ސައުދީގެ ތާރީހީ މެޗުގައި މެސީ އާއި ރޮނާލްޑޯ ލަނޑުތަކަށް ސަމާލުކަން

ރިޔާދު (ޖެނުއަރީ 20) - ސައުދީ އަރަބިިއާގައި ކުޅުނު ތާރީހީ އެކްޒިބިޝަން މެޗުގައި ލިއޮނެލް މެސީ އާއި ކްރިސްޓިއާނޯ ރޮނާލްޑޯ ޖެހި ލަނޑުތަކަށް ސަމާލުކަން ލިބިއްޖެ އެވެ.

ރޭ ސައުދީގެ ރިޔާދުގައި ކުޅުނު މެޗުގައި ބައްދަލު ކުރީ ޕީއެސްޖީ އާއި ރިޔާދުގެ ދެ ކްލަބްކަމަށްވާ އަލް ނަސްރު އާއި އަލް ހިލާލްގެ ކުޅުންތެރިންގެ މެދުގައި އެއްކޮލައިގެން ނެގި ޓީމަށެވެ. މެޗު ޕީއެސްޖީގެ ޓީމު ކާމިޔާބު ކުރީ 5-4 ންނެވެ.

މި މެޗުވީ ސައުދީގެ ކްލަބް ފުޓްބޯޅައިގައި ރޮނާލްޑޯ ކުޅުނު ފުރަތަމަ މެޗަށެވެ. އެ ގައުމުގެ ނަސްރު އެފްސީ އަށް ބަދަލުވެ ރޮނާލްޑޯ އަދި ލީގުގައި މެޗެއް ނުކުޅެ އެވެ.

މެސީ ފުރަތަމަ ލަނޑު ޖަހައި ޕީއެސްޖީ އަށް ލީޑް ނަގައިދިނެވެ. އޭގެ ފަހުން ރޮނާލްޑޯ ދެ ލަނޑު ޖަހައި ނަސްރު އަށް 2-2 ން ނަތީޖާ ހަމަހަމަ ކޮށްދިނެވެ. ޕީއެސްޖީގެ ދެވަނަ ލަނޑު ޖެހީ މާކުިއނޯސް އެވެ.

މެޗުގެ ބޮޑު ބައެއް ޕީއެސްޖީން ކުޅުނީ އެއް ކުޅުންތެރިޔަކު މަދުކޮށެވެ. އެ ޓީމުގެ ޖޯން ބާނެޓް، ސައުދީގެ ސާލިމް އަލް ދައުސަރީ އަށް ފައުލު ކުރުމުން ދެއްކި ރަތް ކާޑާ ގުޅިގެންނެވެ.

ފުރަތަމަ ހާފުގައި ޕީއެސްޖީ އަށް ލިބުނު ޕެނަލްޓީ ނޭމާ އަށް ނާކާމިޔާބުވި އެވެ. ދެވަނަ ހާފުގައި ސާޖިއޯ ރާމޮސް ވެސް ލަނޑު ޖެހި އެވެ. ކިލިޔަން އެމްބާޕޭ ވެސް ވަނީ ޕެނަލްޓީގައި ޕީއެސްޖީ އަށް ލަނޑު ޖަހައިދީފަ އެވެ. ރިޔަދު ޓީމުގެ އަނެއް ދެ ލަނޑު ޖެހީ ބޮލުން ފޮނުވާލި ހަމަލާއިން ލަނޑު ޖެހީ ޖިއުން ހިއުން ސޫ އާއި އެޑާސަން ޓަލިސްކާ އެވެ. ޕީއެސްޖީ ފަސްވަނަ ލަނޑު ޖެހީ ހޫގޯ އަކިޓޭ އެވެ.

އެ މެޗަކީ މެސީ އާއި ރޮނާލްޑޯ އެއް މެޗެއްގައި ކުޅޭ ފަހު މެޗަށް ވެދާނެ އެވެ. އެ މެޗު ތާރީހީ މެޗަކަށް ވާ އަނެއް ސަބަބަކީ ސައުދީ އާއި ގަތަރުގެ ގުޅުމެވެ، ސައުދީން ގަތރައެކު 2017 ގައި ގުޅުން ކަނޑާލައި އެ ގައުމާ ދެކޮޅަށް ފިޔަވަޅުތައް ވެސް އެޅި އެވެ. ތިން އަހަރަށް ފަހު ދެ ގައުމުން ސިޔާސީ ގުޅުންތައް އަލުން ގާއިމު ކުރި އެވެ.

ޕީއެސްޖީ ހިންގަނީ ގަތަރުންނެވެ. ޕީއެސްޖީ ސައުދީ އަށް ސަތުރު ކުރުމަކީ އެ ގުޅުން ކުރިއަށް ވުރެ ހަރުދަނާ ވެއްޖެ ކަމުގެ ހެއްކެއް ކަމަށް އިންޓަނޭޝަނަލް ރިލޭޝަންގެ ތަޖުރިބާކާރުން ބުނެ އެވެ.