މިއަންމާގެ އާ އަހަރާ ގުޅިގެން 3،000 ގައިދީންނަށް މައާފް ދެނީ

މިއަންމާގެ އާ އަހަރުގެ މުނާސަބަތުގައި 3،000 އަށް ވުރެ ގިނަ ގައިދީންނަށް މައާފް ދޭން އެ ގައުމުގެ އަސްކަރީ ސަރުކާރުން ނިންމައިފި އެވެ.

މިއަންމާގެ ކުރީގެ ލީޑަރު އަން ސަންގް ސޫކީއާ ދެކޮޅަށް 2021 ވަނަ އަހަރު ގެނައި އަސްކަރީ ބަޣާވާތާ ދެކޮޅަށް ނިކުތް އެތައް ހާސް ބަޔަކު މަރާލައި އަދި އެތައް ހާސް ބަޔަކު އަސްކަރިއްޔާއިން ހައްޔަރު ވެސް ކުރި އެވެ.

އަސްކަރީ ސަރުކާރުގެ އިސްވެރިން ބުނިގޮތުގައި މިއަންމާގެ އާ އަހަރުގެ މުނާސަބަތުގައި މައާފްދީ ދޫކޮށްލަން ނިންމި 3،000 އަށް ވުރެ ގިނަ މީހުންގެ ތެރޭގައި 98 ބިދޭސީއަކު ވެސް ހިމެނެ އެވެ. އެހެން ނަމަވެސް އޭގެ އިތުރު ތަފްސީލެއް އަސްކަރިއްޔާއިން ހާމައެެއް ނުކުރެ އެވެ.

އެހެން ނަމަވެސް މިއީ އަސްކަރީ ބަޣާވާތުގެ ކުރިން އެކި މުނާސަބަތުތަކުގައި މިއަންމާގައި ގައިދީން މިނިވަން ކުރާ މިންވަރަށް ވުރެ މަދު އަދަދެކެވެ. ކުރިން ބައެއް މުނާސަބަތުތަކުގައި 23،000 އަށް ވުރެ ގިނަ ގައިދީން މިނިވަން ކޮށްފައިވެ އެވެ.

މިއަންމާގައި ތިބި ސިޔާސީ ހުރިހާ ކުށްވެރިން މިނިވަން ކުރަމުން އެކި ގައުމުތަކުން ގޮވާލަމުން ދިޔަޔަސް، އިދިކޮޅު ލީޑަރު ސޫކީ އަދިވެސް ހުންނެވީ ބަންދުގަ އެވެ. އޭނާގެ މައްޗަށް އެތައް އަހަރެއްގެ ޖަލު ހުކުމްތައް އިއްވާފައިވާއިރު، އިތުރު ދައުވާތައް ވެސް ދަނީ ކުރަމުންނެވެ.