ވެލެންސިއާގެ ކޮންޓްރެކްޓްގައި ހުރި ފައިޓޯ ވިކްޓަރީ އަށް

ވިކްޓްރީ އަށް މިއަދު ސޮއިކުރި ޑިފެންޑަރު ހުސައިން ފައިސަލް (ފައިޓޯ) ހުރީ ވެލެންސިއާގެ ކޮންޓްރެކްޓުގައި ކަމަށް ބުނެ އެ ކްލަބުން މައްސަލަ ޖައްސައިފި އެވެ.

ވެލެންސިއާގެ އޮފިޝަލަކު މިއަދު ބުނީ، އެ ކްލަބާ އެކު ފައިޓޯ ހެދި އެއްބަސްވުން ހަމަވާނީ މި އަހަރު ނިމުމުން ކަމަށެވެ.

"މިހާރު ވެސް މި އިނީ ކޮންޓްރެކްޓް ހުޅުވައިގެން. އޭނާގެ ކޮންޓްރެކްޓްގައި އަދި ގާތްގަނޑަކަށް އަހަރެއްހައި ދުވަސް އެބައޮތް،" އޮފިޝަލް ބުންޏެވެ.

އޮފިޝަލް ބުނީ ފައިޓޯ ދޫކޮށްލަން ކްލަބުން ނިންމާފައި ނުވާ ކަމަށެވެ. އަދި ވިކްޓަރީގެ ފަރާތުން ވެސް، އޭނާ ދޫކޮށްލަން އެދި އެއް ވެސް ހުށަހެޅުމެއް ވެލެންސިއާ އަށް ކޮށްފައި ނުވާ ކަމަށް އޮފިޝަލް ބުންޏެވެ.

ވެލެންސިއާގެ ކޮންޓްރެކްޓްގައި ހުރި ފައިޓޯ ސޮއި ކުރުވި މައްސަލަ އެފްއޭއެމަށް ހުށަހަޅާނަންތޯ ސުވާލު ކުރުމުން އޮފިޝަލް އެއަށް ޖަވާބެއް ނުދެ އެވެ.

"އަޅުގަނޑު މި ދެންނެވީ ވެލެންސިއާގެ ކޮންޓްރެކްޓްގައި ހުރި ކުޅުންތެރިޔެކޭ އެ ސޮއި ކުރުވީ. ކޮންޓްރެކްޓް ހަމަ ނުވަނީސް އެހެން ކްލަބަކަށް ނުކުޅެވޭނެ،" ވިކްޓަރީގެ މައްސަލަ އެފްއޭމަށް ހުށަހަޅާނަންތޯ ސުވާލު ކުރުމުން ވެލެންސިއާގެ އޮފިޝަލް ބުންޏެވެ.

މި އަހަރުގެ ދެ ވަނަ ޑިވިޝަން ފުޓްބޯޅަ މުބާރާތުގައި ކުޅެން ފައިޓޯ ވިކްޓަރީ އަށް ސޮއި ކުރުވިކަން އެ ކްލަބުން އިއުލާން ކުރީ މިއަދު އެވެ.

އެނގިފައިވާ ގޮތުގައި ވެލެންސިއާ އިން ފައިޓޯ އަށް ދޭން ޖެހޭ މުސާރަ ނުދޭތާ ތިން މަހަށް ވުރެ ދިގު މުއްދަތެއް ފާއިތުވެފައިވުމުން، އޭނާ ވަނީ އެ މައްސަލަ އެފްއޭއެމް އަށް ހުށަހަޅައިފަ އެވެ. އަދި އެހެންވެ ވެލެންސިއާ ދޫކޮށްލަން އޭނާ އާއި ބައެއް އެހެން ކުޅުންތެރިން ވެސް ވަނީ ރިލީޒަށް އެދިފަ އެވެ.

އެކަމަކު އެކަންކަމާ ބެހޭގޮތުން މީޑިއާގައި ވާހަކަ ދައްކަން ބޭނުން ނުވާ ކަމަށް ފައިޓޯ ބުންޏެވެ.

ފައިޓޯ އަކީ ވިކްޓަރީ އަށް ސޮއި ކުރުވި ދެ ވަނަ ކުޅުންތެރިޔާ އެވެ. ގައުމީ ޓީމުގެ ކެޕްޓަން އަކްރަމް އަބްދުލް ގަނީ އާއި މުހައްމަދު އުމެއިރު ވެސް މި މަހު ވަނީ ވިކްޓަރީ އަށް ސޮއި ކުރުވައިފަ އެވެ.