ހޯނޑެއްދޫން އިތުރު 69 ކިލޯ ޑްރަގްސް ހޯދައިފި

ވަޅުލާފައި ހުރި އިތުރު 69 ކިލޯ ޑްރަގްސް ހޯނޑެއްދޫ އޮޕަރޭޝަންގައި ހޯދައިފި

02 ނޮވެމްބަރ 2022

ގދ. ހޯނޑެއްދޫގައި ފުލުހުން މީގެ ހަފްތާއެއް ކުރިން ފެށިގެން ހިންގަމުން އަންނަ އޮޕަރޭޝަންގައި މިއަދު އިތުރު 69 ކިލޯ ޑްރަގްސް ހޯދާފައިވާ ކަމަށް ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެ އެވެ.

ކޮމިޝަނަރު ކުރެއްވި ޓްވީޓެއްގައި ވިދާޅުވީ ހޯނޑެއްދޫގައި ވަޅުލާފައި ހުއްޓާ މިދިޔަ މަހުގެ 27 ވަނަ ދުވަހު ފެނުނީ 13 ކިލޯ ޑްރަގްސް ކަމަށާއި އިތުރަށް ކުރި މަސައްކަތުން މިއަދު ވަނީ ހޯނޑެއްދޫންނާއި ކައިރި ފަޅު ރަށަކުން 69 ކިލޯ ޑްރަގްސް ފެނިފައި ކަމަށެވެ.

މަސްތުވާތަކެތި ހޯދަން ގދ. ހޯނޑެއްދޫގައި ހިންގަމުން އަންނަ އޮޕަރޭޝަންގައި، ވަޅުލާފައި ހުއްޓާ ފެނުނު މަސްތުވާތަކެތީގެ ޕެކެޓްތަކެއް. -- ފޮޓޯ: ޕޮލިސް

މިހާތަނަށް ފެނުނު 82 ކިލޯ ޑްރަގްސްގެ ތެރޭގައި މެތު އަދި ހެރޮއިން ހިމެނޭ ކަމަށް ކޮމިޝަނަރު ވިދާޅުވި އެވެ.

ހޯނޑެއްދޫގައި ކުރިއަށްދާ އޮޕަރޭޝަންގައި ހައްޔަރުކުރި މީހުންގެ ތެރެއިން އެކަކު ފުލުހުންގެ ބެލުމުގެ ދަށަށް ގެންދިޔަ ވަގުތު މެޔަށް ތަދެއް އެރުމަށް ފަހު މަރުވި މައްސަލައެއް ޕޮލިސް އިންޓަގްރިޓީ ކޮމިޝަނުން އަންނަނީ ތަހުގީގުކުރަމުންނެވެ. މަރުވި އަބްދުﷲ ރަޝީދުގެ ހަށިގަނޑު މިހާރު ވަނީ ޕޯސްޓް މޯޓަމް ހެދުމަށް އިންޑިއާ އަށް ގެންގޮސްފަ އެވެ.

Apart from 13 kgs of heroin our teams found buried in G.DH Hoadehdhoo on 27/10, @PoliceMv teams have done commendable work to find 69 kgs of narcotic drugs buried in G.DH Hoadehdhoo and a close by uninhabited island today. Taking it to a total 82 kgs of both meth & heroin. pic.twitter.com/ZZCLL0QxXW
— Mohamed Hameed (@M_Hameedh) November 2, 2022

އާއިލާ އިން ބުނާ ގޮތުގައި ރަޝީދު މަރުވީ ފުލުހުން އޭނާ ހައްޔަރުކުރި ވަގުތުން ފެށިގެން މެޔަށް ތަދުވާ ކަމަށް ބުނެ ފަރުވާ އަށް އެދެމުން ދިޔައިރު ވެސް ފަރުވާ ނުދީ ލަސްކުރުމުގެ ސަބަބުންނެވެ.

Comments