ލ. ގަން: ފަސް އަހަރުން ބަދަލުކޮށްލެވިދާނެ!

ބިމުގެ މުއްސަނދިކަމެވެ. ގުދުރަތީ ގޮތުން އެހާ ފުރިހަމަ އެވެ. އެކި ދާއިރާތަކުން މަތީ ތައުލީމު ހާސިލްކުރެވޭނެ ފުރުސަތުތަކެވެ. ސިއްހީ ފަރުވާގައި ވެސް ހަލުއި ސްޕީޑުގައި ކުރި އަރަމުން އަންނަ އެއް ރަށެވެ.

މި މަހުގެ 9-12 ވަނަ ވަނަ ދުވަހާ ހަމައަށް، ރާއްޖޭގެ އެންމެ ބޮޑު ރަށް، ލ. ގަމުގައި ބޭއްވި "ވިއަވަތި" ކޮންފަރެންސް ނިންމުމަށްފަހު ރައީސް އިބްރާހިމް މުހައްމަދު ސޯލިހު ދެއްވީ އުއްމީދީ ޖަވާބެކެވެ.

"މިއީ ވަރަށް ބޮޑަށް ތަަރައްގީ ކުރެވޭނެ ތަނެއް ލ. އަތޮޅުގައި އެއްވެފައި މި އޮތް ރަށްރަށް. އަޅުގަނޑުމެންގެ ޕްލޭންފައި އެބައޮތް އެއާޕޯޓް އިންޓަނޭޝަނަލް ކުރުން، ބޯހިޔާވަހިކަމުގެ މަޝްރޫއުތައް ހިންގުން، މި ހިސާބުގައި ރިސޯޓްތައް ހެދުން،" ރައީސް ވިދާޅުވި އެވެ.

"މިއީ ތަރައްގީ ކުރެވޭނެ ތަނެއް، އިކޮނޮމިކް ހަބަކަށް ހެދޭނެ ތަނެއް."

ލާމަރުކަޒީ ނިޒާމު ހަރުދަނާކޮށް، ހުރިހާ ކަމެއް މާލެއަށް ޖަމާކުރުން ނިމުމަކަށް ގެނައުމަކީ މި ސަރުކާރުގެ ބޮޑު ވައުދަކަށް ވިޔަސް، ރާއްޖޭގެ ތާރީހުގައި ހިންގަމުން އަންނަ ބިޔަ މަޝްރޫއުތައް އަދިވެސް ކުރިއަށް ގެންދަނީ މާލެ ސަރަހައްދުގަ އެވެ.

ރައީސް ވިދާޅުވި ގޮތުގައި ރަށްރަށުގައި ދިރިއުޅުމަށް މީހުންނަށް މަޖުބޫރުކޮށްގެން ނުވާނެ އެވެ. އޭގެ ބަދަލުގައި ހިދުމަތްތައް ފޯރުކޮށްދިނުމުން އެ ރަށްރަށަށް މީހުން ބަދަލުވާނެ ކަމަށާއި ސަރުކާރުން އެ މަސައްކަތް ކުރަމުން އަންނަ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ ބޮޑެތި ރަށްރަށުގައި އާބާދީ އެއްފަސް ކުރަން ސަރުކާރުން ވެސް ބޭނުންވާ ކަމަށެވެ.

ފަސް އަހަރު ދުވަހުގެ ފޮނި މަންޒަރު

ލ. އަތޮޅު ކައުންސިލްގެ ރައީސް އިސްމާއިލް އަލީ ވިދާޅުވީ މިހާރު ވެސް އެ އަތޮޅާ ކައިރި ރަށްރަށުން މީހުން ގަމަށް ބަދަލުވާ ކަމަށެވެ. އެކަމަކު ހުޅުމާލެއިން ފްލެޓު ދޫކުރަން ފެށި ފަހުން އެ އަދަދު ކޮންމެ ވެސް ވަރަކަށް މަދުވެފައިވާކަން އޭނާ ފާހަގަކުރެއްވި އެވެ.

ރައީސް ޗެއާކުރެއްވި ކޮންފަރެންސްގެ ބައްދަލުވުމެެއްގައި އިސްމާއިލް ވަނީ ބިން ހިއްކުމުގެ ބަދަލުގައި ބިން ބޮޑު ލ. އަތޮޅުގެ ރަށްތަކުގައި މީހުން އާބާދުކުރަން އެދިވަޑައިގެންފަ އެވެ.

އޭނާ ވިދާޅުވި ގޮތުގައި ލ. އަތޮޅުގައި މީހުން އާބާދުކޮށްދިނުމަށް އެދުނީ ހުރިހާ ގޮތަކުން ވެސް ތަރައްގީކުރެވޭނެ ހިސާބަކަށް ވާތީ އެވެ.

