ކުންފުނިން މާފަށް އެދި ވިސާގެ ފައިސާ އަނބުރާ ދީފި

ސަފާ ހައްޖު އެންޑް އުމްރާ ގްރޫޕްގެ ހަވާލުގައި މި އަހަރު އުމްރާ އަށް ދާ 181 މީހުންގެ ވިސާގެ ކަންތައްތަކުގައި ލަނޑުދިން ސައޫދީ އަރަބިއްޔާގެ ކުންފުނިން ވިސާގެ ފައިސާ މިއަދު އަނބުރާ ދީފައިވާ ކަމަށް އެ ގުރޫޕުން ބުނެފި އެވެ.

މީގެ 18 އަހަރު ކުރިން ފެށިގެން ހައްޖާއި އުމްރާ އަށް މީހުން ގެންދާ ސަފާ ގުރޫޕްގެ ވެރިޔާ އަބްދުﷲ ނަސީމް "މިހާރު" އަށް ވިދާޅުވިގޮތުގައި ކޮންމެ މީހެއްގެ ވިސާ އަށް 220 ޑޮލަރު ސައޫދީގެ އުސޫލުލް ބައިތު ކުންފުންޏަށް ދެއްކި އެވެ. އެއީ 614،00ރ. އެވެ.

"ބާކީ ފައިސާ މިއަދު ދެންމެ އަޅުގަނޑުމެންނަށް ޖަމާކޮށްދީފި. އެ ކުންފުނިން އަނގަބަހުން މާފަށް ވެސް އެދިއްޖެ މިހާރު. އަޅުގަނޑު ދެންނެވިން ލިޔުމުން ވެސް މާފަށް އެދެން ވާނެއޭ. އެ މީހުން ބުނަނީ ތިމަންނަމެން ގަސްދުގައި ކުރި ކަމެއް ނޫނޭ. ސިސްޓަމަށް އެރާއެެއް އަރައިގެން ދިމާވި ކަމެކޭ،" ނަސީމް ވިދާޅުވި އެވެ.

"އެ މީހުން ބުނާނީ އެ ކަހަލަ ގޮތަކަށް ނޫންތޯ. ދެން މިއީ ﷲ މި ފަހަރު މިންވަރު ކުރެއްވި ގޮތް ބަލައިގެން އަޅުގަނޑު ދާނީ ކުރިއަށް. އަޅުގަނޑު ދެންނެވިން ކިހާ ބޮޑު ދެރައެއްހޭ އަޅުގަނޑަށް މި ލިބުނީ. ފްލައިޓެއް ޗާޓަރުކޮށް، ވިސާ އަށް އިތުރަށް ފައިސާ ދައްކަން ޖެހުނީއޭ."

ނަސީމް ތުހުމަތު ކުރައްވާ ގޮތުގައި ވިސާ ހަމަނުޖެހި، ބޮޑު ކަންތައްގަނޑަކާ ކުރިމަތިލާން ޖެހުނީ ސައޫދީ ކުންފުންޏާ ގުޅިގެން ދިވެހިންގެ ބަޔަކު ދިން "ލަނޑެއްގެ" ސަބަބުންނެވެ.

"ފުރަތަމަ ވެސް ތިމަންނަމެންނަށް މި ކަން ނުކޮށްދެވޭނެއޭ ބުނި ނަމަ އެހެން ބަޔަކު ލައްވާ ވެސް ވަގުތު އޮއްވައި މިކަން ކުރެވުނީސް. ދެ ދުވަހާއި އެ ރޭގެ ހަތަރުދަން ދިޔައީ [ވިސާ] މި ނިންމައިދެނީއޭ، ހަމަޖެހެނީއޭ، އެބަ ލިބެއޭ ކިޔަމުން. އަޅުގަނޑު ބުނަމުން ދިޔައިން ކަލޭމެންނަށް އަޅުގަނޑުމެން ދިން ފައިސާ ނުލިބުނު ކަމަށް ވިޔަސް ތި ކެންސަލް ކުރާށޭ. ބުނާއިރަށް ބުނޭ، ވިސާ ސިސްޓަމްގައި އެބަހުއްޓޭ. ފޮނުވައިދެނީއޭ،" ނަސީމް ވިދާޅުވި އެވެ.

