ފިލައިގެން އުޅުނު މީހާ ފެނުނީ ފަޅުތެރޭގައި އޮއްވައި

އއ. ރަސްދޫ ޕޮލިސް ސްޓޭޝަންގައި ބަންދުކޮށްފައި ހުއްޓާ ރޭ ފިލި މީހާ މިހާރު ފެނިފައިވާ ކަމަށާއި އޭނާ ފެނުނީ ރަސްދޫ ކައިރީގައި އޮންނަ ރަށެއްގެ ފަޅުތެރެއިން ކަމަށް ފުލުހުން ދެންމެ ބުނެފި އެވެ.

އއ. ހިމަންދޫ ދަބުގޭ ހުސައިން ޝަހުބާން ފެނުނީ މިރޭ 6:35 ހާއިރު ކަމަށް ފުލުހުން ބުންޏެވެ.

"އޭނާގެ ހާލު ރަނގަޅު އަދި މިހާރު ހުރީ ފުލުހުންގެ ބެލުމުގެ ދަށުގައި،" ފުލުހުންގެ މީޑިއާ ގުރޫޕަށް ފޮނުވި މެސެޖެއްގައި ފުލުހުންގެ މީޑިއާ އޮފިޝަލް ވިދާޅުވި އެވެ.

"ހުސައިން ޝަހްބާންއާ ގުޅޭ މައުލޫމާތު ހިއްސާ ކުރުމަށް އެދި ސޯޝަލް މީޑިއާގައި ކުރި ޕޯސްޓް ޝެއާ ކޮށްދެއްވި އެންމެހައި ފަރާތްތަކަށް ޝުކުރު ދަންވަން."

މަސްތުވާތަކެތީގެ މައްސަލައެއްގެ ތުހުމަތުގައި ޝަރީއަތް ނިމެންދެން ބަންދުކުރަން އަމުރު ކޮށްފައިވާތީ ރަސްދޫ ޕޮލިސް ސްޓޭޝަންގެ ބަންދުގައި ހުރި ޝަހުބާން ފިލީ އެ ސްޓޭޝަންގެ ގޯތިތެރެ އަށް ނެރެފައި ހުއްޓާ ކަމަށް ފުލުހުން ބުންޏެވެ.

ފެޖަލުތަކާއި ޕެރޯލްގެ ގާނޫނު ބުނާގޮތުން ޝަރީއަތް ނިމެންދެން ބަންދުކުރާ މީހުން ބަންދުގައި ބައިތިއްބަން ޖެހެނީ ކަރެކްޝަންސްގެ ބެލުމުގެ ދަށުން ހިންގާ ރިމާންޑް ޖަލުތަކުގަ އެވެ. އެކަމަކު އަތޮޅު ތެރޭގައި ކަރެކްޝަންސްގެ ޖަލުތައް ނުހުންނާތީ ގިނަ މީހުން ބައިތިއްބަނީ ޕޮލިސް ސްޓޭޝަންތަކުގަ އެވެ.