"އަޅުގަނޑަށް ތަސައްވަރު ކުރެވޭ އެންމެ ފަސް އަހަރު ދުވަހުގެ ތެރޭގައި މިތަން ކުރިއެރުވިދާނެކަން. ފަސް އަހަރުން މުޅި މިތަން ގެންދެވިދާނެ ކަން, ތަރައްގީކުރެވިދާނެކަން. އޭގެ ތެރެއިން, ދެ ތިން އަހަރުގެ ތެރޭގައި ގެދޮރު އިމާރާތްކޮށް މި ތަނަށް މީހުން ގެނައުމުގެ މަސައްކަތް ކުރެވި, ދެ އަހަރެއްހާ ދުވަހުގެ ތެރޭގައި މި ތަނުގައި އުޅެ, މި ތަނުގައި އިގުތިސޯދީ އެތައް މަސައްކަތެއް ހިނގާނެ ކަމަށް އަޅުގަނޑަށް އެބަ އުއްމީދުކުރެވޭ."

"މި ތަނުގައި މި އޮތީ ބިން ހިއްކިފައި. ބިމަކަށް މި ތަނުގައި އެއްވެސް ވަރަކަށް އިންވެސްޓްކުރާކަށް ނުޖެހޭ. ބިން ސާފުކުރުމަށް ކުރަންޖެހޭ ހަރަދެކޭ ދެން މި ކުރަންޖެހެނީ. ހިއްކާކަށް ނުޖެހޭ މި ތަނުގައި," އިސްމާއިލް ވިދާޅުވި އެވެ.

އޭނާ ވިދާޅުވީ ގަމުގެ އިތުރުން އިސްދޫ އާއި ހިތަދޫގައި ބޮޑު ބިމެއް އެބައޮތް ކަމަށެވެ.

"ގަމާ އެއްފަސްކޮށް އޮތް ސަރަހައްދުގައި ވަރަށް ބޮޑު ޖާގައެއް މި އޮތީ. އަޅުގަނޑުމެން މި ބުނަނީ މިސާލަކަށް, އެތައް ބަޔަކު އަޅުގަނޑުމެން ކައިރީގައި ކިޔަނީއޭ ލާމުން ތިމަންނަމެންނަށް ގޯއްޗެއް ދޭށޭ. ބަލާއިރު ގޯތި ދެވޭކަށް ނެތް, ގިނަ ކަންތައްތައް ނިޒާމު ހުންނަގޮތުން އަޅުގަނޑުމެންނަށް ވެސް އެއީ ފަސޭހައިން ކުރެވޭ ކަމެއް ނޫން. ލޭންޑު ޔޫސް ޕްލޭނާ އެއްޗެހި ފާސްކޮށްގެން ވަރަށް ބޮޑަށް ތަރުތީބުކޮށްގެން މިކަންކަން މި ކުރެވެނީ."

އިސްމާއިލް ވިދާޅުވީ އެ ޕްރޮގްރާމްގައި ބައިވެރިވާނެ ރަށު މީހުން ވެސް ބައިވަރު އެބަތިބި ކަމަށެވެ. އެކަމަކު ކުރިއަށް ނުދާ ކަމަށް ވިދާޅުވި އެވެ. އެހެންވެ، ފާއިތުވި އަހަރުތަކުގައި ތަޖުރިބާގެ އަލީގައި އޭނާ ވިދާޅުވީ އެންމެ ރަނގަޅީ ސަރުކާރުން ހައުސިން ސްކީމް ކުރިއަށް ގެންދިއުން ކަމަށެވެ.

"ނަމަވެސް މި ތަނުގައި ގިނައިން މީހުންނަށް ފްލެޓު ގޮތުގައި ގިނަ މީހުންނަށް ބޯހިޔާވަހިކަމުގެ އެކިއެކި ފުރުސަތުތައް ފަހިވާނެ ގޮތެއް. ގިނަ ބަޔަކަށް މި ކަހަލަ ފުރުސަތުތައް ލިބޭނެ ގޮތްތައް ފަހިވެއްޖެނަމަ މުޅި ރާއްޖޭގައި އަދި މާލޭގައި ވެސް, މާލެއިން ދެކުނުގެ ރަށްރަށުގައި ވެސް ގަމަށް ދިރިއުޅުން ބަދަލުކުރާނެ ބަޔަކު އެބަތިބި،" އޭނާ ވިދާޅުވި އެވެ.

