އަޕްޝިފްޓް ޕްރޮގްރާމުން ހުނަރުވެރި ދަރިވަރުން އުފެދޭނެ: އެޑިއުކޭޝަން

ދަރިވަރުންގެ ގާބިލްކަން އިތުރުކުރަން ފަށާފައިވާ ބައިނަލްއަގުވާމީ ބޮޑު ޕްރޮގްރާމް، "އަޕްޝިފްޓް" ގެ ސަބަބުން ހުނަރުވެރި ދަރިން އުފެދިގެންދާނެ ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.

ޔުނިސެފުން އިސްނަގައިގެން ފެށި މި ޕްރޮގްރާމުގައި ބައިވެރިވާނީ ގްރޭޑު 7 އަދި 8 ގެ ދަރިވަރުންނެވެ. ދުނިޔޭގެ 45 ގައުމުގައި މިހާރު ވެސް ކުރިއަށްގެންދާ އެ މަސައްކަތް ރާއްޖޭގައި ޕައިލެޓު ކުރަން ހަމަޖައްސާފައިވަނީ 48 ސްކޫލަކުން 3،000 އަށްވުރެ ގިނަ ދަރިވަރުންނާއެކުގަ އެވެ.

ބާކީ ހުރި ސްކޫލުތައް އަޕްޝިފްޓް ޕްރޮގްރާމުގައި ފަހުން ބައިވެރިވާނެ އެވެ.

ނޭޝަނަލް އިންސްޓިޓިއުޓު އޮފް އެޑިއުކޭޝަން (އެންއީއައި) ގެ ކަރިކިއުލަމް ޑިވެލޮޕްމަންޓް އެނަލިސްޓް، އަޝްރަފް އަބްދުއްރަހީމް "މިހާރު" ވިދާޅުވީ 12 ހަފުތާއަށް ކުރިއަށްގެންދާ ޕްރޮގްރާމަށް ހާއްސަ ކަރިކިއުލަމެއް އޮންނަ ކަމަށެވެ.

އޭގެ ފިލާވަޅުތައް ކިޔަވައިދޭނީ ބްލެންޑެޑް މޯޑުގަ އެވެ. އޮންލައިންގެ ބައިތައް ނަގައިދޭނީ އެކަމަށް ހާއްސަކޮށް ފަރުމާކޮށްފައިވާ "ޔުނިސޯލްވް" އޮންލައިން ޕްލެޓްފޯމުންނެވެ.

އެގޮތުން، ކުދިން އަމިއްލަ ވަގުތުގައި ގޭގައި އޮންލައިންކޮށް ވީޑިއޯ ބަލައި، އެ މައުލޫމާތުގެ އަލީގައި ކޮންމެ ހަފުތާއަކު ޓީޗަރުންނާއެކު 60 މިނެޓުގެ ދެ ގަޑި ކްލާހުގައި ހޭދަކުރަންޖެހޭނެ އެވެ. އެ ވީޑިއޯގައި ދެއްކި ކަންކަމާ މެދު މަޝްވަރާކުރުމުގެ އިތުރުން ވޯކްޝީޓާއި ކުއިޒް ހެދުން އެ ވަގުތުތަކުގައި އޮންނާނެ އެވެ.

"ކުދިން ދަސްކުރަނީ މުޖުތަމައުގައި ހުންނަ މައްސަލަތަކާއި އެކަންކަމަށް ހައްލު ހޯދާނެ ގޮތް، އެކާވީސް ވަނަ ގަރުނުގެ ހައްލުތައް، މީހުންނާ ގުޅިގެން މުއާމަލާތްކޮށްގެން އުޅުން." އަޝްރަފު ވިދާޅުވި އެވެ.

އޭނާ ވިދާޅުވި ގޮތުގައި އަޕްޝިފްޓުގެ ބޭނުމަކީ އެ ޕްރޮގްރާމް ފުރިހަމަކުރާ ކުދިން މުޖުތަމައުއަށް ލޯ ހުޅުވިފައިވާ ކުދިންނަށް ހެދުން ކަމަށެވެ. މިސާލެއްގެ ގޮތުން އޭނާ ނެންގެވީ، މަގުމަތީގައި ކުނި ބަހައްޓާފައި ހުންނަ ނަމަ އެކަމަށް ކުދިން ހައްލު ހޯދާނެ ގޮތަކާ ގުޅޭގޮތުންނެވެ.

"ވަރަށް އީޖާދީ، ވަރަށް އުފެއްދުންތެރި ވިސްނުން ހުރޭ. ބޮޑެތި މީހުންގެ ވިސްނުމަށް ނާންނަ ކަންކަން ހުރޭ. މުޖުތަމައުގައި ހުންނަ ކަންކަމަށް ވިސްނައި ހައްލު ހޯދަން އެ ކުދިންނަށް ދަސްކޮށްދިނުން. ކިޔަވަން ވެސް ދަސްވާނެ. ވިސްނަން ދަސްވާނެ." އޭނާ ވިދާޅުވި އެވެ.

މައްސަލަތަކަށް ހައްލު ހޯދައި އެކަންކަން ހުށަހެޅުމުން ޖަޖުންގެ ޕެނަލްއެއް އޮންނާނެ އެވެ. ސްކޫލު ފެންވަރާއި ގައުމީ ފެންވަރުގައި އެކަން ކުރުމަށް ޖަޖުންގެ ޕެނަލް ކަނޑައަޅާނެ އެވެ.