ދިއްލީގައި ރަހުމުކުޑަ މަރެއް؛ ހަށިގަނޑުގެ ބައިތައް ހުރީ އެކި ތަންތަނުގައި ވަޅުލާފައި

އިންޑިޔާގެ ނިއުދިއްލީ މީހަކު އޭނާގެ ލޯބިވެރިޔާ ދަންޖައްސައި މަރާލުމަށް ފަހު 35 ބަޔަށް ކޮށާލައި އެކި ތަންތަނުގައި ވަޅުލައިފި އެވެ.

އަފްތާބް އަމީން ޕޫނާވައްލާ ނަމަކަށް ކިޔާ މި މީހާ މިކަން ކުރީ ލޯބިވެރިޔާ ޝްރައްދާއާ ދޭތެރޭ ދެބަސްވުން ގިނަވެ ހައްލު ނުކުރެވިގެން އައި ރުޅީގައި ކަމަށް ބުނެ އެވެ.

ޝްރައްދާ މަރާލުމަށް ފަހު އޭނާ ގެ ހަށިގަނޑުގެ ބައިތައް ބެހެއްޓީ އެ ދެމީހުން ދިރިއުޅޭ އެޕާޓުމަންޓްގެ ފްރިޖެއްގެ ތެރޭގަ އެވެ. އަދި 18 ދުވަސް ތެރޭ ދިއްލީގެ އެކި ހިސާބުތަކުގައި ބައިތައް ވަޅުލި އެވެ.

ޝްރައްދާ އާއި އަފްތާބް މުމްބައި އިން ފިލައިގެން ދިއްލީއަށް ގޮސް އެއްކޮށް ދިރިއުޅެން ފެށީ އެ ދެމީހުންގެ ގުޅުމަށް ޝްރައްދާގެގެ މައިން ބަފައިން ނުގަބޫލު ވުމުންނެވެ.

ޝްރައްދާގެ އެއްވެސް ހަބަރެއް ނުވެ ކަމެއް ގޯސް ވެގެން އުޅޭ ކަމަށް ޝައްކުވާން ފެށުމުން ދިއްލީގެ ފުލުހުންނަށް ރިޕޯޓުކުރީ އޭނާގެ ބައްޕަ އެވެ. އެއާ އެކު ފުލުހުން އަފްތާބް ހައްޔަރުކޮށް ސުވާލުކުރުމުން ޝްރައްދާ މަރާލި ކަމަށް އެއްބަސްވެ ހަށިގަނޑަށް ހެދި ގޮތް ކިޔައިދިނީ އެވެ. މިހާރު ޝްރައްދާގެ ހަށިގަނޑުގެ ބައިތައް ހޯދުމުގެ މަސައްކަތް އަންނަނީ ކުރިއަށެވެ.