ޑްރަގާއެކު ހައްޔަރުކުރި ނޮޅިވަރަމް ޓީޗަރު ވަޒީފާއަށް ނުކުތުމުން ސަސްޕެންޑްކޮށްފި

މަސްތުވާތަކެއްޗާ އެކު ހައްޔަރުކުރި ހދ. ނޮޅިވަރަމް ސްކޫލްގެ ޓީޗަރު ވަޒީފާއަށް ނުކުތުމާ އެކު އެ ރަށުގެ ބެލެނިވެރިން ކަންބޮޑުވުން ފާޅުކުރުމުން އޭނާ ސަސްޕެންޑްކޮށްފި އެވެ.

އެ ސްކޫލުގައި އިސްލާމް ޓީޗަރެއްގެ ގޮތުގައި މަސައްކަތް ކުރާ ނާއިޒް އިބްރާހިމް މަސްތުވާތަކެއްޗާ އެކު ހައްޔަރު ކުރީ ކުޅުދުއްފުށިން އައިތަނުން ނޮޅިވަރަމްގެ ބަނދަރުމަތިން މި މަހުގެ ފުރަތަމަ ދުވަހު އެވެ.

އެޑިޔުކޭޝަން މިނިސްޓްރީން އޭރު އޭނާ ސަސްޕެންޑް ވެސް ކުރި އެވެ.

ނޮޅިވަރަމް ސްކޫލުގެ ޕްރިންސިޕަލް އަދުނާން އަލީ މިރޭ "މިހާރު" އަށް ވިދާޅުވީ މިނިސްޓްރީން އޭނާ ސަސްޕެންޑް ކުރި މުއްދަތު ހަމަވުމުން އިއްޔެ ކިޔަވައިދޭން ނުކުތް ކަމަށެވެ.

އެކަމާ ސްކޫލުގެ ބެލެނިވެރިން ކަންބޮޑުވުން ފާޅުކޮށް އިހުތިޖާޖު ކުރުމުން އަނެއްކާވެސް އޭނާ ސަސްޕެންޑް ކޮށްފައިވާ ކަމަށް އަދުނާން ވިދާޅުވި އެވެ.

"މިނިސްޓްރީން ބުނެފައި އިނީ ވަކި ގޮތެއް އަންގަންދެން ގޭގަ މަޑުކޮށްލަން. މުއްދަތެއް ނުދޭ،" އޭނާ ވިދާޅުވި އެވެ.

އެ ރަށުން ވާހަކަ ދެއްކި ބައެއް މީހުން ބުނާ ގޮތުން މަސްތުވާތަކެތި ވިއްކުމުގައި ނާއިޒު އުޅޭ ކަމުގެ އަޑުތައް އެ ރަށުގެ ތެރޭގައި ކުރިން ވެސް އިވެ އެވެ.

ނާއިޒް އަކީ ސްކޫލްގެ ގަޑިތަކަށް ވެސް ފަރުވާ ކުޑަ މީހެއް ކަމަށާއި ދަރިވަރުންނަށް ނަގައިދޭން ޖެހޭ ފިލާވަޅުތައް ނަގަން ސްކޫލަށް ހާޒިރުނުވާ މައްސަލަ ބެލެނިވެރިން މީގެ ކުރިން ވެސް ސޫކޫލަށާއި ކައުންސިލާ ހަމައަށް ވެސް ގެނެސްފައިވާ ކަމަށް ކައުންސިލުން ވެސް ވަނީ ބުނެފަ އެވެ.