ހުޅުމާލޭގެ މަގުތަކުގައި ރަޖިސްޓްރީ ނަންބަރު ނެތް 370 ވެހިކަލް

ހުޅުމާލޭގެ މަގުތަކުގައި ރަޖިސްޓްރީ ނަންބަރު ނެތް 370 ވެހިކަލް އެބައޮތް ކަމަށް އެޗްޑީސީން އިއްޔެ ބުނެފި އެވެ.

ގަވާއިދާ ހިލާފަށް މަގުތަކުގައި ޕާކުކޮށްފައި ހުރި ވެހިކަލްތައް ބަލައި އެޗްޑީސީން ހެދި ސާވޭގެ ރިޕޯޓުގައި ބުނީ ރަޖިސްޓްރީ ނަންބަރު ނެތް ގިނަ ވެހިކަލްތަކުގެ އިތުރުން ބޭނުންނުކުރެވޭ ވަރަށް ހަލާކުވެފައިވާ 46 ވެހިކަލް ވެސް ހުޅުމާލޭގެ މަގުތަކުގައި އެބައޮތް ކަމަށެވެ.

އޭގެ ތެރޭގައި ސައިކަލާއި ކާރާއި ވޭނާއި ޕިކަޕު ވެސް ހިމެނެ އެވެ.

އެ ވެހިކަލްތައް އޮތް މަގާއި އޭގެ ފޮޓޯ ވެސް އެޗްޑީސީގެ ސާވޭ ރިޕޯޓުގައި ހިމަނާފައިވެ އެވެ. ގިނަ ވެހިކަލްތައް އޮތީ ހުޅުމާލެ އިންޑިސްޓްރިއަލް ސަރަހައްދުގެ މަގުތަކުގަ އެވެ.

އެޗްޑީސީން ބުނީ ހުޅުމާލޭގައި ގަވާއިދާ ހިލާފަށް ވެހިކަލްތައް ޕާކުކޮށްފައި ހުރުމުގެ ސަބަބުން އެ އަވަށުގައި ދިރިއުޅޭ މީހުންނާއި ޒިޔާރަތްކުރާ މީހުންނަށް ގިނަ ދަތިތަކާ ކުރިމަތިވަމުންދާ ކަމަށެވެ.

އެހެންވެ، ހުޅުމާލޭގެ ޕާކިން ޒޯންތަކާއި މަގުތަކާ އަދި ހުސްބިންތަކުގައި ގަވާއިދާ ހިލާފަށް ޕާކުކޮށްފައި ހުރި ވެހިކަލްތަކާއި ހަކާލުވެފައި/ސުންބޯޑުގައި ހުރި ވެހިކަލްތައް ޓޯކުރުމުގެ މަސައްކަތް ކަމާބެހޭ އިދާރާތަކާ ގުޅިގެން ކުރިއަށް ގެންދަން ނިންމާފައިވާ ކަމަށެވެ.