އެއާޕޯޓުން 9 ޓޫރިސްޓް ކައުންޓަރު ކުއްޔަށްދެނީ

ވެލާނާ އިންޓަނޭޝަނަލް އެއާޕޯޓުގެ އިތުރު ނުވަ ޓޫރިސްޓު ކައުންޓަރު ކުއްޔަށް ދޫކުރަން ހުޅުވާލައިފި އެވެ.

ވެލާނާ އިންޓަނޭޝަނަލް އެއާޕޯޓު ހިންގާ، އެމްއޭސީއެލް އިން ކުރި އިއުލާނުގައިވާ ގޮތުން ކުއްޔަށް ދެީ ޓޫރިސްޓު ރެޕްރަޒެންޓޭޓިވް ކައުންޓަރުތަކުގެ ތެރެއިން މިވަގުތު ހުސްވެފައިވާ ނުވަ ޖާގަ އެވެ.

އެކަމަށް ޝައުގުވެރިވާ ފަރާތްތަކުން އަންނަ މަހުގެ ދެ ވަނަ ދުވަހުގެ ކުރިން އެކަމާ ގުޅޭ ލިޔެކިޔުން ހުށަހެޅުމަށް ވަނީ އެދިފަ އެވެ. އަދި އެކަމަށް ބޭނުންވާ ޕްރޮމޯސަލް އަންނަ މަހުގެ 16 ގައި ހުށަހެޅުމަށް އެމްއޭސީއެލް އަށް ހުށަހަޅަން ޖެހެ އެވެ.

އެތަނުގެ ކައުންޓަރުތައް ރިސޯޓާއި ގެސްޓްހައުސް އަދި ޑައިވް ސެކްޓަރުތަކާއި ޔޮޓްމެރީނާތަކާއި ޓްރެވަލް އޭޖެންސީތައް ހިންގުމުގެ ހުއްދަ އޮންނަ ފަރާތްތަކަށް ލިބޭނެ އެވެ.

އެއާޕޯޓުން ނުކުންނަ އެރައިވަލް ހޯލުގެ ބޭރުގައި 80 ޓޫރިސްޓު ކައުންޓަރު ހުރެ އެވެ. އެ ކައުންޓަރުތައް މިދިޔަ ނޮވެމްބަރު މަހު ވަނީ އާކޮށްފަ އެވެ.

މިއީ ރާއްޖެއަށް އެންމެ ގިނަ ޓޫރިސްޓުން އަންނަ ދުވަސްވަރު ކަމަށް ވުމުން އެއާޕޯޓަށް ބާރު ބޮޑުވެ އެވެ. ޑިސެމްބަރު މަހު ރާއްޖޭގެ ރިސޯޓުތައް އާންމުކޮށް ފުލްވެ އެވެ.