އިއްސެގެ މަރު: ވީޑިއޯ އިން ފެންނަނީ ލައިޓް ރަތްވެފައި ހުއްޓާ ދިޔަތަން

ސިނަމާލޭ ބްރިޖްގައި ސައިކަލަކާއި ކާރެއް ޖެހި އެކްސިޑެންޓްގައި، ވިޔަފާރިވެރިޔާ އިސްމާއިލް މޫސާ މަރުވީ، އޭނާ ޓްރެފިކް ލައިޓަށް މަޑުނުކޮށް ދުއްވާފައި ގޮސް ޖެހިގެން ކަން، އާންމުވެފައިވާ ވީޑިއޯއަކުން ފެނިއްޖެ އެވެ.

ހުކުރު ދުވަހު މެންދުރު ފަހު ހިނގި އެކްސިޑެންޓްގައި އިސްމާއިލް (ޖަމްބޯ އިއްސެ) މަރުވީ، އެކްސިޑެންޓްގައި ކާރުގައި ޖެހި، ބިންމަތީގައި ޖެހުނުތާ ހަމަ ކުޑައިރުކޮޅެއްގެ ތެރޭގަ އެވެ. އޭނާ ހޮސްޕިޓަލަށް ގެންދިޔައިރު ވެސް އޮތީ މަރުވެފައި ކަމަށް ވެ އެވެ. އެކްސިޑެންޓްގައި އޭނާ ވެއްޓި ބޯ ޖެހުމާ އެކު، "ލޭގެ ކޯރެއް" އުފެދުނެވެ.

ވީޑިއޯ އިން ފެންނަނީ އިއްސެ، މާލޭ ކޮޅުން ހުޅުމާލެ އަށް ދަނިކޮށް، ހުޅުމާލޭ ކޮޅުން އައި ކާރެއް ހުޅުލެ އަށް ލަނބާލާ ތަނުން އޭގައި ޖެހުނު ތަނެވެ. ވީޑިއޯ އިން ފެންނަނީ މާލެ އިން ހުޅުމާލެ އަށް ދާ ލޭނުގައި އިއްސެ ނޫން މީހަކު ދުއްވައިފައެއް ނެތެވެ. އަދި، ވަރަށް ސާފުކޮށް ފެންނަ ގޮތުގައި ހުޅުމާލޭ ކޮޅުން އައި ހުރިހާ ވެހިކަލެއް، އިއްސެ ލައިޓް ހުރަސްކުރި ގަޑީގައި ނައްޓާލަ އެވެ.

އިއްސެ، 54، އަކީ، މީގެ 22 އަހަރު ކުރިން ދިރިއުޅުން ތައިލެންޑްގެ ބެންކޮކަށް ބަދަލުކުރި ވިޔަފާރިވެރިއެކެވެ. އޭނާ ދިރިއުޅުން ބަދަލުކުރީ އޭރު މާލޭގައި އޭނާ ހިންގަމުން ދިޔަ ފައިވާނުގެ ވިޔަފާރީގައި ދިމާވި މައްސަލަތަކެއްގަ އެވެ.

އޭގެ ފަހުން އެއްގޮތަކަށް ވެސް ރާއްޖެ ނައިސް ހުރުމަށް ފަހު ރާއްޖެ އައީ ނޮވެމްބަރު މަހުގެ 10ގަ އެވެ.

އޭނާ އަކީ މަރުވުމާ ހަމައަށް، ބެންކޮކްގައި ވަރަށް ފުޅާ ދާއިރާއެއްގައި ފައިވާނާއި، މުދާ ފޮނުވައިދިނުމުގެ ހިދުމަތް ދެމުން އައި ވިޔަފާރިވެރިއެކެވެ. އޭނާގެ މަރަކީ، ދިވެހި ވިޔަފާރިވެރިންނަށާއި އާއިލާ އަށް ވެސް ލިބުނު ކުއްލި ޝޮކެކެވެ.