ކުޑަގިރި ހުޅުވައިފި؛ ރައީސް އެދިވަޑައިގަތީ އެންމެންގެ ތަނެއްގެ ގޮތުގައި ބެލެހެއްޓުމަށް

މާލެ ސަރަހައްދުގައި އުޅޭ މީހުން ދަތުރު ދާން ހާއްސަކޮށްގެން ހެދި ކުޑަގިރި ޕިކްނިކް އައިލެންޑް މިއަދު އާންމުންނަށް ރަސްމީކޮށް ހުޅުވާލައިފި އެވެ.

މާލެއާ ކައިރި ފަޅެއް ހިއްކައިގެން ހެދި މި ރަށް ހުޅުވާލިއިރު، ފުރަތަމަ ދުވަހަށް ހުޅުވާލި 300 ބުކިން އޮތީ ފުލްވެފަ އެވެ.

ކުޑަގިރި އާންމުނަށް ހުޅުވާލުމުގެ ގޮތުން މިއަދު ހެނދުނު މި ރަށުގައި ބޭއްވި ހާއްސަ ރަސްމިއްޔާތެއްގައި ރައީސް އިބްރާހިމް މުހައްމަދު ސޯލިހު ވިދާޅުވީ އެ މަނިކުފާނުގެ އިލްތިމާސަކީ އެ ރަށަށް ދަތުރު ދާ މީހުން އެކަކު އަނެކަކަށް އިހުތިރާމްކޮށް، އެންމެންނަށް ހިތްފަސޭހަކަމާ އެކީގައި ހިތްހަމަޖެހިގެން ޗުއްޓީ ހޭދަކޮށްލެވޭ ރަށެއްގެ ގޮތުގައި އެތަން ބެލެހެއްޓުން ކަމަށެވެ.

ރައީސް ވިދާޅުވީ އެ ރަށުގެ ސެކިއުރިޓީ އާއި ހިދުމަތް ދިނުމާއި ސާފުތާހިރުކަން ބެލެހެއްޓުމަށް ގިނަ ސްޓާފުންތަކެއް، އެޗްޑީސީން ހަމަޖައްސައިފައި ތިއްބަސް، ރަށް ސާފުތާހިރުކޮށް، އަމާންކަމާ އެކު އޮންނާނީ، އެ ރަށަށް ދަތުރު ދާ މީހުން ވެސް، އެ ކަންކަމަށް ސަމާލުކަން ދީގެން ކަމަށެވެ.

ރައީސް ވިދާޅުވި ގޮތުގައި، އެމަނިކުފާނު މާލޭގައި ދިރިއުޅުއްވަން ފެއްޓެވިތާ 50 އަހަރުވާއިރު، އޭރު ވެސް މާލެއިން ގޮނޑުދޮށްތަކުގެ ހިތްހަމަޖެހުމެއް ނުލިބެ އެވެ. މާލޭގެ ރައްޔިތުން އޭރު ހިތްހަމަޖައްސާލަން ގޮސް އުޅުނީ ކުޑަބަނޑޮހަށް ކަމަށް ވިޔަސް، ކުރީގެ ސަރުކާރުން އެ ރަށް ވިއްކާލައި، ރައްޔިތުން އެ އުފަލުން މަހުރޫމްކުރީ ކަމަށް ވިދާޅުވި އެވެ.

"މިއަދު އަޅުގަނޑުމެން މަސައްކަތް ކުރަމުން މި ގެންދަނީ، މާލޭގައި ދިރިއުޅޭ މީހުންނަށް، ރައްޔިތުންނަށް މި އުފާވެރިކަން ހޯދައިދިނުމަށް. މި ހަމަޖެހުން ހޯދައިދިނުމަށް،" ރައީސް ވިދާޅުވި އެވެ.

"އަދިވެސް މި ކުޑަގިރީގައި ރައްޔިތުން ބޭނުންވާ ވަރަށް ގިނަ ވަސީލަތްތައް އިތުރުކުރަން ޖެހޭނެ. އެހެންނަމަވެސް، އަޅުގަނޑުގެ އުންމީދަކީ، މިހާތަނަށް މި ކުރެވިފައި ހުރި މަސައްކަތުން، މި ރަށަށް ދަތުރު އަންނަ ރައްޔިތުންނަށް ކޮންމެވެސްވަރެއްގެ ހިތްހަމަޖެހުމެއް ލިބިގެންދާނެ ކަމަށް."

