ނަޝީދު، ގާސިމްގެ މަންދޫބު އިލްހާމާ ބައްދަލުކުރައްވައިފި

އެމްޑީޕީގެ ރައީސް މުހައްމަދު ނަޝީދު، ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މަންދޫބު އަދި އޭނާގެ އެޑްވައިޒަރު އިލްހާމް އަހުމަދާ މިއަދު ބައްދަލުކުރައްވައިފި އެވެ.

މަޖިލިހުގެ އިދާރާގައި ބޭއްވި އެ ބައްދަލުވުމުގައި ނަޝީދުގެ އަރިހުގައި އެމްޑީޕީގެ ނައިބު ރައީސް މުހައްމަދު ޝިފާޒާއި އެ ޕާޓީގެ ކުރީގެ ޗެއާޕާސަން ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި ހުޅުދޫ ދާއިރާގެ މެމްބަރު އިލްޔާސް ލަބީބު ބައިވެރިވެވަޑައިގަތެވެ.

އެ ބައްދަލުވުމާ ގުޅޭ ތަފުސީލެއް އެއްވެސް ފަރާތަކުން މީޑިއާ އަށް އަދި ހާމައެއް ނުކުރައްވަ އެވެ.

ނަމަވެސް ނަޝީދު ބޭނުންފުޅުވަނީ މި އަހަރުގެ ރިޔާސީ އިންތިހާބަށް ގާސިމް ނެރުއްވައި އޭނާގެ ރަނިންމޭޓަކަށް ވެވަޑައިގަތުމަށް ބުނެ އަޑުތައް ދަނީ ފެތުރެމުންނެވެ. ރައްޔިތުންގެ މަޖިލިހުގެ މިއަދުގެ ޖަލްސާގައި ހަސަން ލަތީފު ވެސް ވަނީ އެފަދަ މޭރުމަކުން އާންމުންނަށް ސުވާލެއް ދޫކޮށްލައްވައިފަ އެވެ.

އޭނާގެ ސުވާލަކީ ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް އެމްޑީޕީ ފިޔަވައި އެހެން ޕާޓީއެއްގެ ކެންޑިޑޭޓަކާއި އެމްޑީޕީގެ ރަނިންމޭޓެއް އިންތިހާބު ކުރުން ކިހިނެތް ވާނެތޯ އެވެ.

"މިއީ ވަރަށް ރަނގަޅު ނުކުތާއެއް އެމްޑީޕީގެ މެންބަރުން ވިސްނާލަން. ކިހިނެތްތޯ ވާނީ އެހެން ޕާޓީއެއްގެ މެންބަރަކު ރައީސުލްޖުމްހޫރިއްޔާގެ މަގާމަށް ކުރިމަތިލައްވާ ބޭފުޅެއް ގޮތުގައި ހުންނަވާފައި އެމްޑީޕީގެ ރަނިން މޭޓަކާއި އަދި އެމްޑީޕީ ހިއްސާވާ ސަރުކާރެއް އުފައްދައި އަޅުގަނޑުމެންގެ ބަސް ބުނެވޭނެ އަދި މަޝްވަރާ އާއި ލަފާ ދެވޭނެ ސަރުކާރެއް އޮވެ ރައްޔިތުންނަށް ހިދުމަތް ކުރަން ތިބުން،" ހަސަން ވިދާޅުވި އެވެ.

އޭނާ ވިދާޅުވީ، ނަމެއްގައި ރައީސުލްޖުމްހޫރިއްޔާގެ މަގާމުގައި އެމްޑީޕީގެ މެންބަރަކު ހުރުމަށް ވުރެ 40 ޕަސެންޓަށް ވުރެ ބޮޑު ހިއްސާއަކާ އެކީގައި އެ ޕާޓީ އަށް ސަރުކާރަށް އާދެވިފައި އެމްޑީޕީގެ ސިޔާސަތުތަކާއި އަސާސްތަކާއި އުސޫލުތައް ހިފެހެއްޓޭނެ ސަރުކާރެއް އުފެއްދުން މާ މުހިންމު ކަމަށެވެ.

ރައީސް އިބްރާހިމް މުހައްމަދު ސޯލިހާއި ނަޝީދު ވެސް ރިޔާސީ އިންތިހާބަށް ގާސިމްގެ ތާއީދު ހޯއްދެވުމަށް އެ ދެބޭފުޅުންގެ މަންދޫބުން ގާސިމްގެ އަރިހަށް ކުރިން ފޮނުއްވާފައި ވެ އެެވެ. އެކަމަކު، ގާސިމް ނުވަތަ ޖޭޕީން ނިންމާނެ ގޮތެއް ކަށަވަރު ވާނީ އެ ޕާޓީގެ އާ ކައުންސިލްގެ ބައްދަލުވުމުގައި އެ ކަމުގައި މަޝްވަރާ ކުރުމުންނެވެ.

މިދިޔަ ހަފުތާ ބަންދުގައި ޖޭޕީން ފާސްކުރި ގަރާރުގައި ވަނީ އެ ޕާޓީން މި އަހަރުގެ ރިޔާސީ އިންތިހާބަށް ނުކުންނަން ނުވަތަ ޖޭޕީ އިސްވެ އުފައްދާ ކޯލިޝަނަކާއެކު ކުރިއަށް ދިއުމަށެވެ. އެ ގަރާރަށް އަމަލުކުރުމާއި ނުކުރުން ބިނާވެފައި ވަނީ ކައުންސިލުން ނިންމާ ގޮތެއްގެ މައްޗަށެވެ.