އެމްއައި ކޮލެޖުން ލޭ ހަދިޔާކުރުމުގެ ކޭމްޕެއް ބާއްވައިފި

އެމްއައި ކޮލެޖާއި މޯލްޑިވްސް ބްލަޑް ސާވިސް ގުޅިގެން ލޭ ހަދިޔާކުރުމުގެ ކޭމްޕެއް ބާއްވައިފި އެވެ.

އެ ކޮލެޖުން ބުނީ، މިދިޔަ ބުރާސްފަތި ދުވަހު ބޭއްވި އެ ކޭމްޕުގައި ލޭ ހަދިޔާކުރީ ރާއްޖޭގެ ތެލެސީމިއާ ސެންޓަރަށް ކަމަށެވެ.

އެ ކޭމްޕުގައި އެމްއައި ކޮލެޖުގެ ގިނަ މުވައްޒަފުންނާއި ދަރިވަރުން އަދި އާންމުން ވެސް ލޭ ހަދިޔާކުރި އެވެ.

މީހުންގެ ފުރާނަ ސަލާމަތްކުރުމަށް ލޭ ހަދިޔާކުރުމާއި މުޖުތަމައުގެ ގުޅުން ބަދަހި ކުރުމުގެ މުހިންމުކަން އަންގައިދިނުމުގެ މަގުސަދުގައި އެ ކޮލެޖުން ވަނީ ކޭމްޕް ފެށުމުގެ ކުރިން ރަޖިސްޓަރީ ކުރުމަށް ހުޅުވާލައިފަ އެވެ.

ތެލެސީމިއާ ސެންޓަރުގައި ބޭއްވި އެ ކޭމްޕުގައި އެމްއައި ކޮލެޖުގެ މުވައްޒަފުންނާއި ދަރިވަރުން އަދި އިސްވެރިންނާއެކު ރެކްޓަ ލަމްޔާ އަބްދުލް ހާދީ ވެސް ބައިވެރިވެވަޑައިގަތެވެ.

ލޭ ހަދިޔާކުރި މީހުންނަށް ޝުކުރުއަދާކޮށް، އަގުވަޒަން ކުރުމުގެ ގޮތުން އެމްއައި ކޮލެޖުން ވަނީ ހަނދާނީ ލިޔުމާއި ކޮލެޖް ލޯގޯ ޖެހި ޖޯޑު ފަދަ ހަދިޔާ ދީފަ އެވެ.

އެއީ އެމްއައި ކޮލެޖުގެ ކޯޕޮރޭޓް ސޯޝަލް ރެސްޕޮންސިބިލިޓީ (ސީއެސްއާރް) ދަށުން ކޮންމެ އަހަރަކު ވެސް ބާއްވަމުން އަންނަ ކޭމްޕެކެވެ.

އެފަދަ ސީއެސްއާރު ހަރަކާތްތަކުގައި ޒުވާނުން ބައިވެރިވުމަކީ ދެމެހެއްޓެނިވި އަދި ކަންކަމުން އަވަހަށް އަރައިގަނެވޭނެ ފަދަ ގައުމެއް ބިނާކުރުމުގައި މުހިންމުކަމެއްކަން އަންގައިދޭން ހާއްސަ އިސްކަމެއް ދޭނެކަމަށް އެމްއައި ކޮލެޖުން ބުންޏެވެ.