އިންޑިއާގެ ޕްރޮޖެކްޓުތައް އަވަސްކުރަން ދޫކުރާ 100 މިލިއަން ޑޮލަރުގެ އެއްބަސްވުމުގައި ސޮއިކޮށްފި

ރާއްޖޭގައި އިންޑިއާއިން ފަށާފައިވާ އުމްރާނީ ތަރައްގީގެ މަޝްރޫއުތައް އަވަސްކުރުމަށް އެ ގައުމުން ދޭން ނިންމި، އިތުރު 100 މިލިއަން ޑޮލަރުގެ ކްރެޑިޓް ލައިންގެ އެއްބަސްވުމުގައި މިއަދު ސޮއިކޮށްފި އެވެ.

އެ އެއްބަސްވުމުގައި ސޮއިކުރީ އިންޑިއާގެ ފޮރިން ސެކްރެޓަރީ، ވިނޭ މޯހަން ވަތުރާ ރާއްޖެ މިހާރު ކުރައްވަމުން ގެންދަވާ ރަސްމީ ދަތުރުގައި މިއަދު ފޮރިން މިނިސްޓްރީގައި ބޭއްވި ހާއްސަ ރަސްމިއްޔާތެއްގަ އެވެ.

ރާއްޖޭގެ ފަރާތުން އެ އެއްބަސްވުމުގައި ސޮއިކުރެއްވީ ފިނޭންސް މިނިސްޓަރު އިބްރާހިމް އަމީރެވެ. އިންޑިއާގެ ފަރާތުން ސޮއިކުރެއްވީ އިންޑިއާގެ އެގްޒިމް ބޭންކްގެ ޖެނެރަލް މެނޭޖަރު ނިރުމިތު ވެދު އެވެ.

އެއީ އިންޑިއާގެ ބޮޑުވަޒީރު ނަރެންދުރަ މޯދީ ދައުވަތަކަށް ރައީސް އިބްރާހިމް މުހައްމަދު ސޯލިހު މިދިޔަ މަހު އެ ގައުމަށް ކުރެއްވި ރަސްމީ ދަތުރުފުޅުގައި މޯދީ އިއުލާންކުރެއްވި އެހީއެކެވެ.

"އިންޑިއާ އިން ރާއްޖޭގައި މިހާރު ހިންގަމުން އަންނަ ޕްރޮޖެކްޓްތައް ކަނޑައެޅިފައިވާ ތާރީހަށް ނިންމުމުގެ ގޮތުން މަސައްކަތް އަވަސްކުރުމަށް އިތުރު 100 މިލިއަން ޑޮލަރުގެ ލައިން އޮފް ކްރެޑިޓް ދިނުމަށް ވެސް ވަނީ ނިންމައިފައި،" އެ ދުވަހު މޯދީ ވިދާޅުވި އެވެ.

ލައިން އޮފް ކްރެޑިޓަކީ ލޯނާ ޚިލާފަށް، ކަނޑައަޅާ ވަކި ކްރެޑިޓް ލިމިޓެއްގެ ތެރެއިން އެފަހަރަކު ބޭނުންވާ އަދަދަކަށް ފައިސާ ނެގޭ އެއްބަސްވުމެކެވެ. އަނބުރާ ދައްކަން ޖެހޭނީ ކްރެޑިޓް ލިމިޓްގެ ތެރެއިން ބޭނުންކުރި އަދަދެވެ. އޭގެ ތެރޭގައި ޕްރިންސިޕަލް އެމައުންޓާއި އިންޓަރެސްޓް ހިމެނޭނެ އެވެ. ލައިން އޮފް ކްރެޑިޓް އެއްބަސްވުން އޮތްހާ ހިނދަކު އަބަދުވެސް އެ ލިމިޓްގެ ތެރެއިން ފައިސާ ނެގޭގެ އެވެ.

