ހުޅުދޫ ބަނދަރުގެ ބޮޑު ބައެއް ނިމިފައިވަނިކޮށް މަސައްކަތް ހުއްޓާލަން އީޕީއޭއިން އަންގައިފި

އައްޑޫގެ ދެ ރަށެއްގެ ބަނދަރު މަސައްކަތުގެ ބޮޑު ބައެއް ނިމިފައި ވަނިކޮށް، އެންވަޔަރްމަންޓަލް އިމްޕެކްޓް އެސެސްމަންޓް (އީއައިއޭ) އާ ހިލާފަށް އެކަން ކުރަމުން އަންނަ ކަމަށް ބުނެ މަސައްކަތް ހުއްޓާލަން އެންވަޔަރްމަންޓަލް ޕްރޮޓެކްޝަން އެޖެންސީ (އީޕީއޭ) އިން މިއަދު އަންގައިފި އެވެ.

އެ އެޖެންސީން ނެރުނު ބަޔާނެއްގައި ބުނީ ސ. ހުޅުދޫ އަދި ހުޅުމީދޫގެ ބަނދަރު އިތުރަށް ތަރައްގީކުރަން ޕްލޭނިން މިނިސްޓްރީއަށް ޖޫން 28، 2020 ގައި ދޫކުރި އީއައިއޭ ރިޕޯޓް ގަބޫލުކުރި ކަމުގެ ލިޔުމާ ހިލާފަށް މަސައްކަތް ކުރަމުންދާ ކަމަށެވެ.

އެހެންވެ، ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާ ބެހޭ ގަވައިދުގެ ދަށުން އެ މަޝްރޫއުގެ ބިން ހިއްކުމާއި ފަޅު ކޮނުމުގެ ހުރިހާ މަސައްކަތެއް ހުއްޓާލަން އަންގާފައިވާ ކަމަށް ބުންޏެވެ.

ހުޅުދޫގެ ބަނދަރުގެ މަސައްކަތް 2020 ވަނަ އަހަރު 80.69 މިލިއަން ރުފިޔާއަށް ހަވާލުކުރީ އެމްޓީސީސީއާ އެވެ. ހުޅުމީދޫ ބަނދަރު ތަރައްގީކުރަން ހަވާލުކުރީ 66.3 މިލިއަން ރުފިޔާ އަށެވެ.

އެ ކުންފުނީގެ މެނޭޖިން ޑިރެކްޓަރު އާދަމް އާޒިމް ވިދާޅުވީ އޮންނަ އުސޫލުތަކާ ހިލާފަށް އެމްޓީސީސީން އެއްވެސް މަސައްކަތެއް ނުކުރާނެ ކަމަށެވެ. އަދި މަޝްރޫއު ނިމެން ކައިރިވެފައި ވަނިކޮށް މަސައްކަތް ހުއްޓާލުމަކީ ބޮޑު ގެއްލުމެއް ލިބޭނެ ކަމެއް ކަމަށް އޭނާ ވިދާޅުވި އެވެ.

ބަނދަރުގެ 88 ޕަސެންޓް މަސައްކަތް ވަނީ ނިމިފަ އެވެ.

އޭނާ ވިދާޅުވި ގޮތުގައި ބަނދަރުގެ މަސައްކަތް ހުއްޓާލަން އެންގުމަކީ ރަނގަޅު ކަމެއް ނޫނެވެ. އޭގެ ބަދަލުގައި ގޯސްކޮށް ކުރާ ކަމެއް ބުނެދޭން ޖެހޭނެ ކަމަށާއި އެކަމާ ގުޅޭ ގޮތުން މަސައްކަތްތަކެއް ކުރަމުން އަންނަ ކަމަށް ވެސް އާޒިމް ވިދާޅުވި އެވެ.

އެމްޓީސީސީން މިދިޔަ އާދިއްތަ ދުވަހު ކުރި ޓްވީޓުގައި ބުނީ ހުޅުދޫ ބަނދަރުގެ ހާބަ ޕޭވަމަންޓް ހެދުމާއި މަގުބައްތި ހަރުކޮށް ނިންމާފައިވާ ކަމަށެވެ. ބޮޑު ހިލައިގެ ފުރަތަމަ ޝިޕްމެންޓް ވެސް ޕްރޮޖެކްޓް ސައިޓަށް ގެންގޮސްފައިވާ ކަމަށް އެ ޓްވީޓުގައި ބުންޏެވެ.