ކޮންގްރެސްއާއެކު ޕާޓީއަށް އިތުރު ދިރުމެއް އަންނާނެ: އެމްއެންޕީ

މި މަހުގެ 23 އަދި 24 ވަނަ ދުވަހު ބާއްވާ އެ ޕާޓީގެ ފުރަތަމަ ކޮންގްރެސްއާއެކު ސިޔާސީ ކަންކަމުގައި އިތުރު ދިރުމެއް އަންނާނެ ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) އިން މިއަދު ބުނެފި އެވެ.

މި މަހުގެ 23 ވަނަ ދުވަހުގެ ރޭ ފަށާ އެމްއެންޕީގެ ކޮންގްރެސްއާ ގުޅޭ ގޮތުން އެ ޕާޓީގެ ތަރުޖަމާނު ޝިދާތާ ޝަރީފު ވިދާޅުވި، ކުރިއަށް އޮތް ރިޔާސީ އިންތިހާބާއި އެހެނިހެން އިންތިހާބުތަކުގައި ގެންގުޅޭނެ ސްޓްރެޓެޖީ އާއި ސިޔާސަތުތައް އިތުރަށް ސާފުވާނެ ކަމަށެވެ.

"ސިޔާސީ މަސައްކަތްތަކުގައި އަޅުގަނޑުމެން ކުރިއަށް ދާނެ ގޮތް މި ކޮންގްރެސްއާއެކު ވަރަށް ބޮޑަށް އެނގޭނެ. އަންދާޒާ މި ކުރަނީ މި ކޮންގްރެސްގައި 250-300 އާ ދެމެދުގެ އަދަދަކަށް މީހުން ބައިވެރިވާނެ ކަމަށް. އެ އެންމެންނާއެކު ޕާޓީން ފުޅާދާއިރާއެއްގައި މަޝްވަރާކޮށް ކަންކަން ނިންމާނެ،" ކުރީގެ ޖެންޑާ މިނިސްޓަރު ޝިދާތާ ވިދާޅުވި އެވެ.

ތާޖުއްދީން ސްކޫލުގައި ބާއްވާ ކޮންގްރެސްގައި މައިގަނޑު ގޮތެއްގައި އޮންނާނީ އޭނާ ވިދާޅުވިގޮތުގައި، ޕާޓީގެ އަސާސީ ގަވައިދަށް އާންމު މެމްބަރުންގެ ހިޔާލާއި މަޝްވަރާ ހޯދުމާއި އެމްއެންޕީގެ ސިޔާސަތުތައް ފައިނަލް ކުރުމެވެ. ތަފާތު ތިން ސެޝަނަކަށް ބަހާލައިގެން ބާއްވާ ކޮންގްރެސް ފެށުމުގެ ރަސްމިއްޔާތު އޮންނާނީ މި މަހުގެ 24 ވަނަ ދުވަހުގެ ރޭގަ އެވެ. އަސާސީ ގަވައިދަށް އިސްލާހު ގެނައުމާއި ސިޔާސަތުތައް ނިންމާނީ ހޮނިހިރު ދުވަހުގެ ސެޝަންތަކުގަ އެވެ.

"އަޅުގަނޑުމެން ކަހަލަ މިހާ ހަގު ޕާޓީއަކުން މިހާ ގިނަ މެމްބަރުންނާއެކު މި ވަރުގެ ކޮންގްރެސްއެއް ބޭއްވުމަކީ ވެސް ފާހަގަކުރެވޭ ކާމިޔާބީއެއް ކަމަށް އަޅުގަނޑުމެން ދެކެނީ،" ޝިދާތާ ވިދާޅުވި އެވެ.

އަންނަ އަހަރުގެ ރިޔާސީ އިންތިހާބުގައި ވާދަކުރައްވަން އެމްއެންޕީގެ ރައީސް އަދި ދަނގެތި ދާއިރާގެ މެމްބަރު މުހައްމަދު ނާޒިމް ނިންމަވާފައިވާއިރު، އެ ޕާޓީގެ އަސާސީ ގަވައިދަށް ގެންނަ އިސްލާހެއްގައިވާ ގޮތުން ނަމަ އެ ކަމުގައި ގޮތެއް ނިންމާނީ ޕްރައިމަރީއަކުންނެވެ. އެކަކަށް ވުރެ ގިނަ މީހުން ރިޔާސީ ޓިކެޓަށް ނުކުންނަ ނަމަ އަމަލު ކުރަންވީ ގޮތް އަސާސީ ގަވައިދުގައި ވާނެ ކަމަށް ޝިދާތާ ވިދާޅުވި އެވެ.

"އަސާސީ ގަވައިދަށް ކޮމެންޓް ކުރުމަށް ވެސް އަޅުގަނޑުމެން ވާނީ ހުޅުވާލާފައި. ގިނަ މެމްބަރުންގެ މަޝްވަރާއާއެކު ގޮތެއް ނިންމާނީ،" ރާއްޖޭގައި އެންމެ ފަހުން ރަޖިސްޓަރީކުރި ސިޔާސީ ޕާޓީގެ ކޮންގްރެސްއާ ގުޅޭ ގޮތުން އޭނާ ވިދާޅުވި އެވެ.

އޭނާ ވިދާޅުވީ، އެމްއެންޕީއަކީ ކުރިމަގުގައި ރާއްޖޭގެ ސިޔާސީ ދާއިރާގައި މުހިންމު ދައުރެއް އަދާކުރާ، މުހިންމު ޕާޓީއަކަށް ވާނެ ކަމުގެ ޔަގީންކަން އެބައޮތް ކަމަށެވެ.

ޝިދާތާ ވިދާޅުވީ، އިލެކްޝަންސް ކޮމިޝަންގެ ދަފްތަރުގައި ތިބީ 8،000 މެމްބަރުން ކަމަށް ވިޔަސް ޕާޓީގެ ދަފްތަރުން ދައްކަނީ 12،000 މެމްބަރުން ކަމަށެވެ.