ހުރިހާ ވަސީލަތަކާއެކު ގަމު ޓާޝަރީ ހޮސްޕިޓަލާއި ގައްދޫ ހޮސްޕިޓަލް ހަދަން 1.3 ބިލިއަން ރުފިޔާ

ހުރިހާ ވަސީލަތަކާއެކު ލ. ގަމުގައި 130 އެނދުގެ ޓާޝަރީ ހޮސްޕިޓަލާއި ގދ. ގައްދޫގައި އާ ހޮސްޕިޓަލް އިމާރާތެއް އަޅަން 1.3 ބިލިއަން ރުފިޔާއަށް ސްޕެއިންގެ ކުންފުންޏަކާ މިއަދު ހަވާލުކޮށްފި އެވެ.

ހެލްތު މިނިސްޓްރީގައި ބޭއްވި ރަސްމިއްޔާތުގައި، ޓާޝަރީ ހޮސްޕިޓަލާއި 30 އެނދުގެ ހޮސްޕިޓަލް އިމާރާތެއް އެޅުމުގެ އެއްބަސްވުމުގައި އެ މިނިސްޓްރީގެ ސްޓޭޓް މިނިސްޓަރު އަހުމަދު އާދިލް އަދި ސްޕެއިންގެ ހޮމްޓް އެސްޕަނިއާގެ ޗީފް އެގްޒެކެޓިވް ޑިރެކްޓަރު އެޑުއާޑޯ އޮޅިވޭރިއާ ވަނީ ސޮއިކުރައްވައިފަ އެވެ.

އެ ކޮންމެ ތަނެއްގައި ސްޓާފް އެކޮމޮޑޭޝަން ބްލޮކްތަކާއި މުޅި ހޮސްޕިޓަލަށް ބޭނުންވާ ފަރުނީޗަރާއި މެޑިކަލް އިކުއިޕްމަންޓް ހޯދައި މުވައްޒަފުން ތަމްރީނުކުރުމަކީ ވެސް މި އެގްރިމެންޓުގެ ދަށުން ކުރާނެ ކަމެކެވެ.

އެ ހުރިހާ މަސައްކަތެއް ހަވާލުކުރީ 79,050,022,60 ޔޫރޯ (1.3 ބިލިއަން ރުފިޔާ) އަށެވެ. މިއީ މި ސަރުކާރުން އެންމެ ބޮޑު ހަރަދުކޮށްގެން ހަދާ ދެ ހޮސްޕިޓަލެވެ. މި ޕްރޮޖެކްޓަށް ފައިނޭންސް ކުރަން ހަމަޖައްސާފައިވަނީ ޑޮއިޗާ ބޭންކުންނެވެ.

ހޮސްޕިޓަލްގެ ހުރިހާ ކަމެއް ސްޕެއިންގެ ކުންފުނިން ކުރިޔަސް، އެކަަމުގެ ކޮންސްޓްރަކްޝަން މަސައްކަތްކުރަން ހަމަޖައްސާފައިވަނީ އެމްޓީސީސީންނެވެ.

މިނިސްޓްރީން ބުނީ ގަމު ޓާޝަރީ ހޮސްޕިޓަލް ނިންމަން ހަވާލުކުރީ 36 މަސް ދުވަހުން ކަމަށެވެ. ގައްދޫ ހޮސްޕިޓަލްގެ އާ އިމާރާތް ހަދަން ދީފައިވަނީ 30 މަސް ދުވަހެވެ.