އޮރެންޖުގެ އަގު ތިން ގުނަ އުފުލިއްޖެ!

މާލޭގެ ބާޒާރުގައި އޮރެންޖުގެ އަގު ތިން ގުނަ އަށް އުފުލިއްޖެ އެވެ.

މާރުކޭޓުގައި މިހާރު އޮރެންޖު ވަރަށް ތަދު އެއްޗަކަށް ވެފައިވާއިރު އަގު އުޅެނީ 10ރ. އާއި 15ރ. އާ ދެމެދުގަ އެވެ. ބާޒާރުން އޮރެންޖެއް ކުރިން 3ރ. އާއި 4ރ. އާ ދެމެދުގެ އަގުތަކެއްގައި ލިބުނެވެ. އެހެންވެ، އޮރެންޖުގެ އަގު މިހާރު ވަނީ ގާތްގަނޑަކަށް ތިން ގުނަ އުފުލިފަ އެވެ.

އޮރެންޖުގެ އިތުރުން އާފަލުގެ އަގު ވެސް ވަނީ ބޮޑުވެފަ އެވެ. ލޯކަލް މާރުކޭޓުގައި ރަތް އާފަލު އުޅެނީ 6ރ. އާއި 10ރ. ދެމެދުގެ އަގުތަކެއްގަ އެވެ. ފެހި އާފަލެއް ވިއްކަނީ 8ރ. އާއި 10ރ. އާ ދެމެދުގެ އަގުތަކެއްގަ އެވެ.

މާރުކޭޓުގައި ތަކެތި ވިއްކާ ވިޔަފާރިވެރިއަކު ބުނީ، ކުރިން އޮރެންޖު ކޭހެއް 400ރ. ލިބުނަސް މިހާރު ކޭހެއް ލިބެނީ 1،200ރ. އަށް ކަމަށެވެ.

"ހޯލްސޭލް ކުރާ ފަރާތްތަކުން އަގުބޮޑުކޮށް މި ވިއްކަނީ. އެ މީހުން ބުނަނީ މިހާރު އޮރެންޖު ނުލިބޭ ކަމަށް،" އޭނާ ބުންޏެވެ.

ބައެއް ވިޔަފާރިވެރިން ބުނީ، ބޭރުން އޮރެންޖު ހޯދުމަށް މިހާރު އުނދަގޫ ކަމަށެވެ. އެހެންވެ، ރާއްޖެއަށް އޮރެންޖު ގެންނަ ވަރު ވަރަށް ބޮޑަށް މަދުވީ ކަމަށް އެ މީހުން ބުނެ އެވެ.