އެފްއޭއެމްގެ އެހީއާއެކު ފީފާގެ އަދަބުން ސަލާމަތް ވެވޭނެ: ގްރީން

އެފްއޭއެމުން ދޭން ޖެހޭ ފައިސާ ފޯރުކޮށްދޭނެ ކަމުގެ ޔަގީން އެ އެސޯސިއޭޝަނުން ދީފައިވާ ކަމަށާއި އެއާއެކު ކްލަބަށް މިހާރު ކުރިމަތިވެފައިވާ ފީފާގެ އަދަބުން ސަލާމަތް ވެވޭނެ ކަމުގެ ޔަގީންކަން ކްލަބް ގްރީން ސްޓްރީޓްސްއިން ދީފި އެވެ.

މިދިޔަ ސީޒަންގައި ގްރީން އަށް ކުޅުނު އޭންޖަލް މުނޯޒް އަށް މުސާރަ ދީފައި ނުވުމުން، އާ ކުޅުންތެރިން ސޮއި ނުކުރެވޭ ގޮތަށް، ފީފާފެ ފުޓްބޯލް ޓްރައިބިއުނަލްއިން ވަނީ އެ ކްލަބާ ދެކޮޅަށް ފިޔަވަޅު އަޅައިފަ އެވެ.

އިއްޔެ "މިހާރު" ގައި ޖެހި ހަބަރާ ގުޅިގެން ގްރީން އިން ރޭ ނެރުނު ބަޔާނުގައި ބުނެފައި ވަނީ، ނިމިދިޔަ ސީޒަންގައި އެފްއޭއެމުން ދޭން ޖެހޭ ފުލް ޕޭމަންޓް އަދި މިހާތަނަށް އެ ކްލަބަށް ލިބިފައި ނެތް ކަމަށެވެ. އަދި އެ ފައިސާ ޖަމާވުމުން ބިދޭސީ ކުޅުންތެރިންގެ މުސާރަތައް ވެސް ހަމަޖައްސާނެ ކަމަށް އެ ކްލަބުން ބުންޏެވެ.

އެ ކްލަބަށް ކުރިމަތިވެފައިވާ ހާލަތާ ގުޅިގެން އެފްއޭއެމްގެ ރައީސް ބައްސާމް އަދީލް ޖަލީލް އަދި ޖެނަރަލް ސެކެރެޓަރީ ހުސައިން ޖަވާޒު އާއެކު ބައްދަލުކޮށް ކަންބޮޑުވުންތައް ހިއްސާ ކުރި ކަމަށް އެ ކްލަބްގެ ބަޔާނުގައި ބުނެފައި ވެއެވެ.

"އެބޭފުޅުން އަޅުގަނޑުމެންނަށް ދެއްވި ކުރިއަށް ދެތިން ހަފުތާ ތެރޭ މި ކަންކަން ހައްލު ކޮށްދެއްވާނެ ކަމުގެ ޔަގީންކަން،" އިނގިރޭސި ބަހުން ގްރީން އިން ނެރުނު ބަޔާނުގައި ބުނެފައި ވެއެވެ.

ކުރިއަށް ހުރި ސްޕޮންސާތަކުގެ އެއްބަސްވުންތަކާ އެކު ކްލަބަށް ފައިސާ ލިބޭނެ އިތުރު ގޮތްތައް ވެސް ހަމަޖެހިގެންދާނެ ކަމަށް ގްރީން އިން ބުންޏެވެ. އަދި 2022-2023 ގެ ސީޒަން ފެށުމުގެ ކުރިން އެ ކްލަބު މިހާލަތުން އަރައި ގަނެވޭނެ ކަމުގެ ޔަގީންކަން އޮތް ކަމަށް ވެސް އެ ކްލަބުން ބުނެ އެވެ.

އެފްއޭއެމުން ނުދީ ހުރީ ކިހާ ފައިސާއެއް ކަމެއް އެ ކްލަބުން ހާމަކޮށްފައެއް ނުވެ އެވެ. އޭންޖަލް އަށް މުސާރައިގެ ގޮތުގައި 20،000 އެމެރިކާ ޑޮޮލަރަށް ވުރެ ބޮޑު އަދަދެއް ދޭން ޖެހޭކަން "މިހާރު" އަށް ވަނީ އެނގިފަ އެވެ.

ސްޕެއިންގެ ފުޓްބޯޅަ ފެޑެރޭޝަނުން ހުށަހެޅި މައްސަލަ އާ ގުޅިގެން ފީފާއިން ގްރީން އަށް އަންގާފައި ވަނީ ޖުލައި 22 ގެ ފަހުން 45 ދުވަހުގެ ތެރޭ އެފައިސާ ދެއްކުމަށެވެ. އެ މުއްދަތު ހަމަވިއިރު ވެސް އޭނާ އަށް ފައިސާ ދީފައެއް ނުވެ އެވެ.

އެ މުއްދަތުގައި މުސާރަ އަދާކޮށްފައި ނުވުމުން ފީފާއިން ވަނީ ކުރިއަށް އޮތް ޓްރާންސްފާގެ ތިން ޕީރިއަޑްގައި އެ ކްލަބަށް އާ ކުޅުންތެރިން ސޮއި ނުކުރެވޭ ގޮތަށް އަދަބު ދީފަ އެވެ. އެކަމަކު އޭގެ ކުރިން ކޮންޓްރެކްޓްގައި ތިބި ކުޅުންތެރިންނަށް އޭގެ އަސަރެއް ނުކުރާނެ އެވެ.