އީއައިއޭއާ ހިލާފުވުމުން ސިޔާމްގެ އޮޅުވެލި ރިސޯޓަށް 20،000ރ. ގެ ޖޫރިމަނާއެއް؛ ފައިސާ ދައްކައިފި

އީއައިއޭއާ ޚިލާފުވުމުން މީދޫ ދާއިރާގެ މެމްބަރު އަހްމަދު ސިޔާމް މުހައްމަދުގެ އޮޅުވެލި ރިސޯޓު 20،000ރ. އިން ޖޫރިމަނާކޮށްފައިވާ ކަމަށާއި އެ ފައިސާ މިހާރު ލިބިފައިވާ ކަމަށް އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ) އިން މިއަދު ބުނެފި އެވެ.

އީޕީއޭ އިން މިއަދު ކުރި އިއުލާނެއްގައި ބުނީ ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް (އީއައިއޭ) ހެދުމާ ބެހޭ ގަވާއިދުގެ ދަށުން ފުރިހަމަ ކުރަން ޖެހޭ މަރުހަލާތައް ފުރިހަމަ ކުރުމަކާ ނުލައި އެމެރަލްޑް ރިސޯޓްސް ޕްރައިވެޓް ލިމިޓެޑުން، މާލެ އަތޮޅުގައި އޮންނަ އޮޅުވެލި ބީޗް އެންޑް ސްޕާ ރިސޯޓު އިތުރަށް ތަރައްގީކުރުމުގެ މަސައްކަތްތައް ފަށާފައިވާކަން އެ އެޖެންސީގެ ސަމާލުކަމަށް އައުމާއި ގުޅިގެން އެ މައްސަލަ ބަލާފައިވާ ކަމަށެވެ.

އެ މަސައްކަތް ކޮށްފައި ވަނީ ގާނޫނާއި ގަވާއިދާ ހިލާފަށް ކަން މި މައްސަލައާ ގުޅިގެން ދެފަރާތުގެ މެދުގައި ބަދަލުކުރެވުނު ލިޔެކިޔުންތަކުންނާއި އެ އެޖެންސީން ބެލިބެލުންތަކުން ސާބިތުވާ ކަމަށް ވެސް އީޕީއޭ އިން ބުންޏެވެ.

އެހެންވެ، މި ކަހަލަ މައްސަލަތަކުގައި ޖޫރިމަނާކުރާ ގާނޫނާއި ގަވާއިދުތަކުގެ ދަށުން އެ ކުންފުނި ވަނީ މި މަހު 11 ގައި 20،000ރ. އިން ޖޫރިމަނާކޮށްފަ އެވެ. އަދި އެ ކުންފުނިން މި މަހު 18 ވަނަ ދުވަހު ޖޫރިމަނާގެ ފައިސާ ދައްކާ ހަލާސްކޮށްފައިވާ ކަމަށް ވެސް އީޕީއޭ އިން ބުންޏެވެ.

އީޕީއޭ އިން ބުނި ގޮތުގައި، އެމެރަލްޑް ރިސޯޓްސް ޕްރައިވެޓް ލިމިޓެޑުން ކުރިއަށް ގެންދާ ހުރިހާ މަޝްރޫއުތަކެއްގެ މަސައްކަތްތައް ގާނޫނާއި ގަވާއިދުތަކާ އެއްގޮތަށް، ހުރިހާ މަރުހަލާތަކެއް ފުރިހަމަކުރުމަށް ފަހު ކުރިއަށް ގެންދިއުމަށް ވެސް ވަނީ ނަސޭހަތްތެރިވެފަ އެވެ.

އީޕީއޭ އިން ކުރާ ޖޫރިމަނާތަކަށް ފައިސާ ނުލިބޭ މައްސަލަ ވަރަށް ބޮޑެވެ. ތިމާވެއްޓަށް ގެއްލުން ދިނުމުގެ އެކި މައްސަލަތަކާ ގުޅިގެން ކޮށްފައިވާ ޖޫރިމަނާތަކުގެ ތެރެއިން 825 މިލިއަނަށް ވުރެ ގިނަ ރުފިޔާ އަދިވެސް ދައުލަތަށް ނުލިބޭކަން އީޕީއޭގެ ތަފާސްހިސާބުތަކުން ދައްކަ އެވެ.