ބްރިޖް އެކްސިޑެންޓްގައި މަރުވީ 22 އަހަރަށް ފަހު ރާއްޖެ އައި ވިޔަފާރިވެރިޔާ ޖަމްބޯ އިއްސެ

ސިނަމާލެ ބްރިޖްގައި މިއަދު މެންދުރު ހިނގި އެކްސިޑެންޓްގައި މަރުވީ، ރާއްޖެ ނައިސް 22 އަހަރު ބެންކޮކްގައި ދިރިއުޅުމަށް ފަހު އެނބުރި ރާއްޖެ އައި ވިޔަފާރިވެރިޔާ ޖަމްބޯ އިސްމާއިލް މޫސާ (ޖަމްބޯ އިއްސެ) ކަމަށް "މިހާރު" އަށް އެނގިއްޖެ އެވެ.

އިއްސެ މަރުވީ އެކްސިޑެންޓް ހިނގިތާ ގާތްގަނޑަކަށް ދިހަ ވަރަކަށް މިނެޓްގެ ތެރޭގަ އެވެ. ހޮސްޕިޓަލަށް ގެންދިޔަ އިރު ވެސް އޭނާ މަރުވެފައިވާ ކަމަށް ވެ އެވެ.

އިއްސެ އަކީ، މީގެ 22 އަހަރު ކުރިން ވިޔަފާރީގައި ދިމާވި މައްސަލަތަކެއްގެ ތެރޭގައި ބެންކޮކަށް އަމިއްލަ އަށް ދިރިއުޅުން ބަދަލުކުރި ވިޔަފާރިވެރި އެކެވެ. އޭނާ، އޭގެ ފަހުން އެއްގޮތަކަށް ވެސް ރާއްޖެ ނައިސް ހުރުމަށް ފަހު ރާއްޖެ އައީ ނޮވެމްބަރު މަހުގެ 10ގަ އެވެ.

ގަލޮޅު ދަނޑުގައި ފައިވާން ފިހާރަތަކެއް ހިންގަމުން ގެންދިޔަ އިއްސެ، ބެންކޮކްގައި ވެސް ކުރީ އެ ވިޔަފާރި އެވެ. އޭނާ ވަނީ ފައިވާން އުފައްދާ ފެކްޓަރީއެއް ވެސް ހިންގައި، ރާއްޖޭގެ ވިޔަފާރިވެރިންނަށް ފައިވާން ވެސް އުފައްދައިދީފަ އެވެ. އޭގެ ފަހުން، އޭނާ މިހާރު ކުރަމުން އަންނަ މަސައްކަތަކީ ބެންކޮކުން ދިވެހި ވިޔަފާރިވެރިންނަށް މުދާ ފޮނުވައިދިނުމުގެ މަސައްކަތެވެ.

އޭނާ ރާއްޖެ އައީ އާއިލާގެ މީހުންނާ ބައްދަލުކޮށްލާށެވެ. އޭނާ ބުނި ގޮތުގައި، 22 އަހަރަށް ފަހު ރާއްޖެ އައިއިރު ހުރިހާ ކަމެއް ބަދަލުވެ، ލިބުނީ ވަރަށް ބޮޑު ހައިރާން ކަމެކެވެ.

ފުލުހުން ބުނިގޮތުގައި، ބްރިޖުގެ ޓްރެފިކް ލައިޓް ކައިރިން ކާރަކާއި ސައިކަލެއް ޖެހިގެން ހިނގި އެ އެކްސިޑެންޓުގެ ރިޕޯޓް ލިބުނީ މެންދުރު 2:30 ހާއިރު އެވެ.

އެކްސިޑެންޓާ ގުޅޭ އިތުރު މައުލޫމާތެއް ފުލުހުން އަދި ނުދެ އެވެ.