ރާއްޖޭގެ ހާލަތު ބަދަލުކުރަން ބޭނުންވާ ނަމަ އޮތް ހަމައެކަނި ޗޮއިސްއަކީ ނާޒިމް: އުޝާމް

ރާއްޖޭގައި ހުރި ބޮޑެތި މައްސަލަތައް ހައްލުކޮށް، ދިވެހިންގެ ހާލަތު ބަދަލުކުރަން ބޭނުން ނަމަ މި ފަހަރުގެ ރިޔާސީ އިންތިހާބުގައި އެމްއެންޕީގެ ރިޔާސީ ކެންޑިޑޭޓް މުހައްމަދު ނާޒިމަށް ވޯޓު ދިނުން ނޫން އިތުރު ޗޮއިސްއެއް ނެތް ކަމަށް އޭނާގެ އިންތިހާބީ އެޖެންޓް އަހުމަދު އުޝާމް މިރޭ ވިދާޅުވެއްޖެ އެވެ.

ނާޒިމްގެ ރިޔާސީ ކެމްޕެއިނަށް ތ. ތިމަރަފުށީގައި ބޭއްވި ޖަލްސާގައި ވިލިމާލެ ދާއިރާގެ މެމްބަރު އުޝާމް ވިދާޅުވީ، އަންނަ މަހުގެ 9 ގައި ބާއްވާ ރިޔާސީ އިންތިހާބުގައި ވޯޓު ދިނުމުގައި ރައްޔިތުން ނިންމަންވީ އެންމެ ތައުލީމި، ގާބިލު މީހާ ހޮވުމަށް ކަމަށެވެ. ވޯޓު ދެނީ ނަޒާހަތްތެރި، ތެދުވެރި، ފަސްބައިގައި ކިލަނބު ކަމެއް ނެތް އަދި ލީޑަޝިޕް ދައްކާ ކެންޑިޑޭޓަކަށް ކަން ވެސް ރައްޔިތުން ވިސްނަން ޖެހޭ ކަމަށް އޭނާ ވިދާޅުވި އެވެ.

"އެ ހުރިހާ ކަމަކަށް ބަލާ ކަމުގައިވީ ނަމަވެސް، ކުރިއަށް މި އޮތް އިންތިހާބުގައި ތިބޭފުޅުން ފާހަގަލާން ޖެހޭ އިތުރު ޗޮއިސެއް އޮތް ކަމަކަށް އަޅުގަނޑު ނުބަލަން. ތިބޭފުޅުންނަށް އޮތް ހަމައެކަނި ޗޮއިސަކީ އަޅުގަނޑުމެންގެ ކެންޑިޑޭޓް މުހައްމަދު ނާޒިމް،" އުޝާމް ވިދާޅުވި އެވެ.

"ރާއްޖެއަށް ދިމާވެފައި އޮތް ބޮޑެތި މައްސަލަތަކަށް ހައްލެއް ހޯދުމަށް ތިބޭފުޅުން ބޭނުންވާ ކަމުގައި ވަނީ ނަމަ، ދިވެހި ރައްޔިތުންނަށް މި އިންތިހާބުގައި އޮތް ޗޮއިސްއަކީ އަޅުގަނޑު ގަބޫލުކުރާ ގޮތުން އަޅުގަނޑުމެންގެ ކެންޑިޑޭޓް މުހައްމަދު ނާޒިމް."

އުޝާމް ވިދާޅުވި ގޮތުގައި، މާޒީގައި ކަންކަން ހިނގާފައި އޮތް ގޮތަށް ބަލާ ނަމަ، އޭރަކު ވެރިކަމުގައި ތިބޭ ޕާޓީއަކަށް ތާއިދު ނެތް ދާއިރާތަކުގެ ރަށްރަށަށް ތަރައްގީ ކުރަން ސަރުކާރުތަކުން ކަންކަން ނުކޮށްދީ އެބަހުއްޓެވެ. ނަމަވެސް، އެމްއެންޕީގެ ވެރިކަމެއްގައި ސިޔާސީ ގޮތުން ހިޔާލު ތަފާތުވާ ދާއިރާތަކަށް ވެސް އެއްވެސް ތަފާތު ކުރުމެއް ކަންކަން ކޮށްދެއްވާނެ ކަމުގެ ޔަގީންކަން އޭނާ ދެއްވި އެވެ.

މި ރިޔާސީ އިންތިހާބަށް އެންމެ ފުރިހަމަ މެނިފެސްޓޯއެއް ދެއްކި ހަމައެކަނި ކެންޑިޑޭޓަކީ ވެސް ނާޒިމް ކަމަށް އުޝާމް ވިދާޅުވި އެވެ. އޭނާ ވިދާޅުވީ އެ މެނިފެސްޓޯގައި ނޫނީ ސިޔާސަތުތައް ތަންފީޒު ކުރާނެ ގޮތުގެ ފުރިހަމަ ޕްލޭނެއް ހިމަނާފައި ނެތް ކަމަށެވެ.