގެ މަސައްކަތުގައި ބޭނުންކުރާ އެކްސްކަވޭޓަރެއް ފުރޮޅާލައި އަނިޔާވި މީހަކު އެ ރަށު ހެލްތު ސެންޓަރަށް ގެންދިޔައިރު ވެސް މަރުވެފައިވާ ކަމުގެ ރިޕޯޓެއް މިއަދުގެ ހެނދުނު 9:30 ހާއިރު ލިބިފައިވާ ކަމަށެވެ.

އެ ހާދިސާގައި މަރުވީ އެކްސްކަވޭޓަރު ދުއްވި އިންޑިއާގެ ޑްރައިވަރެވެ. މާފަރު ކައުންސިލުން ބުނީ 35 އަހަރުގެ ފިރިހެން މީހާ މަރުވީ ރަންވޭ ކައިރިން ހިއްކުމުގެ މަސައްކަތް ކުރަމުން ދަނިކޮށް ކަމަށެވެ.

ސަރުކާރުން ވަނީ މާފަރު އެއާޕޯޓުގެ ރަންވޭ ބޮޑުކުރުމުގެ މަސައްކަތް މިދިޔަ ޑިސެމްބަރު މަހު އެމްޓީސީސީއާ ހަވާލުކޮށްފަ އެވެ.

އެ ހާދިސާއާ ގުޅިގެން އިތުރަށް ބަލަންޖެހޭ ކަންކަން ފުލުހުން އަންނަނީ ބަލަމުންނެވެ.