ފިކުރީ ހަނގުރާމަތަކުން ސަލާމަތްވާން ގައުމިއްޔަތު ދިރުވަންޖެހޭ: ރައީސް

ގައުމިއްޔަތަށް ނުރައްކާ ކުރަމުންދާ ފިކުރީ ހަނގުރާމަތަކުން ސަލާމަތް ކުރުމަށްޓަކައި ގައުމިއްޔަތު ދިރުވަންޖެހޭ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.

މި އަހަރުގެ ގައުމީ އިނާމު ދިނުމަށް މިރޭ ބޭއްވި ޖަލްސާގައި އެ މަނިކުފާނު ވިދާޅުވީ، ގައުމިއްޔަތާ ދެކޮޅަށް ހަމަލާތައް އަމާޒު ކުރަނީ ހަތިޔާރު ބޭނުންކޮށްގެން މީހުންގެ ފުރާނަ އަށް ނޫން ކަމަށާއި އެ ހަމަލާތައް އަމާޒުވަނީ ރައްޔިތުންގެ ވިސްނުމާއި ފިކުރަށް ކަމަށެވެ. އެ ކަންކަމުން ދިފާއުވުމަށްޓަކައި ކުރަންޖެހޭ އެންމެ މުހިންމު ކަމަކީ އެންމެންގެ ހިތްތަކުގައި ގައުމީ ލޯބި ދިރުވުން ކަމަށް ވެސް ރައީސް ވިދާޅުވި އެވެ.

"އެ ހަނގުރާމައިން ދިފާއުވެ، ގައުމިއްޔަތު ދިރުވުމަށްޓަކައި އަޅުގަނޑުމެންގެ ހިތްތަކުގައި އުފައްދަންވީ ގައުމީ ލޯބި." ދަރުބާރުގޭގައި ބޭއްވި ޖަލްސާގައި ރައީސް އިބްރާހިމް މުހައްމަދު ސޯލިހު ވިދާޅުވި އެވެ.

ރާއްޖެ އަޅުވެތިކަމުން ސަލާމަތްކުރަން އުތީމު ތިން ބެއިން ކުރެއްވި މަތިވެރި ޖިހާދު ފާހަގަ ކުރައްވައި، ރައީސް ވިދާޅުވީ އެ ކަންކަމުން އެނގެނީ ރާއްޖެއާ މެދު އެ ބޭފުޅުންގެ ހިތްތަކުގައި އޮތް ލޯބި ކަމަށެވެ. ގައުމު ދެކެ ލޯބިވުމަކީ އެ ތަނެއްގެ ހުރިހާ ސަގާފަތާއި ސިފަތަކަށް ލޯބިވުން ކަމަށް ވިދާޅުވި އެވެ.

"މި ހަމައިން ގައުމަކާ މެދު ދެކެން ފަށައިފި ނަމަ، އެ ގައުމެއްގައި ދިރިއުޅޭ ރައްޔިތުންގެ ހިތްތަކުގައި ގައުމިއްޔަތަށް ވުރެ އަގު މާތް ޖައުހަރެއް ނޯންނާނެ،" އެ މަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި ގައުމިއްޔަތު ކުރިއެރުވުން ގުޅިފައި އޮތީ އެ ތަނެއްގެ ހަމަޖެހުމެއްގެ މައްޗަށެވެ. ގުޅި ލާމެހިފައިވާ ދުނިޔެއެއްގައި އުޅޭއިރު އެހެން ގައުމުތަކާ ގުޅުން ބަދަހި ކުރަންޖެހޭ ކަމަށް ވިދާޅުވި އެވެ.

ރައީސް އިބްރާހިމް މުހައްމަދު ސޯލިހު ވިދާޅުވީ، ޑިމޮކްރަޓިކް މުޖްތަމައެއްގައި އުޅޭއިރު، ހެދިފައި އޮންނަ އުސޫލުތަކާއި ގާނޫނުތަކަށް އިހްތިރާމް ކުރަންޖެހޭ ކަމަށާއި ގައުމިއްޔަތުގެ މަތީގައި ދެމިތިބުމަށްޓަކައި އެ އުސޫލުތައް ހިފަހައްޓަންޖެހޭ ކަމަށެވެ.

މިރޭގެ ޖަލްސާގައި ގައުމީ އިނާމު 32 ފަރާތަށް ދިނެވެ. ޝަރަފުވެރިކަމުގެ އިނާމު 10 ބޭފުޅަކަށް އަދި ހިތްވަރު ދިނުމުގެ އިނާމު 19 ބޭފުޅަކަށާއި ތިން ފަރާތަށް އެރުވި އެވެ.