ޕާކިން ޒޯން ބަންދުކުރީ ޕްލޭނިން މިނިސްޓްރީން: ކައުންސިލް

ވެލާނާ ޕާކިން ޒޯން މިއަދު ބަންދުކުރީ ޕްލޭނިން މިނިސްޓްރީން ކަމަށާއި އެކަމަށް ކައުންސިލްގެ ހުއްދަ ހޯދާފައި ނެތް ކަމަށް މާލެ ސިޓީ ކައުންސިލުން މިއަދު ބުނެފި އެވެ.

ސަރުކާރުގެ ގިނަ އޮފީސްތައް ހިންގާ ވެލާނާގެ ކައިރީގައި ހަދާފައިވާ ޕާކިން ޒޯނުގައި ސައިކަލްތައް ޕާކް ނުކުރެވޭ ގޮތް ހެދުމުން ބައެއް މުވައްޒަފުން މިއަދު ވަނީ އެ އިމާރާތުގެ ތިރީގައި އެކަމާ ދެކޮޅަށް އިހުތިޖާޖު ވެސް ކޮށްފަ އެވެ.

އެއީ އެ ޕާކިން ޒޯނުގައި ޕާކް ކުރުން، ކުރިން އެންގުމަކާނުލައި ކުއްލިއަކަށް މަނާކުރުމުންނެވެ. މުވައްޒަފުން މިއަދު އޮފީހަށް ދިޔައިރު، ހުރީ އެ ޕާކިން ޒޯނުގެ ވަށައިގެން ސަތަރި ދަމައި ޕާކިން ޒޯނު ބަންދު ކޮށްފައި ކަމަށް އެ މީހުން ބުންޏެވެ.

ސިޓީ ކައުންސިލުން ބުނީ ޕާކިން ޒޯން ބަންދުކޮށް، އެ ސަރައްހަދުގައި ހުރި އުޅަނދުތައް ޓޯކޮށްފައިވަނީ ޕްލޭނިން މިނިސްޓްރީގެ އެންގުމަަށް ކަމަށެވެ.

"އެ މިނިސްޓްރީން އެ ސަރަހައްދު ބަންދުކޮށް މަސައްކަތް ކުރަމުން ދަނީ މާލެ ސިޓީ ކައުންސިލަށް އެންގުމަކާއި ނުލައި އަދި ކައުންސިލްގެ އެއްވެސް ކަހަލަ ހުއްދައެއް ލިބިގެން ނޫން،" ކައުންސިލުން ކުރި ޓްވީޓްތަކެއްގައި ބުންޏެވެ.

ނަމަވެސް ފުލުހުންގެ މީޑިއާ އޮފިޝަލް އެންމެ ފުރަަތަމަ "މިހާރު" އަށް ވިދާޅުވީ އެ ޕާކިން ޒޯން ބަންދުކުރީ ސިޓީ ކައުންސިލްގެ ބޭނުމަކަށް ކަމަށެވެ.

"އެ ޕާކިން ޒޯން ތެރޭގައި ހުންނަ މެކޭނިކަލް ޕާކިން ސިސްޓަމް ރޫޅުމުގެ މަސައްކަތް ސިޓީ ކައުންސިލުން ކުރުމަށް އެ ތަނުގައި ސަތަރި ދަމައި ބަންދުކޮށްފައި ވަނީ،" އޭނާ ވިދާޅުވި އެވެ.

ނަމަވެސް އެ ވާހަކަތައް ކައުންސިލުން ވަނީ ދޮގުކޮށްފައި ވަނިކޮށް ފަހުން ކުރި ޓްވީޓެއްގައި، ވަނީ މި ވަގުތު ޕާކިން ޒޯން ބަންދުކޮށްފައިވަނީ ޕްލޭނިން މިނިސްޓްރީގެ ބޭނުމަކަށް ކަމަށް ބުނެފަ އެވެ.

"ވެލާނާގެއާ އިންވެގެން އޮންނަ ސައިކަލް ޕާކިން ޒޯން މިވަގުތު ބަންދުކޮށްފައިވަނީ ޕްލޭނިން މިނިސްޓްރީގެ އެދުމުގެ މަތިން އެމިނިސްޓްރީގެ ބޭނުމަށް ކަމުގައި ދަންނަވަމަވެ." ޓްވީޓްގައިވެ އެވެ.

މާލެއަށް ދިމާވެފައިވާ ޕާކިން ޖާގައިގެ ދަތިކަން ހައްލުކުރުމަށް މާލޭގެ ބައެއް ސަރަހައްދުތަކުގަ އާއި ހުޅުމާލޭގައި ޕާކިން ސިސްޓަމްތަކެއް ބެހެއްޓި އެވެ. އޭގެ ތެރޭގައި ހީނާމާގޭ ޕާކިން ޒޯނާއި ވެލާނާގެ ޕާކިން ޒޯން ހިމެނެ އެވެ.

ވެލާނާގޭ ސަރަހައްދުގައި ބެހެއްޓި މެކޭނިކަލް ޕާކިން ސިސްޓަމް 2017 ގައި ވަނީ ޓެސްޓް ވެސް ކޮށްފަ އެވެ. ނަމަވެސް އެ ބޭނުމެއް ނުކުރެ އެވެ. ހީނާމާގޭގައި ޕާކިން ޒޯނުގައި ހެދި މެކޭނިކަލް ޕާކިން ސިސްޓަމްގެ ބޭނުން ނުކޮށް ދަބަރު ޖެހުމުން އެ ތަން ވެސް ވަނީ ނަގައިފަ އެވެ.