ނަޝީދުގެ ފެކްޝަނުން މިރޭ ގާސިމާ ބައްދަލުކުރަނީ

ރިޔާސީ އިންތިހާބާ ގުޅޭގޮތުން މަޝްވަރާކުރުމަށް އެމްޑީޕީގެ ރައީސް މުހައްމަދު ނަޝީދުގެ ފެކްޝަނުން، ޖުމްހޫރީ ޕާޓީގެ ލީޑަރު ގާސިމް އިބްރާހިމްއާ މިރޭ ބައްދަލުކުރަން ނިންމައިފި އެވެ.

އެމްޑީޕީގެ ރިޔާސީ ޕްރައިމަރީން ލިބުނު ނާކާމިޔާބީއަށް ފަހު ނަޝީދު ފައްޓަވާފައިވާ "ފިކުރެއްގެ ދިރުން" ކެމްޕެއިންގައި އިސްކޮށް އުޅުއްވާ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ކުރެއްވި ޓްވީޓެއްގައި ވިދާޅުވީ ނަޝީދުގެ އެދިވަޑައިގަތުމަކަށް އެމްޑީޕީގެ ފަރާތުން އޭނާ އަދި އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ގާސިމްއާ ބައްދަލުކުރައްވާނެ ކަމަށެވެ.

ޖޭޕީގެ އޮފީސް، ކުނޫޒުގައި ބައްދަލުވުން އޮންނާނީ 9:30 ގަ އެވެ.

މަޖިލީހުގެ ރައީސްކަން ވެސް ކުރައްވާ ނަޝީދު ގެންދަވަނީ މިދިޔަ ޖެނުއަރީ 28 ގައި ބޭއްވި ޕްރައިމަރީއަށް ފަހު، އެމްޑީޕީގެ ރިޔާސީ ޓިކެޓު ކަށަވަރުކުރެއްވި ރައީސް އިބްރާހިމް މުހައްމަދު ސޯލިހާ ދެކޮޅަށް ކެމްޕެއިން ކުރައްވަމުންނެވެ. އެގޮތަށް، މި ސަރުކާރުގެ ކޯލިޝަން ޕާޓްނަރުގެ ގޮތުގައި މިހާރު ވެސް ހިމެނޭ ޖޭޕީން ވަކިން އިންތިހާބުގައި ވާދަކުރުމަށް ބާރުއަޅައި އެ ފެކްޝަންގެ އެކި ބޭފުޅުން ވާހަކަދައްކާފައިވެ އެވެ. އެކަމާ ގުޅޭގޮތުން ނަޝީދުގެ އަރިސް ބޭފުޅުން މީގެ ކުރިން ވެސް ގާސިމްއާ ބައްދަލުކުރައްވާފައިވެ އެވެ.

ޖޭޕީން މިދިޔަ އަންގާރަ ދުވަހު ބޭއްވި ކައުންސިލްގެ ބައްދަލުވުމުގައި ވަނީ، އަންނަ ސެޕްޓެމްބަރު މަހު ބާއްވާ އިންތިހާބުގައި އެ ޕާޓީން ވަކިން ވާދަކުރަން ނިންމައިފަ އެވެ. އެއާއެކު، ޕްރައިމަރީއަށް ހުޅުވާލައި، މި މަހުގެ 30 ވަނަ ދުވަހާ ހަމައަށް މުއްދަތު ދީފައިވެ އެވެ. ނަމަވެސް އިންތިހާބާ ގުޅޭ ހުރިހާ ކަމެއް ނިންމުމުގެ ބާރު އެ ކައުންސިލުން ދީފައިވަނީ ގާސިމަށެވެ.

ގާސިމާއި ކުރީގެ ރައީސް މުހައްމަދު ނަޝީދު އެކުގައި ނުކުމެވަޑައިގަންނަވާ ވާހަކަތައް ވެސް މީގެ ކުރިން ފެތުރުނެވެ. އެކަމަކު، ގާސިމް ވަނީ އެ ވާހަކަތައް ދޮގުކުރައްވައިފަ އެވެ.