މޯދީގެ ބީޖޭޕީ ފަހަތަށް ޖައްސާލުމަށް ފަހު ކަރުނާޓާގެ އިންތިހާބު ކޮންގްރެސް އަށް

ބެންގަލޫރު (މެއި 13) - އިންޑިއާގެ ބޮޑުވަޒީރު ނަރެންދުރަ މޯދީގެ ބީޖޭޕީގެ ބޮޑު އަޣުލަބިއްޔަތެއް ކުރިން އޮތް ކަރްނާޓަކާ ސްޓޭޓްގެ އިންތިހާބު އިދިކޮޅު ކޮންގްރެސް ޕާޓީން ކާމިޔާބު ކޮށްފި އެވެ.

އިންޑިއާގެ ކޮންމެ ސްޓޭޓަކީ ވަކި މަޖިލީހެއް އޮންނަ ސްޓޭޓެކެވެ. ކަރްނާޓާކާ ސްޓޭޓްގެ މަޖިލީހަށް 224 މެންބަރުން އިންތިހާބު ކުރަން ޖެހެ އެވެ. މިހާތަނަށް ގުނައި ނިމުނު ވޯޓުތަކަށް ބަލާއިރު، ކޮންގްރެސް އިން ވަނީ އެ ސްޓޭޓްގެ 136 ގޮނޑި ކާމިޔާބު ކޮށްފަ އެވެ. ބީޖޭޕީ އަށް އަދި ކާމިޔާބުވީ 65 ގޮނޑި އެވެ.

އިންޑިއާގެ ސިޔާސީ މަސްރަހު ދިރާސާ ކުރާ ފަރާތްތަކުން ބުނާ ގޮތުގައި، ކަރުނާޓަކާގެ އިންތިހާބު ބީޖޭޕީ އަށް ގެއްލުމަކީ އަންނަ އަހަރުގެ މާޗް މަހު ބާއްވާ މަޖިލިސް އިންތިހާބަށް ދާއިރު އެ ޕާޓީ އަށް ކުރިމަތި ވާނެ ގޮންޖެހުމެކެވެ.

ކޮންގްރެސް ޕާޓީގެ ލީޑަރު ރާހުލް ގާންދީ އަށް މާޗު މަހު، މަޖިލީހުގެ ގޮނޑި ގެއްލުނު ފަހުން އިންޑިއާގެ ބޮޑު ސިޓީއެއްގެ އިންތިހާބު އޭނާގެ ޕާޓީ އަށް ކާމިޔާބު ވުމަކީ ކޮންގްރެސް ޕާޓީގެ މަގުބޫލުކަން އިތުރުވެފައިވާ ކަމުގެ ހެއްކެއް ކަމަށް ވެސް ސިޔާސީ ތަޖުރިބާކާރުން ބުނެ އެވެ.

ބީޖޭޕީން އިންޑިއާގެ ވެރިކަމަށް އައި ފަހުން، އެ ގައުމުގެ މައިނޯރިޓީ ދީންތަކުގެ މީހުންނާ ދެކޮޅަށް ހިންގަމުންދާ ހަރަކާތްތައް މިދިޔަ އަހަރު ކަރްނާޓަކާގައި ވެސް ފެތުރުނެވެ. އެ ސްޓޭޓްގެ ބައެއް ސަރަހައްދުތަކުގައި ބުރުގާ އެޅި މުސްލިމް އަންހެން ދަރިވަރުންނަށް ޔުނިވަސިޓީ އާއި ކޮލެޖްތަކުގެ ދޮރު ބަންދު ކުރި އެވެ.

އިންތިހާބާ ދިމާކޮށް އެންމެ ގިނަ ކެމްޕޭން ރެލީތައް ކަރްނާޓަކާގައި ކުރިއަށް ގެންދިޔައީ 2018 އިން ފެށިގެން އެ ސްޓޭޓްގެ ވެރިކަން ކުރަމުން އައި ބީޖޭޕީ އެވެ. ބޮޑުވަޒީރުގެ މޯދީގެ ފޮޓޯ އާއި ޝިއާރުތައް ރެލީތަކުގައި ބޭނުން ކުރިޔަސް، އެ ޕާޓީގެ ސްޓޭޓް ފެންވަރުގެ ސިޔާސީ ލީޑަރުންގެ ކޮރަޕްޝަން ބޮޑެވެ. އިންތިހާބު ބީޖޭޕީ އަށް ނާކާމިޔާބު ވުމުގެ އެންމެ ބޮޑު ސަބަބަކީ ސްޓޭޓް ފެންވަރުގައި އޮތް ކޮރަޕްޝަނެވެ. އާ ވަޒީފާތައް އުފެއްދުމުގައި ކާމިޔާބު ހޯދިފައި ނެތުމަކީ ވެސް އެ ސްޓޭޓްގެ އިންތިހާބު ބީޖޭޕީ އަށް ނާކާމިޔާބު ވާން ދިމާވި ސަބަބެކެވެ.