ދިވެހިންނަށް ފައިދާވާނެ ކަންތައްތަކެއް ކުރިއަށް އޮތް 2-3 ދުވަހު ފެންނާނެ: ރައީސް

އެ މަނިކުފާނު މިހާރު އިންޑިއާ އަށް ކުރައްވަމުން ގެންދަވާ ފުރަމާނަ ދަތުރުފުޅާ އެކު، ދިވެހި ރައްޔިތުންނަށް ފައިދާވާނެ ކަންތައްތަކެއް ދެ ގައުމުގެ ގުޅުމުގެ ތެރެއިން ކުރިއަށް 2-3 ދުވަހު ފަހިވާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އެ މަނިކުފާނު އެހެން ވިދާޅުވީ، ނިއު ދިއްލީގައި ދިރިއުޅޭ ދިވެހިންނާ ބައްދަލުކުރައްވަން ބޭއްވި ހަފުލާގަ އެވެ.

"އިރާދަކުރެއްވިއްޔާ މީގެ ނަތީޖާ، ފޮނިމީރުކަން އަޅުގަނޑުމެންނަށް ފެންނާނެ ކުރިއަށް އޮތް ދުވަސްތަކުގައި،" ދިއްލީގައި ރައީސް މުއިއްޒު ހުންނަވާ ހޮޓަލުގައި ބޭއްވި ހަފުލާގައި އެ މަނިކުފާނު ވިދާޅުވި އެވެ.

ރައީސް ފާހަގަކުރެއްވި ގޮތުގައި ރާއްޖެ އާއި އިންޑިއާއާ ދެމެދު އޮންނަނީ ވަރަށް ޒަމާންވީ ގާތްގުޅުމެކެވެ. އަދި އެ މަނިކުފާނުގެ މި ދަތުރުފުޅާ އެކު އެ ގުޅުން އިތުރަށް ބަދަހިކޮށް، ދެ ގައުމަށް ފައިދާވާ ކަންކަން އިތުރަށް ފުރިހަމަވާނެ ކަމަށް ވިދާޅުވި އެވެ.

ރައީސް މުއިއްޒު ވިދާޅުވީ، ރާއްޖެ އިން ބޭރަށް ކުރައްވާ ދަތުރުފުޅުތަކުގެ ތެރެއިން، އެ ގައުމެއްގައި ދިރިއުޅޭ ދިވެހިންނާ ބައްދަލުކުރެއްވުމަށް އަބަދުވެސް އެ މަނިކުފާނު އިސްކަން ދެއްވާ ކަމަށެވެ.

ރައީސް ވިދާޅުވި ގޮތުގައި އެ މަނިކުފާނު ގަސްދު ކުރައްވަނީ ރާއްޖޭގެ ހާރިޖީ ސިޔާސަތުގެ ފުރިހަމަ ފައިދާ ރާއްޖެ އިން ބޭރުގައި ދިރިއުޅޭ ދިވެހިންނަށް ފަހިކޮށްދޭށެވެ. ދިވެހި ހާރިޖީ ސިޔާސަތު ބައްޓަން ކޮށްފައި ވަނީ ވެސް އެ ގޮތަށް ކަމަށް ވިދާޅުވި އެވެ.

"ކޮންމެ ގޮތެއް ވިޔަސް މި ތަނުގައި ހައި ކޮމިޝަން ހުރުމާ އެކީގައި ވާ ފަސޭހަތައް ހުންނަން ޖެހޭނެ އެހެން ދިމަދިމާތަކަށް ވުރެ. އެހެންވީމާ އަޅުގަނޑު އެދެނީ ހައި ކޮމިޝަންގެ ފަރާތުން ތިބޭފުޅުންނަށް މިހާރު ލިބޭ ކޮންސިއުލާ އެހީތެރިކަމާއި އަދިވެސް އެހެން ކަންކަމުގައި މިހާރަށް ވުރެ ރަނގަޅު ކުރަންވީ ކަންތައްތަކީ ކޮބައިތޯ އެނގުން. ދަންނަވަން. އޭރުން އެ ކަންކަމަށް ރަނގަޅު ހައްލެއް ގެންނަން މަސައްކަތް ކުރާނެ،" ރައީސް ވިދާޅުވި އެވެ.

