ޖޭޕީން ރިޔާސީ އިންތިހާބަށް ކެންޑިޑޭޓަކު ނެރެން ގޮވާލާ ގަރާރު ފާސްކޮށްފި

މި އަހަރުގެ ރިޔާސީ އިންތިހާބުގައި ޖުމްހޫރީ ޕާޓީން އިސްވެ ކޯލިޝަނެއް އުފައްދަން ނުވަތަ އެ ޕާޓީގެ ކެންޑިޑޭޓަކު ނެރެން ގޮވާލާ ގަރާރު ޖޭޕީގެ ކޮންގްރެސް އިން މިރޭ ފާސްކޮށްފި އެވެ.

ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ އަހުމަދު (އަބުޅޯ) ހުށަހެޅުއްވި އެ ގަރާރު ޖޭޕީގެ ކޮންގްރެސްގައި މިރޭ ބައިވެރިވި މެމްބަރުންގެ އިއްތިފާގުން ފާސްކުރިޔަސް އެންމެ ފަހުގެ ގޮތް ނިންމާނީ އެ ޕާޓީގެ ކައުންސިލުންނެވެ.

މިރޭގެ ބައްދަލުވުމުގައި ޖޭޕީގެ ލީޑަރު ގާސިމް އިބްރާހިމް ވިދާޅުވީ، އެއީ ކައުންސިލުން އަމަލުކުރުން ލާޒިމު ގަރާރެއް ނޫން ކަމަށާއި އެކަމަކު ގަރާރު އަދި މެމްބަރުންގެ ވިސްނުން ކައުންސިލަށް ގެންގޮސް ދެއްވާނެ ކަމަށެވެ.

ޖޭޕީގެ އަސާސީ ގަވާއިދަށް ގެނެސްފައިވާ އިސްލާހުގައިވާ ގޮތުން ނަމަ އެ ޕާޓީން ރިޔާސީ ކެންޑިޑޭޓަކު ނެރޭ ނަމަ އެ ކަމާ މެދު ގޮތް ނިންމާނީ ކައުންސިލުންނެވެ. އަދި ވާދަކުރައްވާނެ ކެންޑިޑޭޓަކު ކަނޑައަޅަނީ އެ ކަމަށް ފުރުސަތު ހުޅުވައިލުމުން ކައުންސިލުގައި ނަގާ ވޯޓަކުންނެވެ.

މި އަހަރުގެ ރިޔާސީ އިންތިހާބުގައި ޖޭޕީން އިސްވެ ކޯލިޝަނެއް އުފައްދަން ނުވަތަ އެ ޕާޓީގެ ކެންޑިޑޭޓަކު ނެރެން ގޮވާލާ ގަރާރުގެ ބަހުސް ކުރިއަށް ގެންދިޔަ ވަގުތު ރިޔާސަތުގައި އިންނެވީ ގާސިމެވެ. އޭނާ ބަހުސަށް ފުރުސަތު ދެއްވަމުން ގެންދެވިއިރު، ސިޔާސީ ގޮތުން ބައެއް ވާހަކަތައް ދޭތެރެދޭތެރެއިން ދެއްކެވި އެވެ.

އިއްޔެ ފެށި ޖޭޕީގެ ކޮންގްރެސްގައި 750 އެއްހާ މެންބަރުން ބައިވެރިވި ނަމަވެސް ގަރާރުގެ ބަހުސް ކުރިއަށް ގެންދިޔަ ވަގުތު ތިބީ 416 މެމްބަރުންނެވެ. ރިޔާސަތުން ގާސިމް އިއުލާން ކުރެއްވި ގޮތުން ނަމަ ގަރާރު ފާސްވީ އެ ކޮންގްރެސްގައި އެ ވަގުތު ތިބި މެމްބަރުންގެ އިއްތިފާގުންނެވެ.

އެ ގަރާރުގައި ބުނެފައި ވަނީ ގިނަ ސިޔާސީ ޕާޓީތަކެއް ހިމެނޭ ނިޒާމެއް ގާއިމް ކުރި ފަހުން މިހާތަނަށް ބޭއްވި ކޮންމެ ރިޔާސީ އިންތިހާބެއް އެހެނިހެން ސިޔާސީ ޕާޓީތަކަށް ކާމިޔާބު ކުރެވެނީ ޖޭޕީގެ ތާއީދާ އެކުގައި ކަމަށާއި އެންމެ ފަހުން ޖޭޕީން ވާދަކުރި 2013 ވަނަ އަހަރުގެ ރިޔާސީ އިންތިހާބުގައި އެ ޕާޓީ ދެވަނަ ބުރަކަށް ނުދެވުނީ ކުޑަ ފަރަގަކުން ކަމަށެވެ.

ޖޭޕީ އަކީ ރިޔާސީ އިންތިހާބުގައި ވާދަކުރުމުގެ ހަކަތަ އާއި ތާއީދު އޮތް ޕާޓީއެއް ކަމަށާއި ކުރިޔަށް އޮތް ރިޔާސީ އިންތިހާބަކީ ޖޭޕީގެ ވެރިކަމެއް ގާއިމު ކުރަން ލިބެން އޮތް އެންމެ ފަހި ފުރުސަތު ކަމަށް ވެސް އެ ގަރާރުގައި ވެ އެވެ.

"...2023 ވަނަ އަހަރުގެ ރިޔާސީ އިންތިހާބުގެ ފުރަތަމަ ބުރުގައި ޖުމްހޫރީ ޕާޓީގެ ރިޔާސީ ކެނޑިޑޭޓެއް ވާދަ ކުރަން ނުވަތަ ޖުމްހޫރީ ޕާޓީ އިސްވެ އުފައްދައި ކޯލިޝަނަކުން ވާދަ ކުރުމަށް،" އެ ގަރާރުގައި ވެ އެވެ.

ގަރާރަށް ބަހުސް ކުރެއްވި ގިނަ މެންބަރުންގެ ވިސްނުން ހުރީ ކުރިޔަށް އޮތް ރިޔާސީ އިންތިހާބުގައި މިހާރު އޮތް ކޯލިޝަނާއެކު ކުރިޔަށް ނުގޮސް ގާސިމް އިންތިހާބަށް ނުކުންނެވުމަށެވެ.