އަލިފާނުގެ ހާދިސާ: މޯޗަރީގައި ތިން އަންހެނެއްގެ ހަށިގަނޑު

މ. ނިރުފެހިގޭގައި ހިނގި އަލިފާނުގެ ހާދިސާގައި މަރުވި ތިން އަންހެނެއްގެ ހަށިގަނޑު މޯޗަރީގައި އޮތްކަން "މިހާރު" އަށް އެނގިއްޖެ އެވެ.

އެ ގޭގައި ރޭ އަލިފާން ރޯވެ 10 ބިދޭސީއަކު ވަނީ މަރުވެފަ އެވެ. އެ އެންމެންގެ ހަށިގަނޑު ވަނީ މޯޗަރީ އަށް ގެންގޮސްފަ އެވެ.

ތިން ބުރިއަށް، ލަކުޑި ޑެކް ވެސް ހިމެނޭހެން ހަދާފައި ހުންނަ އެ ގޭގެ މަތީ ދެ ބުރި ހުންނަނީ ލޭބަ ކުއާޓާއެއްގެ ގޮތުގަ އެވެ.

އެނގިފައިވާ ގޮތުގައި މަރުވި މީހުންގެ ތެރޭގައި ތިން އަންހެނުން ހިމެނެ އެވެ. ނަމަވެސް، އެއީ ކޮން ބައެއްކަން ދެނެގަނެވުނު ކަމެއް ނުވަތަ ނޫންކަމެއް އަދި ނޭނގެ އެވެ. މަރުވި މީހުންގެ ތެރޭގައި ގިނައީ އިންޑިއާ މީހުންނެވެ.

އެ ހަށިތައް ފެނުނު އިންޑިއާ ހައި ކޮމިޝަންގެ އޮފިޝަލަކު ވިދާޅުވީ ބައެއް ހަށިތައް ދެނެގަނެވޭ ވަރަށް ވުރެ ބޮޑަށް އޮތީ އަނދައިފައި ކަމަށެވެ. ހަމަ އެއްގޮތަކަށް ވެސް ކާކު ކަން ވަކި ނުކުރެވޭ ވަރުގެ ހަށިތައް އެބަހުރި ކަމަށް އެ އޮފިޝަލް ވިދާޅުވި އެވެ.

އަލިފާނުގްއި މިހާތަނަށް އެންމެ ގިނަ މީހުން މަރުވި މި ހާދިސާގައި ފިހިގެން އައިޖީއެމްއެޗުގައި މިހާރު ފަރުވާދެމުން އަންނަނީ އެންމެ މީހަކަށެވެ. އެ މީހާ އޮތީ ކާކުކަން ދެނެނުގަނެވޭ ވަރަށް ފިހިފަ އެވެ.