މިދިޔަ ތިން އަހަރު ސަބްސިޑީގެ ގޮތުގައި ހަތަރު ބިލިއަން ރުފިޔާ!

މިދިޔަ ދިޔަ ތިން އަހަރުގެ ތެރޭގައި ސަބްސިޑީގެ ގޮތުގައި ސަރުކާރުން 4.1 ބިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީން ބުނެފި އެވެ.

ފާއިތުވި ތިން އަހަރު ދައުލަތުގެ ބަޖެޓުން ސަބްސިޑީ އަށް ހޭދަކުރި ޖުމްލަ އަދަދު ހޯދަން މާފަންނު މެދު ދާއިރާގެ އެމްޑީޕީގެ މެންބަރު އިބްރާހިމް ރަޝީދު (ބޮންޑޭ) ކުރެއްވި ސުވާލަކަށް، ލިޔުމުން ޖަވާބު ދެއްވަމުން ފިނޭންސް މިނިސްޓަރު އިބްރާހިމް އަމީރު ވަނީ އެ އަހަރުތަކުގައި ދައުލަތުން ސަބްސިޑީ އަށް ކުރި ހަރަދުތަކުގެ ތަފްސީލު ދެއްވައިފަ އެވެ.

ދައުލަތުގެ މިދިޔަ އަހަރުގެ ބަޖެޓުން 1.5 ބިލިއަން ރުފިޔާ ސަބްސިޑީގެ ގޮތުގައި ހަރަދު ކޮށްފައިވެ އެވެ. އޭގެ ތެރޭގައި ކަރަންޓާއި ފެން އަދި ކާބޯތަކެތި އަގުހެޔޮ ކުރަން 1.01 ބިލިއަން ރުފިޔާ ހޭދަކޮށްފައިވާއިރު، ސަބްސިޑީގެ ގޮތުގައި 99 މިލިއަން ރުފިޔާ އަދި ތެލުގެ ސަބްސިޑީ އަށް 460 މިލިއަން ރުފިޔާ ހޭދަކުރި އެވެ. ޕްރީސްކޫލްތައް ހިންގުމަށް ސަރުކާރުން ވަނީ 20 މިލިއަން ރުފިޔާ ހޭދަކޮށްފަ އެވެ.

ޖުމްލަ ސަބްސިޑީގެ ގޮތުގައި 2019 ވަނަ އަހަރު 1.3 ބިލިއަން ރުފިޔާ ހަރަދުކޮށްފައިވާއިރު 2020 ވަނަ އަހަރު ހޭދަކުރީ 1.2 ބިލިއަން ރުފިޔާ އެވެ.

މަސްވެރިންގެ ތެލަށް ކުރާ ހަރަދުތަކާ ގުޅޭގޮތުން ބޮންޑޭ ކުރެއްވި ސުވާލުގެ ޖަވާބުގައި ފިނޭންސް މިނިސްޓްރީން ބުނީ، މިދިޔަ އަހަރު 1.3 މިލިއަން ރުފިޔާ އެ ކަމަށް ހަރަދުކުރި ކަމަށެވެ. މަސްވެރިންނަށް ތެޔޮ ދޫކުރުމަށް 2020 ވަނަ އަހަރު ހޭދަކުރީ 1.3 މިލިއަން ރުފިޔާ އެވެ. އަދި 2019 ވަނަ އަހަރު ތެލަށް ހަރަދުކޮށްފައި ވަނީ 167،280ރ. އެވެ.

ފިނޭންސް މިނިސްޓްރީން ބުނިގޮތުގައި، ސަރުކާރުން ކާބޯތަކެއްޗަށް ދޭ ސަބްސިޑީގެ 0.1 ޕަސެންޓު ފިޔަވައި ހުރިހާ ސަބްސިޑީއެއް ދޭނީ އިންޑައިރެކްޓް ސަބްސިޑީގެ ގޮތުގައި ތަކެތި ނުވަތަ ހިދުމަތް ފޯރުކޮށްދޭ ފަރާތަށެވެ. އެހެންވެ، އެއީ ފަގީރުންނަށް ހާއްސަކޮށް ދޭ ސަބްސިޑީއެއްގެ ބަދަލުގައި ހުރިހާ އެންމެނަށް ވެސް ލިބޭ ސަބްސިޑީއެކެވެ.

ސަބްސިޑީގެ ފައިދާ މިހާރު ލިބޭ ފަރާތްތަކުގެ ތެރޭގައި މުއްސަނދިންނާއި ބިދޭސީންނާއި ވިޔަފާރިތަކުގެ އިތުރުން ޓޫރިސްޓުން ވެސް ހިމެނޭ ކަމަށް އެ މިނިސްޓްރީން ބުންޏެވެ. އަދި ވިޔަފާރިތަކަށް ދޭ ސަބްސިޑީއަކީ އެ ހައްގުވާ ހުރިހާ ވިޔަފާރިއަކަށް އެއްވަރަކަށް ދޭ ސަބްސިޑީއެކެވެ.

ފަގީރު ހާލުގައި އުޅޭ އާއިލާތަކަށް ކާބޯތަކެތީގެ ސަބްސިޑީ ފޯރުކޮށްދެނީ، ފިނޭންސް މިނިސްޓްރީން ބުނިގޮތުގައި، ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) މެދުވެރިކޮށެވެ. އަމިއްލަ އަށް އެދުމުން ދޭ އެ ސަބްސިޑީ އަށް ޝަރުތު ހަމަވާ އާއިލާއެއްގެ ގޮތުގައި ބަލަނީ ރާއްޖޭގެ ޕަވަޓީ ލައިނަށް ވުރެ މަދުން އާމްދަނީ ލިބޭ އާއިލާތަކެވެ.