ސިއްހީ ހިދުމަތްތައް ވެސް އެކަށީގެންނާ ގޮތެއްގައި ލިބޭއިރު ކުރިއަށް އޮތީ ސިއްހީ ދާއިރާ އަށް ފަހި ދުވަސްތަކެއްކަން އިސްމާއިލް ފާހަގަކުރެއްވި އެވެ. ސަރުކާރުން ވަނީ ގަމުގައި ޓާޝަރީ ފެންވަރުގެ އާ ހޮސްޕިޓަލަކާއި ވަކި ބައްޔަކަށް ހާއްސަކޮށްގެން އިމާރާތްކުރާ ފުރަތަމަ ހޮސްޕިޓަލް, ކެންސަރު ހޮސްޕިޓަލް ވެސް ގަމުގައި އިމާރާތް ކުރާށެވެ.

އިސްމާއިލް ވިދާޅުވީ އެ ތަންތަން ނިމުމުން ގަމަކީ ވަރަށް ރަނގަޅު ހިދުމަތްތައް ލިބޭ ތަނަކަށް ވާނެ ކަމަށެވެ. އެއާއެކު ތައުލީމު ދޭނެ ރަނގަޅު ސްކޫލުތަކާއި މަތީ ތައުލީމް ހާސިލްކުރެވޭނެ ފުރުސަތުތައް ފަހިވެފައިވާތީ، ވީހާ ވެސް ގިނަ ބަޔަކު އެ ސަރަހައްދަށް ބަދަލުވުމަށް އޭނާ އެދިވަޑައިގަންނަވަ އެވެ.

"އަޅުގަނޑުމެން ކޮންމެހެން މާލެ ގޮސް, މާލެ އަށް ބަރޯސާވާންޖެހޭ މާ ބޮޑު ސަބަބުތަކެއް އޮތް ކަމަކަށް އަޅުގަނޑުމެން ވެސް ގަބޫލެއް ނުކުރަން. އަޅުގަނޑު ގަބޫލުކުރަނީ އަޅުގަނޑު މާލެ ދާން ޖެހޭނީ ޗުއްޓީ ހޭދަކޮށްލަން ކަމަށް.. އަޅުގަނޑުމެންނަށް ލ. އަތޮޅުގައި ފުރުސަތުތައް އެބައޮތް. އަޅުގަނޑުމެން އުއްމީދުކުރަނީ ލާމަކީ ގިނަ ބަޔަކު އާބާދުވެ, ވަރަށް އަވަހަށް މި ތަން ކުރިއަރައިގެން ދާނެ ތަނެއްގެ ގޮތުގައި އޮތް. މިކަން އަވަހަށް ކުރެވޭނެ ގޮތަކަށް މި އުއްމީދުކުރަނީ."

"މި ތަނަކީ ގިނަ ޔުނިވާސިޓީތަކާ ކޮލެޖުތަކުގެ ޕްރޮގްރާމްތައް ވެސް ހިނގާ ތަނަކަށް ވީމަ, މި ރަށަށް ވަރަށް ގިނަ ބަޔަކު އެ ކަންކަމުގައި ވެސް އާދޭ. އެ ކުދިން ވެސް ތިބެލަން ހައުސިންގެ ފުރުސަތުތައް އޮތިއްޔާ އާއިލާތައް މި ތަނަށް ހިޖުރަކުރުމުގެ މާ ބޮޑު ފުރުސަތު އޮތްކަމަށް ގަބޫލުކުރަނީ."

އިސްމާއިލް ވިދާޅުވީ ލ. އަތޮޅުގައި ހަރަކާތްތައް އިތުރުވެގެން ދިއުމުން އިގުތިސޯދު ކުރިއަރާނެ ކަމަށެވެ. އެއާއެކު، މަގުގެ ދެ ފަރާތުން ވެހިކަލް ދުއްވާ މަންޒަރާއި ރޭގަނޑު ވެސް އަލިތައް އެކުލަވާލާފައި ހުންނަ ތަން ދެކެން ބޭނުންވާ ކަމަށް އޭނާ ވިދާޅުވި އެވެ. އެ ހިސާބަށް ދާއިރު ވަޒީފާތައް އުފެދި, ވިޔަފާރިތައް ފުޅާވެ, އާމްދަނީ ލިބޭނެ ގޮތްތައް އޮތުމުން މީހުން ބަދަލުވާނެ ކަމަށެވެ.

އިސްމާއިލް ވިދާޅުވީ އެ ވިސްނުންތަކާ އެއްގޮތަށް ލ. ގަން ފަދަ ބިން ބޮޑު ރަށްތައް ތަރައްގީކޮށްފިނަމަ މީހުން އާބާދުވާނެ އެވެ. އެ މަގު މިހާރު ފަހިކޮށްދިނުން އޮތީ ސަރުކާރުގެ އަތް މަތީގަ އެވެ.