ގާނޫނު އިސްލާހުކުރި ގޮތުން ގްރީން ޓެކްސް ނެގުން ހުއްޓިއްޖެ!

ޓޫރިޒަމާ ބެހޭ ގާނޫނަށް އެންމެ ފަހުން ގެނައި އިސްލާހެއްގައި ތާރީހު ޖަހާފައި އޮތް ގޮތުން، ގްރީން ޓެކްސް ނެގޭނެ މަގު މީރާ އަށް ބަންދުވެއްޖެ އެވެ.

ރައްޔިތުންގެ މަޖިލީހުން މިދިޔަ ޖޫން 30ގައި ފާސްކޮށް، އަދި ޖުލައި 3 ގައި ރައީސް ތަސްދީގުކުރެއްވި، ޓޫރިޒަމާ ބެހޭ ގާނޫނަށް 11 ވަނަ އިސްލާހުގައި ބުނެފައި ވަނީ ގްރީން ޓެކްސް ނަގަން ފަށާނީ އަންނަ އަހަރުގެ ޖެނުއަރީ 1 އިން ފެށިގެން ކަމަށެވެ. އެހެންވެ، ގާނޫނީ ބޭފުޅުން ވިދާޅުވާ ގޮތުގައި ނޮވެމްބަރު 1، 2015 އިން ފެށިގެން ރިސޯޓްތަކުން ނަގަމުންއައި ގްރީން ޓެކްސް ވެސް މިހާރަކު ނުނެގޭނެ އެވެ.

މި މައްސަލަ ފެންމަތިވެފައި މި ވަނީ މި މަހުގެ 31 ގެ ކުރިން ގްރީން ޓެކްސް ދައްކަން ޖެހިފައި އޮއްވަ އެވެ.

ގްރީންޓެކްސް މިހާތަނަށް ނަގަމުން އައިސްފައި ވަނީ، އެ ގާނޫނުގެ 35 ވަނަ މާއްދާގެ (ކ) ގެ ދަށުންނެވެ.

ޓޫރިޒަމާ ބެހޭ ގާނޫނަށް ގެނައި އިސްލާހުގެ މައިގަނޑު ބޭނުމަކީ، ގެސްޓް ހައުސްތައް ވެސް ގްރީން ޓެކްސްގެ ތެރެއަށް ވެއްދުމަށެވެ. ގާނޫނު މިހާރު އޮތް ގޮތުން ރިޒޯޓުތަކާއި، ހޮޓާތަކާއި، ޓޫރިސްޓް އުޅަނދުތަކާއި، މީހުން ދިރިއުޅޭ ރަށްތަކުގައި ހިންގާ 50 ކޮޓަރިއަށް ވުރެ ގިނަ ކޮޓަރި ރަޖިސްޓަރީކޮށްފައިވާ ހޮޓާތަކާއި ގެސްޓްހައުސްތަކުން ވެސް ގްރީން ޓެކްސް ދައްކަން ޖެހެ އެވެ.

ގްރީން ޓެކްސްގެ ގޮތުގައި ދައްކަން ޖެހެނީ ޓޫރިސްޓުން ރާއްޖޭގައި ހޭދަކުރާ ކޮންމެ ދުވަހަކަށް 6 ޑޮލަރެވެ.

މީރާ އިން ބުނީ މި މައްސަލަ ސަމާލު ކަމަށް އައިސްފައިވާ ކަމަށާއި އެކަން އިސްލާހުކޮށްދިނުމަށް ޓޫރިޒަމް މިނިސްޓްރީ އަށް ހުށަހަޅާފައިވާ ކަމަށެވެ. އަދި، މީރާގެ އިސް އޮފިޝަލަކު ވިދާޅުވި ގޮތުގައި އެތަނުން އަމަލު ކުރާނީ ގާނޫނުގައި ބުނެފައިވާ ގޮތަށެވެ.

"އެކަން އިސްލާހުކޮށްދޭނެ ކަމަށް އަޅުގަނޑުމެން އުންމީދުކުރަން،" އޮފިޝަލް ވިދާޅުވި އެވެ.

އޭނާ އަދި ވިދާޅުވީ މިކަމުގައި ކަންތައްތައް ދެން ކުރަންވީ ގޮތް، މީރާ އިން އެކަމާ ގުޅުން ހުރި ފަރާތްތަކަށް އަންގާނެ ކަމަށެވެ.

ޓެކްސް އާ ގުޅުންހުރި އެކިއެކި ހިދުމަތްތައް ފުޅާ ދާއިރާއެއްގައި ފޯރުކޮށްދެމުން އަންނަ ލޯފާމެއް ކަމަށްވާ، އެސް އެންޑް އޭ ލޯޔާސްއިން ބުނި ގޮތުގައި މި މަހުގެ ތިން ވަނަ ދުވަހުން ފެށިގެން މި އަހަރު ނިމެންދެން ގްރީން ޓެކްސް ނެގުން، މިހާރު އޮތް ގޮތުން ހުއްޓިގެން ދާނެ އެވެ.

"އެ މުއްދަތުގައި ފަތުރުވެރިންގެ އަތުން ގްރީން ޓެކްސްގެ ގޮތުގައި އެއްވެސް އަދަދެއް ނެގުމަކީ ޓޫރިޒަމާ ބެހޭ ގާނޫނުގެ 35 ވަނަ މާއްދާގެ (ކ) އާއި އެ މާއްދާގެ (އ) އާއި ހިލާފު ކަމެއް ކަމުގައި ވާނެ،" އެ ލޯ ފާމުން ބުންޏެވެ.

މީރާގެ ތަފާސްހިސާބު ދައްކާގޮތުން ގްރީން ޓެކްސްގެ ގޮތުގައި މި އަހަރު ޖޫން މަހުގެ ނިޔަަލަށް 547 މިލިއަނަށްވުރެ ގިނަ ރުފިޔާ ލިބިފައިވެ އެވެ. އެހެންކަމުން ޓޫރިޒަމާ ބެހޭ ގާނޫނަށް ގެނެސްފައިވާ އިސްލާހު އެ ގޮތުގައި ދެމިއޮވެއްޖެ ނަމަ ދައުލަތުގެ އާމްދަނީ އަށް ގާތްގަނޑަކަށް 600 މިލިއަން ރުފިޔާގެ މަދުވުމެއް އަންނާނެ ކަމަށް ލަފާކުރެވެއެވެ.