ކުޑަގިރީގައި އެއްވެސް ވަރަކަށް ދުންފަތުގެ އިސްތިއުމާލު ނުކުރެވޭ ގޮތް ހަދަން ސޯޝަލް މީޑިއާގައި ބައެއް މީހުން ގޮވާލިކަން އެނގިވަޑައިގަންނަވާ ކަމަށާއި އެ ރަށް ބޭނުންކުރަން ފެށުމުން ލިބޭ ތަޖުރިބާގެ އަލީގައި ގެންނަން ޖެހޭ ބަދަލުތައް އެޗްޑީސީން ގެންނާނެ ކަމަށް އެމަނިކުފާނު ވިދާޅުވި އެވެ.

ރަށް ހުޅުވި ދުވަހަށް ބުކިން ހެދި އެތައް ބަޔަކު މިއަދު ވެސް ގެންދަނީ ކުޑަގިރީގައި މޫދަށް އެރި މަޖާކުރަމުންނެވެ.

އެޗްޑީސީން ބުނިގޮތުގައި ކުޑަގިރިއަށް ދަތުރު ދިއުމަށް ދުވާލަކު 500-600 މީހުންނަށް ފުރުސަތު ދޭނެ އެވެ.

ދިވެހިންނަށް ކަނޑައަޅާފައިވާ އަގުތައް

● ބަންދު ދުވަސްތަކުގައި ކުޑަގިރި އަށް އެރުމާއި ފެރީ ހިލޭ.

● ބަންދު ނޫން ދުވަސްތަކުގައި ކުޑަގިރިއަށް އެރުމަށް 50ރ. އަދި ފެރީއަށް 50ރ.

● ދެ އަހަރުން ދަށުގެ ކުދިންނާއި 65 އަހަރުން މަތީގެ މީހުންނަށް ކޮންމެ ދުވަހަކު ވެސް ހިލޭ.

● ބަންދު ނޫން ދުވަސްތަކުގައި 2-11 އަހަރުގެ ކުދިންނަށް 25ރ. ގެ ފީއެއް.

ބިދޭސީންނާއި ޓޫރިސްޓުނަށް ކޮންމެ ދުވަހަކު ވެސް މި ރަށަށް ދެވެނީ ފީއެއް ދައްކައިގެންނެވެ.

އެޗްޑީސީން ބުނީ ގޭސްފުޅި އާއި އުނދުނާއި ވަޅި އަދި ކަޓްލަރީ ކުޑަގިރިއަށް ގެންދިއުން މަނާވާނެ ކަމަށެވެ. އެ އެއްޗެހި އެ ރަށުން ލިބޭނެ އިންތިޒާމު ވަނީ ހަމަޖައްސައިފަ އެވެ.

ކުޑަގިރީގައި 13 ހަޓު ހުންނައިރު، އެ ތަންތަން ވެސް އެޕާއި ވެބްސައިޓް މެދުވެރިކޮށް ބުކް ކުރެވެ އެވެ. ކުޑަ ހަޓެއް މުޅި ދުވަހަށް ބުކް ކުރެވޭނީ 500ރ. އަށެވެ. އަދި ބޮޑު ހަޓެއް 1،200ރ. އަށެވެ. ހަޓުން ކަރަންޓު ލިބޭނެ އެވެ. އަދި ކައްކަން ބޭނުންވާ ގޭހާއި އުނދުން ވެސް ލިބޭނެ އެވެ.

މާލެއިން އެ ރަށަށް ލޯންޗުގައި 15 މިނެޓުން ދެވޭނެ އެވެ. މާލެ އާއި ހުޅުމާލެއިން ވެސް އެ ރަށަށް ދެވޭނެ އިންތިޒާމު ވަނީ ހަމަޖައްސައިފަ އެވެ.