"އެ ކަހަލަ ދޮގާއި މަކަރުތަކެއް ހަދައިގެން ހިފަހައްޓަމުން ދިޔައީ. މާދަމާ ފުރާ ކަމަށް ވަންޏާ އެ ރޭގެ ދަންވަރު ދެގަޑި ބަޔާއި ތިން ގަޑި ބައިގައި ވެސް އަޅުގަނޑު ގުޅަމުން ދަނިކޮށް އެންމެ ފަހު ވަގުތު ބުނީ ވަރަށް ބޮޑަށް ސޮރީއޭ، ސިސްޓަމް އެއްކޮށް ފެއިލް ވެއްޖެއޭ. ދެން ނެތް އެހެން މީހަކާ ގުޅައިގެން ވިސާ ހަމަޖައްސާނެ ވަގުތެއް ވެސް."

ނަސީމް ވިދާޅުވީ، ސިސްޓަމަށް އެރާ އެރިކަން 6-8 ގަޑިއިރު ކުރިން އެންގި ނަމަވެސް ވިސާ ހޯދަށް މަސައްކަތް ކުރެވުނީހެވެ.

އުސޫލުލް ބައިތު މެދުވެރިކޮށް ވިސާ ނުލިބުނުކަން އެންމެ ފަހު ވަގުތު އެނގުމުން އެހެން ކުންފުނިތަކުގެ އެހީތެރިކަން ހޯދަން ވެސް މަސައްކަތް ކުރެއްވި ކަމަށް ނަސީމް ވިދާޅުވި އެވެ. ނަމަވެސް އެ ތިން ކުންޏަށް ވެސް ވިސާގެ ކަންކަން ހަމަޖައްސަން ހަ ގަޑިއިރު ބޭނުންވާނެ ކަމަށް އެންގި އެވެ.

"އޭރު އެއާޕޯޓަށް މީހުން ދާން ތައްޔާރު ވާނީ. ދެން ކިހިނެއްތޯ ހަ ގަޑިއިރުގެ ތެރޭގައި ވިސާ ހޯދާނީ،" ނަސީމް ވިދާޅުވި އެވެ.

ސަފާ ގުރޫޕްގެ ހަވާލުގައި ހައްޖަށް ދާ މީހުން އުމްރާ އަށް ފުރަން މިހާރު ކަނޑައަޅާފައި ވަނީ އަންނަ އަންގާރަ ދުވަހު އެވެ. ފްލައިޓެއް ޗާޓަރު ކޮށްފައިވާ ކަމަށާއި ދެން އިތުރަށް އެއްވެސް މައްސަލައެއް ދިމާނުވާނެ ކަމަށް ނަސީމް ވިދާޅުވި އެވެ.

އެ ހުރިހާ ތަފުސީލެއް ވެސް އިސްލާމިކް މިނިސްޓްރީއާ ވެސް ހިއްސާކުރި ކަމަށް އޭނާ ވިދާޅުވި އެވެ.

ސަލާމް އެއާ" ޗާޓަރު ކުރުމައި ވިސާގެ ކަންކަން އަލުން ހަމަޖައްސަން 3.35 މިލިއަން ރުފިޔާ ހަރަދު ކުރަން ޖެހުނު ކަމަށް ނަސީމް ވިދާޅުވި އެވެ. އެ ފައިސާ ހަމަޖެއްސީ އޭނާ ވިދާޅުވިގޮތުގައި ސަފާ ގުރޫޕުގެ އިތުރުން އާއިލާގެ ބައެއް މީހުންގެ އަތުން ނަގައިގެންނެވެ.