އައްޑޫގެ ބައެއް މަގުތަކުގެ ފޭވްމަންޓް މާ ފުޅާކޮށް ހަދާތީ ޝަކުވާ ބޮޑުވެއްޖެ

އައްޑޫގެ ބައެއް މަގުތަކުގެ ޕޭވްމަންޓް މާ ފުޅާކޮށް ހަދަމުން ދާތީ އާންމުންގެ ޝަކުވާ ބޮޑުވެއްޖެ އެވެ.

އައްޑޫގެ ޑެޕިއުޓީ މޭޔަރު މުހައްމަދު ޝުއާއު މިއަދު "މިހާރު" އަށް ވިދާޅުވީ، މިހާރު ހަދަމުން އަންނަ ބައެއް މަގުތަކުގެ ފޭވްމަންޓް މާ ފުޅާކޮށް ހެދުމުން، އެ މަގުތަކުގައި ދުއްވާ އެއްޗެހި ދުއްވަން އޮންނަ ސަރަހައްދު ހަނިވާނެތީ އާންމުންގެ ފަރާތުން އެކަމުގެ ޝަކުވާ ލިބޭ ކަމަށެވެ.

އޭނާ ވިދާޅުވި ގޮތުގައި، އެ މައްސަލަ އެންމެފަހުން ދިމާވީ ސ. ހިތަދޫގެ ހުސެއިނީ މަގުގަ އެވެ. އެކަމުގެ ޝަކުވާ ލިބުމުން ކައުންސިލުން ޕްލޭނިން މިނިސްޓްރީއާ އެކު މަޝްވަރާ ބައްދަލުވުމެއް ބޭއްވިޔަސް އަދިވެސް ހައްލެއް ނުލިބޭ ކަމަށް އޭނާ ވިދާޅުވި އެވެ.

"އެކަން ހައްލުކޮށްދޭން މިނިސްޓްރީގައި އެދިފައި ވަނިކޮށް، ހައްލު ނުވެ، މިހާރު އެ މަގުގައި ޕޭވްމަންޓް ހަދަން އަރިމަތީ ޖާ ޖަހައި ވެސް އެ ނިމެނީ،" ޝުއާއު ވިދާޅުވި އެވެ.

"އަދިވެސް މިކަމަށް ހައްލެއް ނުލިބޭތީ އެކަމުގެ ކަންބޮޑުވުން އޮތީ."

ރައްޔިތުންގެ މަޖިލިހުގެ މިއަދުގެ ޖަލްސާގައި ޕްލޭނިން މިނިސްޓަރު މުހައްމަދު އަސްލަމް ވިދާޅުވީ އައްޑޫގެ މަގު ހެދުމުގެ މަޝްރޫއާ ގުޅޭ ކަންބޮޑުވުންތަކެއް ހުރިކަން އެނގިވަޑައިގަންނަވާ ކަމަށާއި އެ މައްސަލަ ހައްލުކުރުމަށް އޭނާ އެ ސިޓީ އަށް ވަޑައިގަންނަވަން ނިންމާފައިވާ ކަމަށެވެ.

"އަަޅުގަނޑު ސީދާ، ދުވަސްކޮޅަކު، އައްޑޫގައި ބޭސްވުމަށް މި ހޮނިހިރު ދުވަހު އައްޑު އަށް މޫވް ކުރާނަން،" އަސްލަމް ވިދާޅުވި އެވެ.

އައްޑޫގެ މަގުތައް ހަދާ ގޮތާ މެދު ހިތްހަމަނުޖެހިގެން އާންމުންގެ ޝަކުވާ ކުރިން ވެސް ބޮޑުވި އެވެ. އެ ފަހަރު ޝަކުވާ ގިނަވީ މަގުތައް ކޮނެފައި މަސައްކަތް ނުނިންމާ ގިނަ ދުވަހު ބޭއްވުމުގެ ސަބަބުން ވަޅުގަނޑުތަކަށް މީހުންނާއި ވެހިކަލްތައް ވެއްޓި ހާނިއްކަވުމުގެ ހާދިސާތައް އިތުރުވުމުންނެވެ. އަދި އެ މަގުތަކުގެ ކާނުގަނޑު ހަދަން ބޭނުންކޮށްފައި ހުރި ދަގަނޑުތަކުގައި ދަބަރު ޖަހާ މައްސަލައެއް ވެސް ފެންމަތިވި އެވެ.

ތާރު އަޅައިގެންނާއި ގާ އަތުރައިގެން އައްޑޫގައި 107 ކިލޯ މީޓަރުގެ މަގު ހެދުމުގެ މަސައްކަތް ހަވާލުކޮށްފައި ވަނީ އިންޑިއާގެ އެފްކޮންސް ކުންފުންޏާ އެވެ. ފެބްރުއަރީ 2021 ގައި އެ މަސައްކަތް އެ ކުންފުންޏާ ހަވާލުކުރީ ދެ އަހަރު ދުވަހުގެ ތެރޭގައި ނިންމަން ޖެހޭ ގޮތަށެވެ.

އިންޑިއާގެ އެގްޒިމް ބޭންކުން ދީފައިވާ 800 މިލިއަން ރުފިޔާގެ ކްރެޑިޓް ލައިންގެ ދަށުން 1.2 މިލިއަން ރުފިޔާ ހަރަދުކޮށްގެން އައްޑޫގެ މަގުތައް ހެދުމުގެ އަމަލީ މަސައްކަތް ފެށީ މިދިޔަ އަހަރު ފެބްރުއަރީ 18 އިގަ އެވެ. އެ މަޝްރޫއުގެ ދަށުން އައްޑޫގެ ހުރިހާ ރަށެއްގެ މަގުތައް ހަދައި، ފެން ހިންދުމުގެ ނިޒާމެއް ވެސް ގާއިމު ކުރާނެ އެވެ.