ޑްރަގާ ދެކޮޅަށް ނައިފަރުގައި ހާއްސަ އޮޕަރޭޝަނެއް، ކޯޓުން ނިންމީ ތުހުމަތުވާ މީހުން ދޫކޮށްލަން

ޅ. ނައިފަރުގައި މަސްތުވާތަކެތީގެ މައްސަލަ ބޮޑުވެ އެކަމުގައި އިސްކޮށް އުޅޭ ކަމަށް ތުހުމަތުކުރެވޭ މީހުން އުޅޭ ތަންތަން ފާސްކޮށް މަސްތުވާތަކެއްޗާ އެކު ހައްޔަރުކުރުމުން ވެސް އެ ރަށު މެޖިސްޓްރޭޓް ކޯޓުން އެ އެންމެން ވެސް އިއްޔެ ދޫކޮށްލައިފި އެވެ.

ނައިފަރުގައި މި އޮޕަރޭޝަން ހިންގީ އެކި އުމުރުގެ މީހުންނަށް މަސްތުވާތަކެތި ދީ އެކަމުގެ ތެރެއަށް ވެއްދުމުގެ މައްސަަލަ ބޮޑުވެގެން ފުލުހުންނަށް އެ މައްސަލަ ހުށަހެޅުމުން ޑްރަގް އެންފޯސްމަންޓްގެ ޓީމެއް އެ ރަށަށް ގޮސްގެންނެވެ.

މި އޮޕަރޭޝަންގައި ހަ މީހަކު ހައްޔަރުކުރި އެވެ. އެ މީހުން ދިރިއުޅޭ ތަންތަނުން މަސްތުވާތަކެތި ފެނުނު ކަމަށާއި އޭގެތެރެއިން ފަސް މީހަކު މަސްތުވާތަކެއްޗަށް ޕޮޒިޓިވްވި ކަމަށް ވެސް ވަނީ އެނގިފަ އެވެ. އެކަމަކު އެ އެންމެން ވެސް ކޯޓުން ދޫކޮށްލީ އެވެ. މައިގަނޑު ސަބަބެއް ކަމަށް ދެއްކީ މީހުން ހައްޔަރުކުރި އިރު ސީދާ އެ މީހުންގެ އަތުގައި މަސްތުވާތަކެތި ނެތުމެވެ.

އުމުރުން ވަރަށް ހަގު ކުދިން ވެސް ހިމެނޭ ގޮތުން މަސްތުވާތަކެތީގެ ތެރެއަށް ވަންނަ މައްސަލަ ވެސް ބޮޑުވެގެން ހާއްސަ އޮޕަރޭޝަނެއް ހިންގާ ހިސާބަށް ދިޔަ ނަމަވެސް ރަށު ކައުންސިލުން މިކަމާ ބެހޭ ގޮތުން ވާހަކައެއް ނުދެއްކި އެވެ.

އެކަމަކު އެނގިފައިވާ ގޮތުގައި ރަށުގެ ބައެއް މުއައްސަސާތަކުން ވެސް ވަނީ މި މައްސަލާގައި ކަންބޮޑުވުން ފާޅުކޮށް ފިޔަވަޅު އަޅައިދިނުމަށް އިދާރާތަކުގައި އެދިފަ އެވެ.