އިހަވަންދޫގެ މަގުތައް ހަދަން 102 މިލިއަން ރުފިޔާއަށް އާރުޑީސީއާ ހަވާލުކޮށްފި

ތާރު އަޅައިގެން ހއ. އިހަވަންދޫގެ މަގުތައް ހެދުމަށް 102 މިލިއަން ރުފިޔާއަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާ މިއަދު ހަވާލުކޮށްފި އެވެ.

ޕްލޭނިން މިނިސްޓްރީން ބުނީ މިއަދު މެންދުރުފަހު ބޭއްވި ރަސްމިއްޔާތެއްގައި އެކަމުގެ އެއްބަސްވުމުގައި ސޮއިކޮށްފައިވާ ކަމަށެވެ. އެ މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ޑިރެކްޓަރު ޖެނެރަލް ފާތިމަތު ޝާނާ ފާރޫގެވެ. އަދި އާރުޑީސީގެ ފަރާތުން ސޮއިކުރެއްވީ އެ ކުންފުނީގެ ސީއެފްއޯ ޔާސިރު ހަސަނެވެ.

މި މަޝްރޫއަށް ދައުލަތުގެ ބަޖެޓުން ޖުމްލަ 102،846،733.89 ރުފިޔާ ހަރަދުވާނެ ކަމަށް މިނިސްޓްރީން ބުންޏެވެ.

މަޝްރޫއުގެ ތަފުސީލު

• 6.9 ކިލޯމީޓަރުގެ މަގުގައި ތާރުއެޅުން.

• މަގުތަކުގައި ފެން ހިންދާ ނިޒާމް ހެދުން.

• މަގުތަކުގައި މަގުބައްތި ޖެހުން.

• މަސައްކަތް ނިންމަން ދިނީ ދޮޅު އަހަރު.

ޕްލޭނިން މިނިސްޓްރީން ވަނީ މިދިޔަ މަހު ނ. މަނަދޫގެ މަގުތައް ހެދުމަށް ވެސް 75 މިލިއަނަށް އާރުޑީސީއާ ހަވާލުކޮށްފަ އެވެ.

އާރުޑީސީން އަންނަނީ މާލޭގެ އަމީނީ މަގު ހެދުމުގެ މަސައްކަތް ވެސް ކުރަމުންނެވެ. އެ ކުންފުންޏަށް މިހާރު ވެސް ވަރަށް ގިނަ ރަށްރަށުގެ މަގު ހެދުމުގެ މަޝްރޫއުތައް ހަވާލުކޮށްފައިވެ އެވެ. ނަމަވެސް، އެ މަޝްރޫއުތައް ހަވާލުކުރި މުއްދަތު ފަހަނައަޅައި ގޮސްފައިވާއިރު އަދިވެސް އެއްވެސް ރަށެއްގައި މަގު ހެދުމުގެ މަސައްކަތް ނުނިމެ އެވެ.