އެ މަނިކުފާނު ވިދާޅުވީ، ރާއްޖެ އާއި އިންޑިއާއާ ދެމެދު ވިޔަފާރީގެ ފުރުސަތުތައް ފަހިކޮށް އެ ކަމަށް މަސައްކަތް ކުރާ މުހިންމު ހަބަކަށް ދިއްލީ ހަދަން ބޭނުންފުޅުވާ ކަމަށެވެ.

އިންޑިއާގެ ވެރިރަށް ދިއްލީގައި އާންމު ގޮތެއްގައި ދިރިއުޅެނީ ދިވެހި ހައި ކޮމިޝަންގެ މުވައްޒަފުންނާއި އެ މީހުންގެ އާއިލާތައް އަދި އެކިއެކި ތަމްރީން ކޯސްތަކަށް އައިސްފައި ތިބޭ ދިވެހިންނެވެ.

ރައީސް މުއިއްޒު މިދިޔަ އަހަރުގެ ނޮވެމްބަރު 17 ގައި ވެރިކަމާ ހަވާލުވެވަޑައިގެންނެވި ފަހުން އިންޑިއާ އަށް ކުރައްވާ ފުރަތަމަ ފުރަމާނަ ދަތުރުފުޅާ ގުޅުވައިގެން، ބީބީސީ އަށް ދެއްވި އިންޓަވިއުއެއްގައި ވިދާޅުވީ ރާއްޖެއަށް ދަތިކަމެއް ކުރިމަތިވާ ކޮންމެ ފަހަރަކު އެހީވާން އިންޑިއާ އޮންނަނީ ތައްޔާރަށް ކަމަށާއި މާލީ ދަތިކަމުން އަރައިގަތުމަށް ވެސް އިންޑިއާގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އެބައޮތް ކަމަށެވެ.

"އިންޑިއާއަށް އަޅުގަނޑުމެންގެ މާލީ ހާލަތު ވަރަށް ރަނގަޅަށް އެނގޭ، އަދި ތަރައްގީގެ އެންމެ ބޮޑު އެއް ބައިވެރިއެއްގެ ގޮތުގައި، އަޅުގަނޑުމެންނަށް ކުރިމަތިވާ ދަތިކަމުގައި އެހީވާން އޮންނަނީ އަބަދުވެސް ތައްޔާރަށް، ކުރިމަތިވާ ގޮންޖެހުންތަކަށް ރަނގަޅު ބަދަލުތަކާއި ހައްލުތައް ހޯދިނުމަށް،" އީމެއިލް މެދުވެރިކޮށް ބީބީސީއަށް ދެއްވި އިންޓަވިއުގައި ރައީސް ވިދާޅުވި އެވެ.

ރައީސް މުއިއްޒު އިންޑިއާ އަށް ފުރަމާނަ ދަތުރުފުޅެއް ފެއްޓެވީ އެ ގައުމުގެ ރައީސް ދުރޫޕަދީ މުރުމޫގެ ދައުވަތަކަށެވެ. އެ މަނިކުފާނަށް އިންޑިއާ އިން ރަސްމީކޮށް މަރުހަބާ ދެންނެވުން މާދަމާ އޮންނާނެ އެވެ. އަދި އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައި ދެ ގައުމުގެ ރަސްމީ ވާހަކަތައް ބާއްވަވައި މުހިންމު އެއްބަސްވުންތަކެއްގައި ސޮއިކުރައްވާނެ އެވެ.

ރައީސް މުއިއްޒުގެ މި ދަތުރުފުޅުގައި ފުރަތަމަ ބައްދަލުރެއްވީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރުއާ އެވެ.

އެ ބައްދަލުވުމަށް ފަހު، ޖައިޝަންކަރު ވިދާޅުވީ، ބޮޑުވަޒީރު ނަރެންދުރަ މޯދީ އާއި ރައީސް މުއިއްޒު މާދަމާ ބައްދަލުކުރައްވައި، ކުރެއްވުމަށް ހަމަޖެހިފައިވާ ރަސްމީ މަޝްވަރާތަކުން، ދެ ގައުމުގެ ރަހުމަތްތެރި ގުޅުން އިތުރަށް ވަރުގަދަވާނެ ކަމަށެވެ.

ރައީސްގެ އަރިހުގައި ދިވެހި ސަރުކާރުގެ މަތީ ފެންވަރުގެ ވަފުދެއް ވެސް ގެންނެވި އެވެ. އޭގެ ތެރޭގައި 10 މިނިސްޓަރަކު ހިމެނިވަޑައިގަންނަވަ އެވެ.