މިނިވަންކުރި ޚެރްސޯނަށް ޒެލެންސްކީ ވަޑައިގެންފި

ރަޝިޔާ ސިފައިން ބާރުގެ ބޭނުންކޮށްގެން ހިފުމަށް ފަހު ރަޝިޔާގެ ބައެއްގެ ގޮތުގައި ކަނޑައަޅާފައި ވަނިކޮށް، ޔޫކްރޭން ސިފައިން ދިން ވަރުގަދަ ހަމަލާތަކުގައި މިނިވަންކުރި ޚެރްސޯން ސަހަރަށް އެ ގައުމުގެ ރައީސް ވޮލޮޑިމީރް ޒެލެންސްކީ މިއަދު ޒިޔާރަތް ކުރައްވައިފި އެވެ.

ވަރުގަދަ ސަލާމަތީ ފިޔަވަޅުތަކަކާއެކު ގިނަ އަދަދެއްގެ ސިފައިންގެ ހިމާޔަތުގައި ޒެލެންސްކީ ޚެރްސޯނަށް ވަޑައިގަތީ މިއަދު މެންދުރެއްހާއިރު އެވެ. ޚެރްސޯނަށް ވަޑައިގެން ޒެލެންސްކީ ވަނީ އެ ސަހަރުގައި ތިބި ޔޫކްރޭންގެ ސިފައިންނާ ބައްދަލުކުރައްވައި ހިތްވަރު ދެއްވައިފަ އެވެ.

އޭނާ ވިދާޅުވީ ޔުކްރޭން ދާނީ ކުރިއަށް ކަމަށާއި، ގައުމުގެ މިނިވަންކަމަށްޓަކައި ސިފައިން ކުރާ މަސައްކަތަށް ތައުރީފު ހައްގު ކަމަށެވެ. އަދި ޔޫކްރޭން އޮތީ ސުލްހަ ގާއިމުކުރުމަށް ތައްޔާރަށް ކަމަށް ވެސް އޭނާ ވިދާޅުވި އެވެ.

ޚެރްސޯނަކީ މިދިޔަ ފެބްރުއަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރޭނާ ދެކޮޅަށް ފެށި ހަނގުރާމައިގައި އެންމެ ފުރަތަމަ ހިފި ތަންތަނުގެ ތެރޭގައި ހިމެނޭ، ސްޓްރެޓީޖިކް ގޮތުން ވަރަށް މުހިންމު ސަހަރެކެވެ. އެހެންކަމުން މި ސަހަރު ރަޝިޔާ ސިފައިންނަށް ގެއްލުމަކީ، ހަނގުރާމައިގައި ރަޝިޔާ ސިފައިންނަށް މިހާތަނަށް ލިބުނު އެންމެ ބޮޑު އެއް ގެއްލުމެވެ.

ރަޝިޔާ ސިފައިން އެ ސަހަރު ހިފީ މިދިޔަ މާޗް މަހުގެ ތެރޭގަ އެވެ. އޭގެ ފަހުން މިދިޔަ ހުކުރު ދުވަހާ ޖެހެންދެން އެ ސަހަރުގެ ފުރިހަމަ ކޮންޓްރޯލް އޮތީ ރަޝިޔާ ސިފައިންގެ އަތްމަތީގަ އެވެ. މީގެ މަހެއްހާ ދުވަސް ކުރިން ޔޫކްރޭން ސިފައިން އެ ސަހަރު ހިފުމަށް ދޭން ފެށި ވަރުގަދަ ހަމަލާތަކުގެ ކުރިމަތީގައި ރަޝިޔާ ސިފައިންނަށް ސާބިތުވެ ތިބެވޭ ގޮތް ނުވުމުން، މަޑުމަޑުން ފަހަތަށް ޖެހެމުން ގޮސް، އެ ސަހަރު ދޫކޮށް ރަޝިޔާ ސިފައިން ފޭބީ މިދިޔަ ހުކުރު ދުވަހު އެވެ.

މިދިޔަ މާޗް މަހަށް ފަހު ޔޫކްރޭން ސިފައިން މިދިޔަ ހުކުރު ދުވަހު އެ ސަހަރަށް ވަނުމާ އެކު، އެ ސަހަރުގެ އާންމުން މަގުތަކަށް ނުކުމެ ޔޫކްރޭން ސިފައިންނާއެކު އުފާ ފާޅުކޮށް، ސިފައިންނާ އެކު އަންނަނީ މިނިވަންކަން ފާހަގަކުރަމުންނެވެ.

ރަޝިޔާ ސިފައިންގެ ބާރުގެ ދަށުން ޚެރްސޯން މިނިވަންކުރުމުގައި ޔޫކްރޭން ސިފައިންނަށް ކާމިޔާބު ލިބުނީ އެމެރިކާ އާއި ނޭޓޯގެ ގައުމުތަކުން ޔޫކްރޭނަށް ފޯރުކޮށްދިން އަސްކަރީ އެހީތެރިކަމުގެ ސަބަބުންނެވެ. އެކަން ފާހަގަކޮށް، ރައީސް ޒެލެންސްކީ މިއަދު ވަނީ އެމެރިކާ އާއި ނޭޓޯގެ ގައުމުތަކަށް ޝުކުރު އަދާކުރައްވައިފަ އެވެ. ޚެރްސޯންގެ މެދުތެރޭގައި އޮންނަ މައިދާނަށް އެއްވެ ތިބި މީހުން ކައިރީގައި ވާހަކަ ދައްކަވަމުން ޒެލެންސްކީ ވިދާޅުވީ ހަނގުރާމައިގައި ޔޫކްރޭނަށް ކުރިއެރުންތައް ލިބުމުގައި، އެމެރިކާ އިން ފޮނުވި، ހައި މޯބިލިޓީ އާޓިލަރީ ރޮކެޓް ސިސްޓަމް (ހިމާސް) ވަރަށް މުހިންމު ދައުރެއް އަދާކުރި ކަމަށެވެ.