"ލޯޑް އޮފް ދަ ރިންގްސް" ގެ އާ ފިލްމުތަކެއް ނެރެނީ

ސިނަމާގައި ބޮޑު މަގްބޫލުކަމެއް ހޯދި "ލޯޑް އޮފް ދަ ރިންގްސް" ފްރެންޗައިޒްގެ އާ ފިލްމްތަކެއް ހަދަން، "ވާނާ ބްރޯޒް" އިން މަސައްކަތް ފަށައިފި އެވެ.

"ވާނާ ބްރޯސް، ޑިސްކަވަރީ" ގެ ސީއީއޯ، ޑޭވިޑް ޒަސްލަވް ވިދާޅުވި ގޮތުގައި، "ލޯޑް އޮފް ދަ ރިންގްސް" ފޮތް ލިޔެފައިވާ މަޝްހޫރު ލިޔުންތެރިޔާ ޖޭއާރްއާރް ޓޮލްކީންގެ ފޮތްތަކަށް ބިނާކޮށް، ގިނަ އަދަދެއްގެ އާ ފިލްމުތަކެއް ހަދަން، ވާނާ ބްރޯޒް ސްޓޫޑިއޯއާ ހިންގުމާ އަލަށް ހަވާލުވި، މައިކް ޑެ ލޫކާ އަދި ޕޭމް އަބްދީ ގިނަ ބަޔަކާ އެކު އެއްބަސްވުންތަކެއް ވަނީ ވެފަ އެވެ.

ޓޮލްކީންގެ "މިޑްލް އާތު" ހިޔާލީ ދުނިޔޭގެ ފޮތްތަކުގެ ތެރޭގައި ހިމެނެނީ "ލޯޑް އޮފް ދަ ރިންގްސް" އަދި "ދަ ހޮބިޓް" އެވެ. އެ ދެ ފޮތަށް ބިނާކޮށް ޕީޓާ ޖެކްސަން ވަނީ ދެ ޓްރިލޮޖީއެއް މިހާތަނަށް ސިނަމާތަކަށް ގެނެސްދީފަ އެވެ.

ދެހާސްއެއްވަނަ އަހަރުން ފެށިގެން 2003 ވަނަ އަހަރުގެ ނިޔަލަށް ނިކުތް، "ލޯޑް އޮފް ދަ ރިންގްސް" ގެ ފުރަތަމަ ޓްރިލޮޖީއަށް ވަނީ ގާތްގަނޑަކަށް ތިން ބިލިއަން ޑޮލަރުގެ އާމްދަނީއެއް ލިބިފަ އެވެ. އަދި 2012- 2014 ގައި "ދަ ހޮބިޓް" އަށް ބިނާކޮށް، ޖެކްސަން އުފެއްދި ފިލްމް ޓްރިލޮޖީއަށް ވެސް އެވަރުގެ އާމްދަނީއެއް ލިބުނެވެ.

އެ ފޮތްތަކުގެ އެކްސްކްލޫސިވް ރައިޓްސް އޮތް، "އެމްބްރޭސާ ގްރޫޕް" ގެ ސަބް ޑިވިޝަން "ފްރީމޯޑް" ގެ ދަށުން ހިންގާ "މިޑްލް އާތު އެންޓަޕްރައިސަސް" އާ އެކު، ވާނާ ބްރޯސް. އިން މިހާރު ވަނީ އެއްބަސްވުމުގައި ސޮއިކޮށްފަ އެވެ.

ޑެ ލޫކާ، އަދި އަބްދީ ބުނި ގޮތުގައި، މީގެ ކުރިން ވާނާ ބްރޯސް. ގެ ނިއުލައިން ސިނަމާއިން އުފެއްދި، "ލޯޑް އޮފް ދަ ރިންގްސް" އަދި "ދަ ހޮބިޓް" ޓްރިލޮޖީއަކީ، ޓޮލްކީންގެ ހިޔާލީ ދުނިޔޭގެ ވަރަށް ގިނަ ތަފްސީލުތަކާއި ހިތްގައިމު މަންޒަރުތަކެއް ގެނެސްދިން ދެ ޓްރިލޮޖީ އެވެ. އެކަމަކު، އަދިވެސް ޓޮލްކީންގެ އެ ދުނިޔޭގައި އެކްސްޕްލޯ ނުކޮށް ހުރި ބައިވަރު ކަންކަން އެބަހުރި ކަމަށް ފާހަގަކުރި އެވެ. އެހެންވެ، މި ފިލްމުތަކުގެ އަމާޒަކީ، ކުރިއަށް ވުރެ ތަފްސީލީ ގޮތަކަށް ޓޮލްކީންގެ "މިޑްލް އާތް" ދުނިޔެ ގެނެސްދިނުން ކަމަށް އެ މީހުން ބުނެ އެވެ.

އާ ފިލްމުތައް އުފައްދާނީ، ކޮން ޓައިމްލައިނެއްގައި ކަމެއް، އަދި ފަށާނީ ކޮން ޕްރޮޖެކްޓަކުން ކަމެއް އަދި ހާމަކޮށްފައެއް ނުވެ އެވެ.

ދުނިޔޭގެ އެކިކަންކޮޅުތަކެއްގައި ބޮޑު މަގްބޫލުކަމެއް ހޯދި، "ލޯޑް އޮފް ދަ ރިންގްސް" ގެ ފުރަތަމަ ޓްރިލޮޖީގެ ފިލްމުތަކަށް ވަނީ ޖުމްލަ 30 އެކަޑަމީ އެވޯޑް ނޮމިނޭޝާން ލިބި، އޭގެ ތެރެއިން 17 ޓްރޮފީ ކާމިޔާބުކޮށްފަ އެވެ. ހާއްސަކޮށް، 2003 ވަނަ އަހަރު އެންމެ މޮޅު ފިލްމަށް ދޭ، "ބެސްޓް ޕިކްޗާ" އެވޯޑު ހޯދި، "ލޯޑް އޮފް ދަ ރިންގްސް: ދަ ރިޓާން އޮފް ދަ ކިންގް" ފާހަގަކޮށްލެވެ އެވެ.