އިންޑިއާ އިން ރާއްޖޭގައި ގިނަ ޕްރޮޖެކްޓުތަކެއް ހިންގާއިރު، މި ސަރުކާރުގެ އުމްރާނީ ތަރައްގީގެ އެންމެ ބިޔަ މަޝްރޫއު ކަމަށްވާ މާލެ، ވިލިމާލެ، ތިލަފުށި އަދި ގުޅިފަޅު ގުޅުވާލާ "ތިލަމާލެ ބްރިޖު"ގެ މަސައްކަތް ވެސް ކުރަނީ އިންޑިއާގެ ލޯނު އެހީގަ އެވެ. އެ ޕްރޮޖެކްޓުގެ ފުރަތަމަ ފިޔަވަހި، މާލެ އާއި ވިލިމާލެ ގުޅުވާލުން އަންނަ އަހަރު މެދުތެރޭގައި ނިންމާލާނެ ކަމަށް ސަރުކާރުން ބުނެ އެވެ.

ކަރެކްޝަންސް އަށް 30 މީހުންގެ ޖާގައިގެ ލޯންޗެއް

މިއަދުގެ ރަސްމިއްޔާތުގައި އިންޑިއާ ސަރުކާރުން މޯލްޑިވްސް ކަރެކްޝަނަލް ސާވިސް އަށް ހަދިޔާކުރި ލޯންޗު ވެސް ހަވާލުކޮށްފައިވެ އެވެ. އެއީ އިންޑިއާގެ ކުރީގެ އެކްސްޓާނަލް އެފެއާޒް މިނިސްޓަރު ސުޝްމާ ސުވަރާޖު 2019 ވަނަ އަހަރު ރާއްޖެ އަށް ކުރެއްވި ދަތުރުގައި ރާއްޖޭގެ އިޖުތިމާއީ އަދި އިގުތިސާދީ ދާއިރާ އަށް އެހީވުމުގެ ގޮތުން ދިން 106 މިލިއަން ރުފިޔާގެ ފައިސާގެ އެހީގެ ދަށުން ދިން ލޯންޗެކެވެ.

އެ އެހީގެ ދަށުން މީގެ ކުރިން ވެސް ވަނީ ކަރެކްޝަންސް އަށް ހަތަރު ވޭނާއި ކާރެއް ހަދިޔާކޮށްފަ އެވެ.

ކަރެކްޝަންސްގެ ފަރާތުން އެ އުޅަނދާ ހަވާލުވެވަޑައިގަތީ ޕްރިޒަން ކޮމިޝަނަރު އަހްމަދު މުހައްމަދުފުޅެވެ.

އިއްޔެއިން ފެށިގެން މާދަމާގެ ނިޔަލަށް އިންޑިއާގެ ފޮރިން ސެކްރެޓަރީ ރާއްޖެއަށް ކުރައްވާ ދަތުރަކީ ރާއްޖޭގެ ފޮރިން ސެކްރެޓަރީ އަހުމަދު ލަތީފްގެ ދައުވަތަކަށް ކުރައްވާ ރަސްމީ ދަތުރެކެވެ.

މިއީ މި އަހަރުގެ މޭ މަހުގެ ތެރޭގައި އިންޑިއާގެ ފޮރިން ސެކްރެޓަރީގެ މަގާމަށް، ވިނޭ އައްޔަން ކުރެއްވި ފަހުން، އޭނާ ރާއްޖެއަށް ކުރައްވާ ފުރަތަމަ ދަތުރެވެ.

ފޮރިން މިނިސްޓްރީން ބުނި ގޮތުގައި ވިނޭގެ ދަތުރުފުޅުގައި އިންޑިއާ އިން ރާއްޖޭގައި ހިންގާ އެކި މަޝްރޫއުތަކާ ގުޅޭ މަޝްވަރާތައް ވެސް ކުރިއަށް ދާނެ އެވެ. އަދި ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުރުން ޑިފެންސް މިނިސްޓަރު މާރިޔާ އަހުމަދު ދީދީ އާއި ފިނޭންސް މިނިސްޓަރު އިބްރާހިމް އަމީރު އަދި އިކޮނޮމިކް މިނިސްޓަރު ފައްޔާޒު އިސްމާއިލްއާ ވެސް އިންޑިއާގެ ފޮރިން ސެކްރެޓަރީ ބައްދަލުކުރައްވާނެ އެވެ.