ބޮޑު އިނާޔަތް ނުކަނޑައި އިތުރަށް ޓެކްސް ނަގަން ތާއީދުކުރުން ބަލައެއް ނުގަނެވޭ: އެމްއެންޕީ

ރައްޔިތުންގެ މަޖިލީހުގެ ކުރީގެ މެމްބަރުންނަށް ގާނޫނޫން މިހާރު ލިބިވަޑައިގަންނަވާ ބޮޑު އިނާޔަތް ކަނޑައިލުމާ މަޖިލީހުން ދެކޮޅު ހެދުމަށް ފަހު، ރައްޔިތުންގެ އަތުން އިތުރަށް ޓެކްސް ނެގުމުގެ އިސްލާހު ބަލައިގަތުމަކީ އިންސާފުވެރި ނިންމުމެއް ނޫން ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) އިން މިއަދު ބުނެފި އެވެ.

މަޖިލީހުގެ ކުރީގެ މެމްބަރުންނަށް ދައުލަތުގެ ބަޖެޓުން ކޮންމެ މަހަކު ކުރާ ހޭދަ ހުއްޓާލަން އިމްތިޔާޒްތަކާ ބެހޭ ގާނޫނަށް އިސްލާހް ހުށަހެޅުއްވީ ވިލިމާލެދާއިރާގެ އެމްއެންޕީގެ މެމްބަރު އަހުމަދު އުޝާމެވެ. މަޖިލިހަށް ފުރަތަމަ ކިޔުން އިއްވާފައިވާ އެ ބިލް ބަލައިނުގަތުމަށް މަޖިލީހުގައި ހާޒިރުވެ ތިއްބެވި 62 މެމްބަރުންގެ ތެރެއިން 31 މެމްބަރަކު އިއްޔެ ވޯޓު ދެއްވި އެވެ. ބަލައިގަތުމަށް ވޯޓު ދެއްވީ އެންމެ ފަސް މެމްބަރެކެވެ.

އެ ބިލަށް ފަހު ޓެކްސް ބޮޑުކުރުމުގެ ބިލް ބަލައިގަތުމަށް 32 މެމްބަރުންގެ ވޯޓުން އިއްޔެ ފާސްކުރި އެވެ.

އެކަމާ ގުޅިގެން، އެމްއެންޕީގެ ޕާލަމެންޓްރީ ގްރޫޕްގެ ލީޑަރު، ތިމަރަފުށީ ދާއިރާގެ މެމްބަރު އަބްދުﷲ ރިޔާޒް މިއަދު ވިދާޅުވީ މަޖިލީހުގެ އިއްޔެ ނިންމުން ވަރަށް ދެރަވަރު ކަމަށެވެ. އެއީ ރައްޔިތުންނަށް އިންސާފުވެރި ނިންމުމެއް ނޫން ކަމަށް ވިދާޅުވި އެވެ.

އޭނާ ވިދާޅުވި ގޮތުގައި މަޖިލީހުގައި ފަސް އަހަރުގެ ދައުރެއް ފުރުއްވައިފި ނަމަ ވެސް ގާނޫނުގައި އޮންނަނީ ބޮޑު އިނާޔަތެއް ލިބޭ ގޮތަށެވެ. އެކަމަކު ސަރުކާރުގެ ހިދުމަތުގައި 30-40 އަހަރު ހޭދަކުރާ ހިދުމަތްތެރިންނަށް ލިބެނީ މެމްބަރުންނާ ބަލާއިރު ނިސްބަތުން ކުޑަ ހިދުމަތާ ނުބައްދަލު އަދަދެކެވެ.

"އެތައް އަހަރަކު ސަރުކާރަށް ހިދުމަތް ކޮށްފައި ތިއްބެވި ބޭފުޅުންނަށް އެ ލިބެނީ ހައްގު ޕެންޝަނެއް ނޫން. އަޅުގަނޑުމެން ވަކާލާތު ކުރަމުން މި އަންނަނީ ހިދުމަތްތެރިން ބަލައިގަނެ އަގު ވަޒަންކުރަން،" ރިޔާޒް ވިދާޅުވި އެވެ.

މަޖިލީހުގެ އިމްތިޔާޒްތަކާއި ބާރުގެ ގާނޫނު 2013 ގައި ފާސްކޮށްފައި އޮތީ ރައްޔިތުންގެ މަޖިލިހުގެ ކުރީގެ މެމްބަރުންނަށް ޑިޕްލޮމެޓިކް ޕާސްޕޯޓާއި ވީއައިޕީގެ ހިދުމަތާއި އިންޝުއަރެންސާއި އިތުރު ހިދުމަތް ވެސް ލިބޭ ގޮތަށެވެ.

އެއް ދައުރު ފުރިހަމަ ކުރައްވާފައި ތިއްބެވި ބޭފުޅުން މެމްބަރަކަށް ހުރި އިރު ލިބެ މުސާރައިގެ 30 ޕަސެންޓް ލިބެން ޖެހޭނެ ކަމަށް އެ ގާނޫނުގައި ވަނީ ބުނެފަ އެވެ. މި އިނާޔަތް ލިބެން ފަށާނީ އުމުރުން 55 އަހަރު ފަހުންނެވެ.

ދެ ދައުރު ފުރިހަަމަ ކުރައްވާފައިވާ ބޭފުޅަކަށް، އެ ބޭފުޅަކު މެމްބަރަކަށް ހުންނެވި އިރު ލިބިވަޑައިގެންނެވި މުސާރައިގެ 45 ޕަސެންޓު ލިބޭނެ ކަމަށް އިމްތިޔާޒު ގާނޫނުގައި ވަނީ ބުނެފަ އެވެ.

އަމިއްލަ އަށް މުސާރަ ކަނޑައަޅައިގެން ތިއްބަވާ މަޖިލީހުގެ މެމްބަރުން، ދައުރު ނިންމާލެއްވުމަށް ފަހު ވެސް ދައުލަތުން ބޮޑު އިނާޔަތެއް ނަންގަވާ ގޮތަށް މަޖިލީހުގެ އިއްޔެގެ ނިންމުން ރަނގަޅު ނޫން ކަމަށް ރިޔާޒް ވިދާޅުވި އެވެ.

"ހަމައެއާއެކު ރައްޔިތުންގެ އިތުރަށް ޓެކްސް ނަގަން ތާއީދުކޮށް ބިލް ބަލައިގަތުމަށް ނިންމީ. ރައްޔިތުން އިންތިހާބުކޮށްފައި ތިބި މެމްބަރުން މި ގޮތަށް ކަންކުރެއްވުން ރަނގަޅެއް ނޫން،" ރިޔާޒް ވިދާޅުވި އެވެ.

ބިލް މަޖިލީހަށް ހުށަހެޅުއްވި އުޝާމް ވިދާޅުވެފައިވާ ގޮތުގައި ކުރީގެ މެމްބަރުންނަށް އިނާޔަތް ކަނޑާލަން ހުށަހެޅުއްވީ އެއީ ގިނަ ބަޔަކު ވެސް އެކަން ބަދަލުކުރަން އެދޭތީ އެވެ. މަޖިލީހަކީ އިންސާފުވެރި، އަދި ރައްޔިތުންގެ އިހުތިސާސްތަކާ އެއްގޮތަށް ކަންކަން ނިންމަން ޖެހޭ ތަނަކަށް ވާތީ ކަމަށް އޭނާ ވިދާޅުވި އެވެ.