މަސްތުވާތަކެއްޗާ އެކު ނޮޅިވަރަމް ސްކޫލްގެ އިސްލާމް ޓީޗަރު ހައްޔަރުކޮށްފި

މަސްތުވާތަކެއްޗާ އެކު ހދ. ނޮޅިވަރަމް ސްކޫލްގެ އިސްލާމް ޓީޗަރު އިއްޔެ ހައްޔަރުކޮށްފި އެވެ.

އެ ރަށު ކައުންސިލްގެ ރައީސް ޔޫސުފް މޫސާ ވިދާޅުވި ގޮތުގައި ސްކޫލްގެ ޓީޗަރު ނާއިޒް އިބްރާހިމް މަސްތުވާތަކެއްޗާ އެކު ހައްޔަރު ކުރީ ކުޅުދުއްފުށިން އައިތަނުން ނޮޅިވަރަމްގެ ބަނދަރުމަތިންނެވެ.

އޭނާ ވިދާޅުވީ ނާއިޒް އަކީ ސްކޫލްގެ ގަޑިތަކަށް ވެސް ފަރުވާ ކުޑަ މީހެއް ކަމަށެވެ. ދަރިވަރުންނަށް ނަގައިދޭން ޖެހޭ ފިލާވަޅުތައް ނަގަން ސްކޫލަށް ހާޒިރުނުވާ މައްސަލަ ބެލެނިވެރިން މީގެ ކުރިން ވެސް ސޫކޫލަށާއި ކައުންސިލާ ހަމައަށް ވެސް ގެނެސްފައިވާ ކަމަށެވެ.

"އޭނާ އާ ބެހޭގޮތުން ބައިވަރު ޝަކުވާތައް ސްކޫލަށް ވެސް އޮތީ ހުށަހަޅާފަ އެކަމަކު މިހާތަނަށް އެއް ވެސް ފިޔަވަޅެއް އަޅާފައެއް ނުވޭ. އެންމެ ފަހުން އިއްޔެ މަސްތުވާތަކެއްޗާ އެކު ހައްުުޔަރު ކުރީ،" ޔޫސުފް ވިދާޅުވި އެވެ.

އެ ރަށުން ވާހަކަ ދެއްކި އެހެން މީހަކު ބުނީ މަސްތުވާތަކެތި ވިއްކުމުގައި ނާއިޒު އުޅޭ ކަމުގެ އަޑުތައް އެ ރަށުގެ ތެރޭގައި ކުރިން ވެސް ދައްކަމުން އަންނަ ކަމަށެވެ.

ފުލުހުން އަންނަނީ މައްސަލަ ތަހުގީގު ކުރަމުންނެވެ.